_ ასე აფასებს ახლა უკვე ” საქართველოს პარტიოტთა ალიანსის” წევრი გოჩა თევდორაძე, ვიცე გუბერნატორის თანამდებობიდან და პარტია “ნაციონალური” მოძრაობიდან წამოსვლას.
გოჩა თევდორაძის სახელი არაერთხელ გაჟღერდა 2012 წლის საპარლამენტო არჩევნების შემდეგ, თუმცა არა დადებით კონტექსტში _ “ნაციონალური მოძრაობის” წევრები მას მოღალატის გვირგვინს არგებენ და აცხადებენ, რომ მან გუნდი გაწირა. გოჩა თევდორაძე კი მიიჩნევს, რომ თავად ის იყო “ნაცმოძრაობის” ყველაზე ძლიერი საყრდენი ქუთაისის ოლქში, რაზეც 2004 წლიდან მოყოლებული ყველა მოგებული არჩევნები მეტყველებს. თევდორაძე საარჩევნო შტაბის ხელმძღვანელი იყო და როგორც თავად ამბობს, ის, რომ ქუთაისი ნაციონალებისთვის ყოველთვის საუკეთესო შედეგებს დებდა, მისი დამსახურებაა.
ყოფილი ვიცე გუბერნატორი, საქართველოს პარლამენტის ორგზის მოწვევის დეპუტატია 2004-2008 წლებში და 2008-20012 წლებში. მისი გამოჩენა ქართულო პოლიტიკაში ნინო ბურჯანაძის სახელს უკავშირდება, თუმცა, მას შემდეგ, რაც ბურჯანაძე “ნაციონალურ მოძრაობას” გამოეყო, გოჩა თევდორაძე აქტიურად განაგრძობდა თანამშრომლობას მმართველ პარტიასთან; იყო პარტიის ადგილობრივი ორგანიზაციის თავმჯდომარე, რომლის ხელმძღვანელობა 2010 წელს დატოვა. მისი თქმით, არ უნდოდა ისეთ კადრებთან მუშაობა, როგორიც მაქაცარია და მისთანანი იყვნენ. როგორც ამბობს, მათთან პოლიტიკურ პასუხისმგებლობას ვერ გაიზიარებდა. თევდორაძის განცხადებით, სწორედ ასეთი კადრების დანიშვნამ მოუტანა “ნაციონალურ მოძრაობას” წაგებული 1 ოქტომბერი. თუმცა, 2012 წლის საპარლამენტო არჩევნების შემდეგ ის ნაციონალ ვახტანგ ბალავაძესთან ერთად დაინიშნა და ვიცე გუბერნატორის თანამდებობა ერგო, რომელიც რამდენიმე თვეში დატოვა და ახალ პარტიაში გადაინაცვლა, ახალი პარტია კი “საქართველოს პატრიოტთა ალიანსია” დავით თარხან-მოურავის ხელმძღვანელობით. იგივე სახელწოდების ფრაქცია შეიქმნა ქუთაისის საკრებულოში, რომელშიც ნაციონალების უმრავლესობა გადავიდა და ამით ფრაქციამ უმრავლესობა მოიპოვა.
გოჩა თევდორაძე აღნიშნავს რომ “საქართველოს პატრიოტთა ალიანსი ანგარიშგასაწევი ქუთაისში, იმდენად, რამდენადაც 2012 წლის საპარლამენტო არჩევნების შემდეგ, ამ ფრაქციამ შეძლო რადიკალურად შეეცვალა მდგომარეობა ქუთაისის ადგილობრივ თვითმმართველობაში. “გურია ნიუსი” დაინტერესდა თუ როგორ აპირებს თევდორაძე პოლიტიკური საქმიანობის გაგრძელებას და რამდენად ანგარიშ გასაწევ ძალად ითვლება პარტია “საქართველოს პატრიოტთა ალიანსი” ?
_ საკმაო ძლიერი საყრდენი ძალა იყავით “ნაციონალებისთვის”. რატომ აღარ ხართ მათთან?
