მისი თქმით, მუნიციპალიტეტის გამგეობაში გაბერილი შტაბების და ხელშეკრულებით აყვანილი პირების დრო დასრულდა. გამგებლის მოვალეობის შემსრულებელი ამტკიცებდა, რომ კადრები ყველგან შეიცვლებოდა.
_ შეიცვლება კადრები თითქმის ყველა სამსახურში და თითქმის ყველა სოფელში. დარწმუნებული ვარ, საზოგადოებას არ ეჩქარება, იმიტომ, რომ ხალხი ბრძენია და შეცდომას არ მაპატიებს, ამიტომ, ყველა სოფელზე ერთდროულად ვმუშაობ და შევეცდები, უკეთესი გადაწყვეტილება მივიღო.
_ ბატონო თამაზ, თქვენ თქვით, რომ ხელშეკრულებით აყვანილი ყველა პირი გათავისუფლდებოდა. თუმცა, როგორც გავარკვიეთ, ეს ყველას არ შეეხო… ამორჩევა რა პრინციპით მოხდა?
_ ხელშეკრულებით აყვანილ პირებზე მითხარით, ვინ და სად მუშაობს?!
_ მაგალითად, კულტურის ცენტრში ისევ ჰყავთ ხელშეკრულებით აყვანილი პირი…
_ ძალიან ცუდი. რაც შეეხება აიპ-ებს _ თქვენთვის ცნობილია, რომ ერთი აიპ-ი ბახმაროზე იქმნება, შეიცვალა კიდევ ერთი აიპ-ის ხელმძღვანელი _ გოჩა ჯიქია უხელმძღვანელებს სპორტსკოლას. სხვა გეგმებიც არსებობს. ჩემი გადასაწყვეტი რომ იყოს, საერთოდ გავაუქმებდი მაგ აიპ-ებს და ეს ასეც მოხდება, ალბათ, მომავალში, _ ეს ინტერვიუ თამაზ ჯინჭარაძესთან თებერვალშია ჩაწერილი.
ოფიციალურად გამოთხოვილი დოკუმენტაცია მოწმობს, რომ სწორედ ამ პერიოდში, შრომითი ხელშეკრულების ვადის გასვლის გამო გათავისუფლდნენ ნუგზარ კეკელიძე, თინათინ მგალობლიშვილი, ირაკლი ბენდელიანი, გრიგოლ დოლიძე, სიმონ ასეიშვილი, უშანგი ართმელაძე, ანდრო დევიძე, ანა გიორგაძე, დიმიტრი მეგრელიშვილი, ტარასი კეკელიძე, ელგუჯა ცინცაძე, ზურაბ რამიშვილი, მამუკა კილასონია.
თუმცა, როგორც გაირკვა, ეს ყველაფერი მხოლოდ დროებითი იყო _ მიუხედავად გამგებლის ზემოთა აღნიშნული განცხადებისა, ხელშეკრულებით აყვანილი კადრები გამგეობაში ისევ დააბრუნეს.
ჩვენს შეკითხვაზე, რატომ დააბრუნა გათავისუფლებული კადრები მაშინ, როცა ამას კატეგორიულად გამორიცხავდა, ჯინჭარაძე ამბობს, რომ თანამდებობის პირის დაპირება არის პრობლემის მოგვარების მცდელობა:
_ პირველ რიგში, როცა თანამდებობის პირი რაიმე დაპირებას აძლევს ხალხს, იგულისხმება ის, რომ ეს არის მისი მცდელობა, მოაგვაროს ესა თუ ის პრობლემა… სინამდვილე დგება ბოლოში. 23 სოფლიდან 17 სოფელში შეიცვალა გამგებელი და უახლოეს დროში კიდევ შეიცვლება 3 სოფლის გამგებელი. შეცვლილია სამსახურის უფროსები. კონკრეტულად, თორმეტი სამსახურიდან არ არის შეცვლილი სამაშველო, სამხედრო და საფინანსო სამსახურების უფროსები. უახლოეს მომავალში მინდა, კიდევ ორი შევცვალო. სამსახურის შეცვლილ უფროსებს აქვთ სრული თავისუფლება, შეცვალონ განყოფილების უფროსები და სპეციალისტები, თუკი, რა თქმა უნდა, ამის შესაბამისი მიზეზი ექნებათ. აქედან გამომდინარე, შევცვალე თითქმის ყველა სოფლის გამგებელი და ასევე სამსახურის უფროსებიც. დასკვნები საზოგადოებამ გააკეთოს, თუ როგორ გამომივიდა.
