20 იანვარს საქართველოს პრეზიდენტი გიორგი მარგველაშვილი თურქეთში ოფიციალური ვიზიტით გაემგზავრა, რომლის ფარგლებშიც, როგორც პრეზიდენტის ადმინისტრაცია იუწყებოდა, ტაო-კლარჯეთსაც უნდა წვეოდა.
გუშინ კი, მან თურქეთის რესპუბლიკაში სახელმწიფო ვიზიტი ოშკისა და იშხნის ტაძრების მონახულებით დაასრულა.
საქართველოს პრეზიდენტმა თურქულ მხარეს ისტორიული ძეგლების დაცვისა და შენარჩუნებისთვის მადლობა გადაუხადა.
“ბედნიერი ვარ, რომ დღეს შესაძლებლობა მოგვეცა ჩვენი წინაპრების შემოქმედება გვენახა. მინდა ხაზგასმით აღვნიშნო, რომ, ღვთის მადლით, საქართველოს და თურქეთს დღეს ისეთი ცივილიზებული ხელისუფლება ჰყავს, რომელიც პატივს სცემს, რუდუნებით უვლის და მომავალ თაობას კულტურულ მემკვიდრეობას უნახავს “, _ აღნიშნა გიორგი მარგველაშვილმა.
როგორც ქვეყნის პირველმა პირმა და ქართული დელეგაციის წევრებმა განაცხადეს, თურქეთის ხელისუფლებასთან გამართული შეხვედრების მსვლელობისას, კულტურული მემკვიდრეობის დაცვის საკითხიც განიხილეს.
“შეხვედრების დროს მივიღეთ დაპირება, რომ იშხანის ტაძრის აღდგენა 2014 წელს დასრულდება, ხოლო, რაც შეეხება ოშკს, მიმდინარე წელს, მისი რეაბილიტაციის პროცესი პარალელურად დაიწყება, რომელშიც ქართველი სპეციალისტებიც ჩაერთვებიან”, – აღნიშნა ეროვნული უშიშროების საბჭოს მდივანმა ირინე იმერლიშვილმა, რასაც თურქეთის რესპუბლიკაში საქართველოს ელჩი ირაკლი კოპლატაძეც ეთანხმება და აცხადებს, რომ ანკარაში გამართული მოლაპარაკებების თვალსაზრისით, სრულიად ახალი ეტაპი დაიწყო. საქართველოს პრეზიდენტსა და ქართულ დელეგაციას თურქეთის მხარემ აღუთქვა, რომ ოშკის სარეაბილიტაციო სამუშაოები მიმდინარე წელს დაიწყება.
მიუხედავად საქართველოს პირველი პირების თურქეთში გაკეთებული განცხადებისა, რომ 2014 წელს ოშკის რეაბილიტაციაში ქართველი სპეციალისტებიც ჩაერთვებიან, კულტურისა და ძეგლთა დაცვის სამინისტროში ამის შესახებ ახალს ვერაფერს ამბობენ.
კულტურის მინისტრის მოადგილე მარინე მიზანდარი ამბობს, აღნიშნულთან დაკავშირებით არანაირი ცვლილებები არაა. ანუ, ოფიციალური ხელშეკრულება, რომლის მიხედვითაც ქართველ სპეციალისტებს საშუალება ექნებათ თურქეთის ტერიტორიაზე განთავსებული ქართული ძეგლის რეაბილიტაციაში ჩაებან, გაფორმებული ჯერ კიდევ არ არის.
შეგახსენებთ, რომ ხელშეკრულება, რომელიც აღნიშნულს ითვალისწინებდა და თურქულ მხარეს გადაეგზავნა, ყოველგვარი ხელმოწერისა და პირობებზე დასტურის გარეშე უკან დააბრუნეს. თუმცა, აქვე უნდა ითქვას, რომ თურქულმა მხარემ ხელშეკრულებასთან დაკავშირებით, რეკომენდაციები გასცა.
“ეს ხელშეკრულება ჩვენ უკან დაგვიბრუნდა, ამიტომ პრეზიდენტს მასზე ხელი არ მოუწერია. ახლა კიდევ ერთხელ გადავხედავთ და ამ თემას მას შემდეგ დავძრავთ, როცა უწყებათაშორის კომისიაში განხილვები დასრულდება. აღსაღნიშნავია, რომ ამ საკითხში საგარეო საქმეთა სამინსიტროცაა ჩართული.
რა ვადებში მოხერხდება ახალი ხელშეკრულების გაფორმება ამ ეტაპზე ვერ გეტყვით, თუმცა ვიდრე ოშკზე რეაბილიტაცია დაიწყება უნდა მოესწროს. მიუხედავად ოფიციალური ხელშეკრულების არ არსებობისა, ჩვენი სპეციალისტები რესტავრაციის პროცესში მაინც ჩერთვებიან, ეს პრობლემა არც იშხანზე არსებობდა, ვინაიდან ორი ქვეყნის კულტურის მინისტრებს შორის ამის სიტყვიერი შეთანხმება იქამდე შედგა”, _ განუცხდა “გურია ნიუსს” მინისტრის მოადგილემ.
