გუნავას პროკურატურაში დაბარებას უკვე გამოეხმაურნენ “ნაციონალურ მოძრაობაში”. უმცირესობის წევრის, ნუგზარ წიკლაურის განცხადებით ეს ხელისუფლების მხრიდან მორიგი პოლიტიკური შურისძიების ნაბიჯია იმ ძალაზე, რომელმაც კრიმინალი პროკურორი გადააყენა თანამდებობიდან.
“გრძელდება აქტიური პოლიტიკური დევნა სამეგრელო-ზემოსვანეთის ყოფილი გუბერნატორის, თენგიზ გუნავას წინააღმდეგ. ჩვენ კარგად გვახსოვს როგორ ჩაუდეს იარაღი, როგორ აიძულებდნენ ნარკოტიკების მიღებას და ვხედავთ რომ დღესაც დაუსჯელად დადიან ის ადამიანები, რომლებმაც კანონი დაარღვიეს და დანაშაული თავად ჩაიდინეს. დღეს გუნავა არის „ერთიანი ნაციონალური მოძრაობის“სამდივნოს ოფიციალური წარმომადგენელი სამეგრელოს რეგიონში. ერთ-ერთი ის ადამიანი, რომელიც აქტიურ მონაწილეობას მიიღებს მოახლოებულ ადგილობრივ არჩევნებში და ხელისუფლების ეს ქმედებაც უშუალოდ უკავშირდება ამ არჩევნებს და სამეგრელოში “ქართული ოცნების” მოახლოებულ მარცხს.
მეორე მიზეზად, “ნაციონალური მოძრაობა” ხედავს იმ ფაქტს, რომ ყაჩაღი პროკურორის, ფარცხალაძის გადაყენების შემდეგ, ხელისუფლებას არ სურს შეთხელდეს რიგები პროკურატურასთან, არ სურს, რომ შეწყვიტონ პოლიტიკური შურისძიება იმ პოლიტიკურ ძალაზე, რომელმაც მიაღწია ამ ყაჩაღი, კრიმინალი პროკურორის გადაყენებას”.
წიკლაურის განცხადებით ხელისუფლება იყენებს ყოფილ დამნაშავეებს, რომლებიც იძლევიან აბსურდულ ჩვენებებს. მისი თქმით ასე მოხდა გუნავასთან დაკავშირებითაც.
“მოძებნეს “ქართული ოცნების” მხარდამჭერი, წარსულში ნასამართლევი, კრიმინალი ვინმე გურამ ქადარია, რომელიც აყენებს ახალ აბსურდულ ბრალდებებს გუნავას წინააღმდეგ. დღეს ხელისუფლება კრიმინალებს,წამლისბარიგებსიყენებს ყოფილი სამართალდამცველების და დანაშაულთან მებრძოლთა წინააღმდეგ, იმ ადამიანების წინააღმდეგ, რომლებიც აქტიურ მონაწილეობას იღებდნენ რუსეთის მხრიდან საქართველოს ოკუპაციის წინააღმდეგ ბრძოლაში”.
თავად თენგიზ გუნავა კი აცხადებს, რომ გურამ ქადარია იარაღის უკანონო შენახვაზე იყო დაჭერილი. ის ეჭვმიტანილი იყო ნარკოტიკის უკანონო რეალიზაციაზეც. ყოფილი გუბერნატორის განცხადებით, მას იარაღი და ნარკოტიკი იმ ადამიანის უშუალო ბრძანებით ჩაუდეს, რომელიც დღეს პრემიერია და უკვე არაფერი უკვირს.
მკითხველს შევახსენებთ, რომ ეს ის ქადარიაა, რომელიც გურამ სარაძის ქალიშვილმა მამის მკვლელობის მთავარ მოწმედ დაასახელა და ჟურნალისტ ნანა ფაჟავასთან ერთად მისი დაცვის და უსაფრთხოების გარანტია მოითხოვა.