_ ბატონო თამაზ, სამსახურის უფროსები, მართალია, ოფიციალურ კომენტარებს არ თანხმდებიან, თუმცა, პირად საუბრებში ამბობენ, რომ ისინი დამოუკიდებლად ვერ იღებენ გადაწყვეტილებებს…
_ მაშინ პირდაპირ გეტყვით, რომ არ მჯერა, ისინი ამას თუ ამბობენ. რამდენიმე დღის წინათაც ვესაუბრე ყველა სამსახურის უფროსს და პირდაპირ მოვთხოვე, რომ თუკი ვინმე უფუნქციოა მათ სამსახურებში, გამოათავისუფლონ ეს ადგილები და თანხას იქეთკენ მივმართავთ, სადაც უფრო გვჭირდება. ოფიციალური კომენტარი როგორ უნდა გააკეთონ, როცა ასეთი რამ ბუნებაში არ ხდება. პირად საუბრებს რაც შეეხება, ზოგს ბევრი ლაპარაკი შეუძლია და ზოგს _ ცოტა. 24 000 ადამიანის საუბარს ვერც გავაკონტროლებ და არც მაქვს უფლება.
_ მოდით სხვა თემაზეც გადავიდეთ… თქვენთან ვრცელი ინტერვიუ მაშინ ჩავწერეთ, როცა ახალი დანიშნული იყავით. რა შეიცვალა მას შემდეგ, რა სიახლეებით შეგიძლიათ მოიწონოთ თავი ჩოხატაურელების წინაშე?
_ ზუსტად ახლა დგება სიახლეების დრო. თავის მოწონებას არავისთვის არ ვაპირებ. უბრალოდ, მინდა რისი საშუალება და ძალაც მაქვს, მაქსიმალურად დავიხარჯო. თითქმის გადაწყვეტილია, რომ სოფელ დიდივანიდან მოხდება ფარცხმის და მთლიანად დაბა ჩოხატაურის წყალმომარაგება. მე თავად გახლდით ადგილზე კომპეტენტურ პირებთან ერთად _ არის წყლის საკმარისი მარაგი. ცალკე თემაა, თუ რატომ არ აქვს წყალი ჩოხატაურს ამდენი წელიწადია და ვინ გააკეთა ხიდისთავის პროექტი საერთოდ _ იქ არც წყლის მარაგია და, რამდენადაც ვიცი, სამუშაო დიდი ხარვეზებითაა შესრულებული. საიდანაც დაბის მომარაგება უნდა მომხდარიყო, იმ რაოდენობის წყალი ერთ სოფელსაც არ ყოფნის _ ხიდისთავს ვგულისხმობ. ამის გარდა, გახორციელდება სოფლის პროექტები, ოღონდ სხვანაირად _ საკითხი გავიარე ყველა სოფლის რწმუნებულებთან ერთად და თუკი რომელიმე სოფელს ჰყავს შესაბამისი საქმის მცოდნე ადამიანები, ისინი გააკეთებენ ამ საქმეს თავიანთ სოფელში. მაქსიმალურად იქნება სოფელი და სოფლის მოსახლეობა ამ პროექტებში ჩართული. არის სოფლები, სადაც მთლიანად აპირებენ პროექტების გაკეთებას, ზოგ სოფელს უჭირს და სხვა ძალას დავახმართ. უახლოეს მომავალში მთლიანად მოხდება დაბის ტერიტორიაზე გზების შეკეთება და გოგიბერიძის ქუჩის ასფალტირება. გეტყვით იმასაც, რომ სტიქიის შედეგად დაზარალებულებს გაეწიათ შესაბამისი მომსახურება. ერთი თვის განმავლობაში ვინც კი მოგვაწვდინა ხმა, რომ დაზარალდა, ყველას მაქსიმალურად დავეხმარეთ. ყველაზე მნიშვნელოვანი რაც გაკეთდება ჩოხატაურში, იქნება კულტურის სახლის მშენებლობა, რომელსაც რამდენი წელია ასე მოთმინებით ელოდებიან ჩოხატაურელები. უკვე ესკიზებზე ვმუშაობთ, საზოგადოებას და შესაბამის კომპეტენტურ პირებსაც ჩავრთავთ ამ ყველაფერში და შევეცდებით ძალიან ლამაზი გამოვიდეს. ასევე, მნიშვნელოვანია გორაბერეჟოულის ტექნიკუმის აღდგენაც _ ეს საკითხი შეთანხმებულია