_ საიმედო საყრდენი მართლაც ვიყავი მაგათთვის. იმიტომ, რომ 2003 წლის არჩევნებიც რომ ავიღოთ, რომელსაც რევოლუცია მოჰყვა, იქედან მოყოლებული _ 2003 და 2004 წლების საპრეზიდენტო და საპარლამენტო, 2006 წლის ადგილობრივი, 2008 წლის საპრეზიდენტო და საპარლამენტო , 2010 წლის ადგილობრივი არჩევნების დროს შტაბის უფროსი ვიყავი ქუთაისში და ქუთაისი ყველაზე დიდი ოლქია. ეს ქალაქი ყველაზე კარგ შედეგებს დებდა. ასე რომ, საყრდენი და დასაყრდენი ნამდვილად ვიყავი.
_ ანუ თქვენი დამსახურება იყო ის, ომ ქუთაისში ნაციონალები იმარჯვებდნენ?
_ ალბათ, შტაბის დამსახურებაც არის, თან ეს არჩევნები ისე ტარდება, რომ ცენტრალურ და ადგილობრივ საარჩევნო ოლქში არც ერთი საჩივარი არ შედის. როცა ხელჩასაჭიდი არაფერია, რომ ამას მოჰყვეს საჩივარი, ჩანს რომ ნორმალურად ვატარებდით, ჰო? მაგრამ გითხრათ, 2010 წლიდან, როცა მე პარტიიდან წამოსვლა გადავწყვიტე, უკვე განსაკუთრებით კარგად ჩანდა, რომ “ნაციონალური” მოძრაობა დაემსგავსა “მოქალაქეთა კავშირს” ამან გამოიწვია რღვევა. მაქაცარიასნაირი კადრები რომ მოიყვანეს ხელისუფლებაში, რომლებსაც ცა ქუდად არ მიაჩნდათ, დედამიწა ქალამნად და არც ადამიანის, არც ქვეყნის, არც მხარის და არც ქალაქის ბედი არ აწუხებდათ და მარტო ხუშტურებს იყვნენ აყოლილი, მაშინ გამოჩნდა, სანამდე მივიდოდნენ და მივიდნენ კიდეც _ მიიღეს 1 ოქტომბერი.
ამა ყველაფერს წინაპირობები ჰქონდა _ უსამართლობის განცდა, რომელიც ადამიანებში იყო სასამართლო ხელისუფლებასთან, პროკურატურასთან დაკავშირებით. შემდეგ ციხის კადრებმა ყველაფერი ერთიანად დააგვირგვინა და გადაწყვიტა არჩევნების ბედიც.
_ ბატონო გოჩა, თქვენ დასთანხმდით ვიცეგუბერნატორის თანამდებობას მაშინ, როცა უკვე აღარ მოგწონდათ “ნაციონალური მოძრაობა”?
_ “ნაციონალური მოძრაობა” რომ არ მომწონდა, წაგებული ომის შემდეგ მაინც წავედი სამსახურში. მაგრამ ვნახე, რომ იგივე სტილში გაგრძელდა მუშაობა. მათ ვერ გამოიტანეს დასკვნები ვერც პირველი ოქტომბრიდან და ვერც მანამდელი საქმიანობიდან. ამიტომ იქ ჩემი მოღვაწეობა იყო სულ ორთვიანი თუ სამთვიანი. დავტოვე თანამდებობა და წამოვედი. თუმცა, პარტიის თავმჯდომარის პოსტი 2010 წელს დავტოვე.
_ “ნაციონალები” ამბობენ, რომ თქვენ გუნდს უღალატეთ და გემი, რომელიც იძირებოდა, მიატოვეთ.
