“უმკაცრესად უნდა დაისაჯოს ყველა, ვინც კანონს არღვევს, არ აქვს მნიშვნელობა რა მოტივით და რის გამო არღვევენ კანონს. პროტესტის ამგვარი ფორმა აბსოლუტურად მიუღებელია და შესაბამისად, ისინი უკვე იმ ძალით გვიპირისპირდებიან, რომ ამის მოგვარება სამართალდამცველებს ევალებათ. კანონი უნდა აღსრულდეს, ეს არის ჩემი კომენტარი.
ამზომველები იქ იმყოფებიან აბსოლუტურად კანონიერად. ერთი რამ მინდა გაითვალისწინოს ყველამ. ეს მიწები უკვე კერძო ინვესტორის, ტრანსელექტრიკას საკუთრებაშია, ის კია არა რომ ამ ადამიანებს დარეგისტრირებული არ აქვთ, საერთოდ არც არის მათ საკუთრებაში. ამიტომ, ცხადია, ამ ყველაფრის უკან ვიღაცის ფარული ინტერესები დგას. ამ ყველაფერში გავერკვევით, ეს არ არის პრობლემა და ყველაფერი მოგვარდება. რაც შეეხება ამ ფორმით და ძალისმიერი მეთოდებით დაპირისპირებას, ამაზე სამართალდამცველებმა ადექვატური რეაქცია უნდა მოახდინონ.” _ განაცხადა ენერგეტიკის მინისტრის მოადგილემ, ხუდონჰესის პროექტის კოორდინატორმა ილია ელოშვილმა “გურია ნიუსთან” საუბრისას
სოციალურ ქსელში ენერგეტიკის მინისტრის მოადგილეს, არასამთავრობო ორგანიზაციის „მწვანე ალტერნატივას” თავმჯდომარე, მანანა ქოჩლაძე ილია ელოშვილის განცხადებას ასე გამოეხმაურა:
“ამ სიტყვების მერე მოვითხოვ ილია ელოშვილის გადაყენებას, აგრეთვე გამოძიების აღძვრას ყველა იმ პირზე, რომელთაც თავის დროზე, მიწიანად, დედაბუდიანად მიყიდეს სოფელი ხაიში ინვესტორს ერთ დოლარად. სირცხვილია, რასაც ვაკეთებთ, ეს არის პირდაპირი დარღვევა ადამიანის უფლებათა დაცვის როგორც ევროპული კონვენციის, ასევე გაეროს სოციალურ ეკონომიკური და კულტურულ უფლებათა დაცვის კონვენციის.
_ ქალბატონო მანანა, 1988 წელს ხაიშში130 ოჯახმა აიღო საკმაოდ სოლიდური კომპენსაცია. თუ იცით ამის შესახებ და რა კომენტარს გააკეთებთ?
_რაც შეეხება კომპენსაციების აღებას საბჭოთა კავშირის დროს, ამას არავინ უარყოფს, მათ შორის ის ოჯახებიც, რომლებმაც აიღეს. თუმცა, საქართველოს მინისტრთა კაბინეტის 1898 წლის გადაწყვეტილებით, ხუდონჰესის პროექტი არა მარტო უნდა შეჩერებული იყო, არამედ განხორციელებულიყო სალიკვიდაციო და საკონსერვაციო სამუშაოები, რომლებიც არ შესრულდა. შესაბამისად, თუ ახლა კომპანიას უნდა გამოაჩინოს რომ ამ ადამიანებმა ერთხელ უკვე აიღეს კომპენსაცია, ეს არ არის სწორი. ეს ადამიანები ერთხელ უკვე გადაასახლეს სვანეთიდან, და ისინი დაუბრუნდნენ თავიანთ საცხოვრებელ ადგილს მას შემდეგ, რაც შეჩერდა სრულად მშენებლობა
_ თქვენ პირადად და “მწვანე ალტერნატივა” აპირებთ თუ არა ხაიშში ჩასვლას იმ ადამიანებთან, რომლებიც აქციებს მართავენ?
_ რაც შეეხება ხაიშის მოსახლეობას, ჩვენ ვაპირებთ დავუდგეთ გვერდით იმ ფორმით, რა ფორმითაც იქნება ყველაზე უფრო ეფექტური, მათ შორის უზრუნველვყოფთ მათი უფლებების სამართლებრივ დაცვას.