შესაბამის სამინისტროსთან და ესეც ზაფხულისთვის დაიწყება. ბოლო ორ მნიშვნელოვანი პროექტი, რომელიც ჩოხატაურში გახორციელდება, არის პირდაპირ ჩოხატაურის მაჟორიტარი დეპუტატის ბატონი თემურ ჭკუასელის დამსახურება. ის რომ არა, არც ერთი ასეთი დიდი პროექტი არ დაიძვრებოდა. და არამარტო ეს _ მის მხარდაჭერას ვგრძნობ ყოველთვის, თუკი რაიმე სამინისტროებთანაა გასარკვევი, მაქსიმალურად მეხმარება. რაც შეეხება სოფლის მეურნეობის პროგრამას, რა თქმა უნდა, იგი ხარვეზებით გახორციელდა, ისევე, როგორც ყველგან. სანამ არ იქნება საჯარო რეესტრიდან ამონაწერები, ვერავის დავავალდებულებთ, მიწა სახაზავით დაუზომოს მოსახლეობას. მოსახლეობამ თავის მხრივ, ჯერ დამალა მიწის რაოდენობა, შემდეგ კი გაზარდა. მომავალ წელს უკვე სრულყოფილად გახორციელდება ეს პროექტი. მთლიანობაში ხალხმა ძალიან დიდი სარგებელიო ნახა. იყო და არის ამინდის პრობლემაც…
ძალიან კარგად ჩატარდა 26 მაისის ღონისძიება, ძალიან ბევრი ადამიანი მოვიდა და მართლაც ზეიმის სახე მიეცა მას, დიდი სურვილი გვაქვს, ივლისის შუა რიცხვებში პრემიერი გვესტუმროს ნოდარ დუმბაძის დაბადების დღეზე. რა ვიცი, სასაუბრო ბევრია. ჩვენს ნაკლსაც კარგად ვხედავთ და ვცდილობთ, შეცდომები ნაკლები დავუშვათ. თუკი ქვეყანა მთლიანობაში არ დადგება ფეხზე, ვერც დეპუტატი, გამგებელი ან ვინმე ნებისმიერი ვერ მოაგვარებს ყველა პრობლემას. იმას კი, ვისაც ეჭვი ეპარება, რომ ეს ქვეყანა უახლოეს მომავალში იმ გზას დაადგება, რომლის ღირსია საქართველო, ვურჩევ, ეჭვები მოისროლოს და მის გაკეთებულ საქმეზე გვესაუბროს!
_ ნაკლი ახსენეთ და როგორ ფიქრობთ, რა ნაკლი გაქვთ?
_ უნაკლო ადამიანი არსებობს კი? ისეთი მძიმე მემკვიდრეობა შემხვდა, ანგელოზიც რომ ვიყო, ფრთების შრიალს დამიწუნებს ხალხი. ჩემი ნაკლია თუნდაც ის, რომ რასაც ვფიქრობ, იმას ვამბობ, ბევრი დანარჩენისგან განსხვავებით. პოლიტიკას სხვა წესები აქვს, მაგრამ ხანდახან ჩემი ნაკლი მეხმარება ადამიანების შეცნობაში. ერთი დიდი საიდუმლო უკვე გითხარით და ერთბაშად ყველაფერს ნუ მათქმევინებთ.
_ ბევრჯერ ახსენეთ ცუდი მემკვიდრეობა… ეს საზოგადოებისთვის არ არის უცხო _ “გურია ნიუსი” წლების განმავლობაში წერდა ამის შესახებ. იგივე სოფლის პროექტებზე, ხიდისთავის წყალზე… აპირებთ თუ არა, რომ ეს საკითხი შესასწავლად შესაბამის ორგანოებს გადასცეთ?
_ “გურია ნიუსი” წლების განმავლობაში წერდა ამ ყველაფრის შესახებ, მაგრამ რეაგირება არ მოჰყოლია. ეგ უკვე წინა ხელისუფლების “პლუსია”. დამერწმუნეთ იმაში, რომ ყველას ყველაფერზე მოეთხოვება პასუხი. აქ არ არის საუბარი კონკრეტულ მსუბუქ გადაცდომებზე… საქმე გვაქვს პირდაპირ კრიმინალთან და მთელ რიგ დიდ დანაშაულებთან. ყველამ უნდა აგოს პასუხი დანაშაულზე. თუკი ვინმეს დაშავება უნდა, საკუთარ ეზოში დააშავოს!
_ უფრო კონკრეტულად?
_ კონკრეტიკას საზოგადოება მომავალში იხილავს.