_ მე ჩაძირული გემი არ დამიტოვებია _ ჩაძირულ გემს დატოვებ თუ არა, ამას არანაირი მნიშვნელობა არ აქვს. როცა გემი იძირებოდა, მე ვცადე მათთან დავმდგარიყავი, მაგრამ დასკვნები ვერ გამოიტანეს. ამიტომ თავისი წილი პასუხისმგებლობა უნდა აიღონ თვითონ. ჩაძირულ გემში გინდ დარჩი, გინდ _ არა. მე დავტოვე პარტიის თავმჯდომარეობა იმიტომ, რომ იქ ისეთი ხალხი ჰყავდათ, არ შეიძლებოდა მათთან ერთად თანამშრომლობა და იმ პასუხისმგებლობის გაზიარება, რომელიც გეკისრება ადგილობრივი ორგანიზაციის ხელმძღვანელს.
_ როგორ შეიქმნა პარტია “საქართველოს პატრიოტთა ალიანსი”?
_ ჩვენს თანამოაზრეებთან ერთად როდესაც ვმსჯელობდით, რომ გავმიჯნოდით იმ ძალას რომელიც იგივე სტილით აგრძელებდა მუშაობას, გადავწყვიტეთ, რომ პარტია დაგვეფუძნებინა. შეიქმნა ფრაქცია და პარტია ამ სახელწოდებით. ჩვენ გვაქვს ადგილობრივი ორგანიზაციები წყალტუბოში, ზესტაფონში და კვლავ გრძელდება პარტიის სხვადასხვა რაიონული ორგანიზაციების დაფუძნება.
_ მიიღებთ მონაწილეობას 2014 წლის ადგილობრივი არჩევნებში?
_ რა თქმა უნდა. პარტია თანდათან ძალას იკრებს. ამის ნათელი დასტურია ის რომ, შუალედურ არჩევნებში ნაძალადევის რაიონში ჩვენი პარტიის აღმასრულებელმა მდივანმა სოსო მანჯავიძემ ხმების 13% მიიღო. ვფიქრობ ჩვენი შრომის და მუშაობის შედეგად, ანგარიშგასაწევი ძალა ვიქნებით, როგორც ადგილობრივ, ისე საპარლამენტო არჩევნებში.
_ რა პოლიტიკურ ძალა გააჩნია “საქართველოს პატრიოტთა ალიანსს”?
_ “საქართველოს პატრიოტთა ალიანსი” ის ძალაა ქუთაისში, რომელმაც შეძლო, რადიკალურად შეეცვალა სიტუაცია საკრებულოს თავმჯდომარის თუ ქალაქის მერთან მიმართებაში.
საკრებულოში 11-კაციანი ფრაქციაა, ჩვენთან არიან დამოუკიდებელი დეპუტატებიც, რომელთაც სიმპათიები გააჩნიათ ჩვენი პარტიის მიმართ. ჩვენ რეალურ ძალას წარმოვადგენთ. მაგალითად _ ფრაქცია “ქართული ოცნება” საკრებულოში 5 კაცით არის წარმოდგენილი და როდესაც მერის არჩევნები იყო, იმ დღეს ერთი წევრი არ ყავდა, ჩვენც ერთი წევრი გვაკლდა. ათნი ვიყავით ჩვენ, ოთხნი _ ისინი. მერმა მიიღო 17 ხმა. ესე იგი, არიან სხვა ადამიანებიც, რომლებთანაც გაგვაჩნია საერთო შეხედულება. ცხადია, ამ ფრაქციას ხელეწიფება ქალაქში რადიკალური ცვლილებები განახორციელოს _ ჯერჯერობით, სტრუქტურულ რეორგანიზაციებზე გვაქვს საუბარი. ერთხელ და სამუდამოდ უნდა დარეგულირდეს, რომ ქალაქის მერია არ იყოს მარტო დასაქმების ადგილი და ყვარყვარეს ციხესავით არ ჰქონდეს კარები, თუ დაკეტილია, დატეულანო. 760 თუ 780 კაცი არ უნდა იყოს მერიაში, როცა 2005 წლის მონაცემი რომ ავიღოთ, 180 კაცი მუშაობდა სულ და ესეც ბევრი იყო.
