რომელსაც არასამთავრობო ორგანიზაცია “დევნილი ქალები საკუთარი უფლებების დასაცავად” ყველა მედია საშუალებებს აწვდის და სთხოვს გავრცელებას. განცხადებით ორგანიზაცია მიმართავს საქართველოს ოკუპირებული ტერიტორიებიდნ გადაადგილებულ პირთა, განსახლებისა და ლტოლვილთა მინისტრს დავით დარახველიძეს, საქართველოს შრომის, ჯანმრთელობისა და სოციალური დაცვის მინისტრს დავით სერგეენკოს და აფხაზეთის მთავრობის მოვალეობის შემსრულებელს ვახტანგ ყოლბაიას.
განცხადების ტექსტს უცვლელად გთავაზობთ:
“ამ დღეებში მედიაში გავრცელდა ეკონომიკისა და მდგრადი განვითარების სამინისტროს განცხადება, რომელშიც სამინისტრო მოუწოდებს ე.წ. ” შეჭრილ დევნილებს” დაუყოვნებლივ დატოვონ მათ მიერ “ოკუპირებული ობიექტები”, წინააღმდეგ შემთხვევაში მიღებული იქნება შესაბამისი ზომები. ზუგდიდში ჩასახლებულმა დევნილებმა არაერთგვაროვნად და შეშფოთებით მიიღეს ეს განცხადება, რომელშიც გაურკვეველია ძალიან ბევრი საკითხი:
რატომ გადაამისამართა ეკონომიკის სამინისტრომ პრობლემა ადგილობრივ თვითმმართველობის ორგანოებზე და რატომ არის იგნორირებული დევნილთა სამინისტრო? რა მიზეზით არ აგრძელებს და დაიხურა ჯანდაცვის სამინისტროს მიერ დაფინანსებული ბინის თანხის გადახდის პროექტი? სად უნდა წავიდნენ ეს ადამიანები და რა ალტერნატივა შეეთავაზებათ მათ? რომელი მოვლენების წინაპირობაა აღნიშნული განცხადება? რატომ შეაფასა ეს მოვლენები დავით დარახველიძემ საბოტაჟად?
მიგვაჩნია, რომ სანამ ამ დევნილების მიმართ გატარდება რაიმე სახის ღონისძიებები კიდევ ერთხელ უნდა ჩატარდეს მონიტორინგი სამთავრობო, არასამთავრობო და საერთაშორისო ორგანიზაციების მონაწილეობით. გასახლების აუცილებლობის შემთხვევაში კი უნდა მოხდეს მათთვის შესაბამისი ფართების შეთავაზება უკვე ადაპტირებულ გარემოში. მითუმეტეს ამ ეტაპზე, როცა დაანონსებულია ზუგდიდში საცხოვრებელი კორპუსების მშენებლობა, ისედაც გაღიზიანებული ადამიანებისთვის სახელმწიფოს მხრიდან ხელოვნური პრობლემის შექმნა ნაკლებად გამართლებული ნაბიჯია. ამ გადაწყვეტილებამ კი, არ არის გამორიცხული არანაკლები ენთუზიაზმით აიყოლიოს კერძო მესაკუთრე, რაც უცილობლად გამოიწვევს უკმაყოფილების ტალღას. ჩვენი აზრით, აღნიშნული განცხადება ხელს უშლის სამოქმედო გეგმის განხორციელებას და არ არის გამორიცხული, რომ აღსრულების პროცესში დაირღვეს დევნილის უფლებები. შექმნილი სიტუაციიდან გამომდინარე, განცხადება საჭიროებს გადახედვას. ნებისმიერი ერთპიროვნული გადაწყვეტილება, რომელიც არ იქნება გამყარებული კომპლექსური მიდგომით ნამდვილად ვერ წაადგება დევნილთა ეფექტურად განსახლების პროცესს და მითუმეტეს მათი უფლებების დაცვას”.
