ყველაზე მნიშვნელოვანი მიმართულება წელს მცხეთა-მთიანეთში საავტომობილო გზების მშენებლობა-რეაბილიტაციაა.
გაგრძელდება თბილისი-თიანეთის საავტომობილო გზის რეაბილიტაცია, ასევე, თიანეთი-ზარიძეები-ჟინვალის, მცხეთა-სტეფანწმინდა-ლარსის, თბილისის შემოსასვლელი გზისა და სასადილო-ორხევი-ხევსურთსოფელი-სიონის საავტომობილო გზების რეაბილიტაცია. ასფალტბეტონის საცვეთი ფენის აღდგენა გაგრძელდება თბილისი-სენაკი-ლესელიძის საავტომობილო გზის ზაჰესი-ნატახტარის მონაკვეთზეც.
2014 წელს დაიწყება მცხეთა-სტეფანწმინდა-ლარსის 2 მონაკვეთისა და მცხეთა-შიო მღვიმის მონასტრის საავტომობილო გზების რეაბილიტაცია. ფასანაურის ტერიტორიაზე ასევე დაიწყება მცხეთა-სტეფანწმინდა-ლარსის საავტომობილო გზის მონაკვეთის პერიოდული შეკეთებაც. ამისათვის სამინისტრო, საავტომობილო გზების დეპარტამენტთან ერთად, რეგიონში 28822 600 ლარის დახარჯვას გეგმავს.
გარდა ამისა, ყურადღება დაეთმობა წყალმომარაგების საკითხის მოგვარებას. ამ მიზნით რეგიონში 2 949, 81 ათასი ლარი დაიხარჯება. აღნიშნული თანხა გადანაწილდება 2 პროექტზე: დაიწყება წყალმომარაგების სისტემის მშენებლობა-რეაბილიტაცია დუშეთში და გაგრძელდება თიანეთის მუნიციპალიტეტის ზარიძეების თემში შემავალი სოფლების წყალსადენი სისტემის სარეაბილიტაციო სამუშაოების შესყიდვა. პროექტებს მუნიციპალური განვითარების ფონდი განახორციელებს, ხოლო ადმინისტრირებას გაერთიანებული წყალმომარაგების კომპანია გაუწევს.
2014 წელს 402,7 ათსი ლარი მოხმარდება მყარი ნარჩენების მართვას. კეთილმოეწყობა და ექსპლოატაციაში შევა დუშეთისა და მცხეთის ნაგავსაყრელები. ექსპლუატაციაში ასევე შევა ყაზბეგისა და თიანეთის ნაგავსაყრელებიც.
გარდა ამ სამუშაოებისა, დაგეგმილია ქალაქ მცხეთაში, გმირის ქN16-ში მდებარე N3 ბაგა-ბაღის რემონტი და ეზოს მოწყობის სამუშაოები; სოფელ ქსოვრისში ბაგა-ბაღის შენობის რემონტი და ეზოს კეთილმოწყობა; საერთაშორისო მნიშვნელობის მცხეთა-სტეფანწმინდა-ლარსის საავტომობილო გზის მდინარე თერგზე გველეთის ხიდის მშენებლობის სამუშაოები; დუშეთის მუნიციპალიტეტის სოფელ არაგვისპირში მდინარე ფოტისხევზე ნაპირსამაგრი სამუშაოები, მცხეთა-სტეფანწმინდა-ლარსის საავტომობილო გზაზე მდ. შუგუდასხევზე სახიდე გადასასვლელის რეაბილიტაცია; ნარეკავი-მცხეთა-რკ. სადგურის საავტომობილო გზის მეორე კილომეტრზე დაზიანებული სწორკუთხა მილისა და ჩაწყვეტილი მიწის ვაკისის აღდგენითი სამუშაოები; მდინარე ბიდარაზე და ჩხერაზე ახალი სახიდე გადასასვლელის მოწყობა.
შეხვედრაზე ასევე განიხილეს რეგიონში განსახორციელებელი პროექტების ფონდიდან მცხეთა-მთიანეთის მუნიციპალიტეტებისათვის დამტკიცებული პროექტები, რომლის პრიორიტეტებიც თავად ადგილობრივმა ხელისუფლებამ განსაზღვრა. საქართველოს რეგიონული განვითარების სამთავრობო კომისიამ უკვე დაამტკიცა რეგიონში განსახორციელებელი 10 238 971 ლარის ღირებულების 40 პროექტი. აქედან 5 პროექტით გათვალისწინებულია გზებისა და ხიდების რეაბილიტაცია, 28 პროექტით – წყლის სისტემების რეაბილიტაცია, 2 პროექტით – ნაპირსამაგრი სამუშაოები, სანიაღვრე არხების მოწესრიგება, 5 პროექტით – კულტურის სახლისა და სხვა შენობების რეაბილიტაცია.
ჯამში, 2014 წელს მცხეთა-მთიანეთის რეგიონში ინფრასტრუქტურულ პროექტებზე 49 472 971 ლარი დაიხარჯება. აქედან, 39 მილიონი ლარის სამუშაოების დაფინანსებას საქართველოს რეგიონული განვითარებისა და ინფრასტრუქტურის სამინისტრო უზრუნველყოფს. რეგიონებში განსახორციელებელი პროექტების ფონდიდან კი მცხეთა-მთიანეთი დამატებით 10 238 971 ლარს მიიღებს.