მესმის, რომ ქვეყანაში მძიმე სოციალური ფონია, ბიზნესის და ეკონომიკის განვითარება ნელი პროცესით მიდის, ამიტომ როგორმე უნდა მოვახერხოთ ბიუჯეტის გადაწყობა ისე, რომ საინვესტიციო გარემო შევქმნათ. დღეს ჩვენს მიერ გადადგმული ეს ნაბიჯი _ კადრების შემცირება, ხვალ იმდენად მტკივნეული არ უნდა იყოს. უნდა შევქნათ ისეთი გარემო, რომ ყოველწლიურად სამჯერ და ოთხჯერ მეტი ადამიანი საქმდებოდეს ქალაქში, ვიდრე ამჟამად მერიიდან გამოთავისუფლდება.
_ “საქართველოს პატრიოთა ალიანსის” განცხადებას, რომ ქუთაისის მერი იქნებოდა ის, ვისაც გადაწყვეტდა ბიძინა ივანიშვილი, საკმაოდ დიდი გამოხმაურება მოჰყვა. რა კავშირში ხართ ხელისუფლებასთან და თანამშრომლობთ თუ არა მასთან?
_ ჩვენ პარტია ბიძინა ივანიშვილს უჭერს მხარს ყველა სასიკეთო წამოწყებაში ქვეყნის საკეთილდღეოდ, საგარეო პოლიტიკაში და სხვა, თუმცა, ეს არ ნიშნავს ყველაფერში მხარდაჭერას. პარტია არის ოპოზიციური იმდენად, რამდენადაც პარტიისთვის მიუღებელია ის პოლიტიკური სპექტრი, რომელიც არის წარმოდგენილი დღეს საქართველოს პარლამენტში, თუნდაც, კოალიციის სახით _ მე არ მაქვს მხედველობაში მხოლოდ “ნაციონალური” მოძრაობა. ამის გარდა, მიუღებელია აღმასრულებელ ხელისუფლებაში გარკვეული მინისტრების კონკრეტულ საკითხებთან მიდგომა. ამის ნათელი მაგალითია ის, რომ ჩვენი პოლიტიკური ძალა გამოვიდა ბათუმში აზიზიეს სახელობის მეჩეთის მშენებლობის წინააღმდეგი. ჩვენი პოზიცია გამოვხატეთ, ასევე, სომხური ენის რეგიონულ ენად გამოცხადების თაობაზეც. ამიტომ ვამბობ _ ჩვენი პარტია არის ოპოზიციური ძალა, მაგრამ მხარს ვუჭერთ ქვეყნის პრემიერმინისტრს ყველა სასიკეთო საქმეში.
ქუთაისი არის დოტაციაზე მყოფი ქალაქი და ხელისუფლება უნდა იყოს დაინტერესებული იმით, რომ ქუთაისში მეტი ტრანსფერი შემოვიდეს. ჩვენ როცა გამოვაცხადეთ, რომ მხარს დავუჭერდით მათ მიერ მხარდაჭერილ მერს, ეს იმას არ ნიშნავდა, რაიმე სახის ზეწოლას მოვახდენდით კომისიაზე. კომისიამ მართლაც კარგად იმუშავა. ჩვენს ფრაქციას შეხვედრა ჰქონდა მერობის კანდიდატთან, მივიღეთ გარკვეული პასუხები ქუთაისის სამომავლო განვითარების გეგმებთან დაკავშირებით, გავიგეთ, როგორ აპირებს მერიის სტრუქტურებთან თანამშრომლობას. გარკვეულწილად მისმა პასუხებმა დაგვაკმაყოფილა, გაჩნდა იმედი, რომ ქუთაისის ხვალინდელი დღე უკეთესი იქნება და მხარი დავუჭირეთ მას. თუმცა, ეს არ ნიშნავს, თუ მერის ხედვა შეიცვლება, არ შესრულდება მისი დაპირებები, ვიქნებით რადიკალურები.
