_ აცხადებს რამდენიმე დღის წინ, ზუგდიდში აღმოჩენილ ვიდეოფირების საქმეზე დაკავებული ირაკლი ა-ს და რუსლან შ-ს ადვოკატი მათე ხარჭამაძე.
ადვოკატი ხვალ აპირებს თბილისის საქალაქო სასამართლოს განჩინების გასაჩივრებას, რომლითაც ბრალდებულებს წინასწარი ორთვიანი პატიმრობა შეეფარდათ.
“ეს ადამიანები ნამდვილად უდანაშაულოები არიან, არც კადრებში ჩანან, არც არსად ფიგურირებენ და არც არავინ ამბობს მათზე, რომ ისინი საქმის კურსში იყვნენ. ისეთ პირობებში და ისეთ სიტუაციებში მოხდა მათი დაკავება, რომ ყოველგვარი კანონის მოთხოვნა იქნა დარღვეული. დაკავებულებისთვის არ განუმარტავთ უფლებები, არ უთქვამთ სად მიყავდათ, რაზე იჭერდნენ, სანამ “მოდულის” შენობაში არ მიიყვანეს. მათ მხოლოდ “მოდულის” შენობაში გაიგეს, რომ ზუგდიდში აღმოჩენილ ვიდეო ჩანაწერებთან დაკავშირებით მოხდა მათი დაკავება. ესენი განცვიფრდნენ და უთხრეს, რომ კადრების გადაღებასთან და ადამიანების წამებასთან არანაირი კავშირი არ ჰქონდათ და სხვებივით ტელევიზიით გაიგეს მომხდარის შესახებ. ამის შემდეგ მათ მიმართ არანაირი შეკითხვა არ ყოფილა, არც მოწმედ დაუკითხავთ, არც ბრალდებულად, უბრალოდ, ბრალი წაუყენეს და აღმკვეთი შეუფარდეს,” _ ამბობს ადვოკატი “გურია ნიუსთან”.
მათე ხარჭამაძის მტკიცებით, 9 დაკავებულიდან ბრალდებულის სახით არც ერთი მათგანი არ დაკითხულა, ჩვენებებს კი ძირითადად მოწმეები იძლევიან, რომელთა განთქმის საფუძველზეც ხდება ყოფილი და მოქმედი სამართლადამცავების დაკავება. მოწმეთა ვინაობას და ჩვენებების შინაარსს ადვოკატი არ ასაჯაროვებს, რადგან მისი თქმით, გაუთქმელობის ხელწერილზე მოაწერა ხელი.
“ვიღაც მოწმეები საკუთარი თავის გადარჩენის მიზნით ასახელებენ სხვა ადამიანებს. მათგან მართლაც არის რამდენიმე პირი, ვინც უშუალოდ იყო შემხებლობაში ამ საზარელ საქმესთან, მაგრამ კიდევ ვიმეორებ: ჩემი დაცვის ქვეშ მყოფებს არც სამსახურეობრივად და არც სხვა გარემოებების გამო, არ ჰქონიათ შემხებლობა არც გადაღებასთან და არც წამებასთან. თუ გამოიკვეთა ამ საქმესთან დაკავშირებით მათი ბრალეულობა, კი, ბატონო, დაგვიმტკიცონ; თუ ვერ დაგვიმტკიცებენ, მაშინ დაკავებულების გათავისუფლებას მოვითხოვ.”
ადვოკატი ამბობს, რომ დაკავებულებზე ფიზიკური ზეწოლა არ ყოფილა, თუმცა იყო გადაბირების მცდელობა სამსახურში აღდგენის და დაწინაურების დაპირებით.
“ფიზიკურ შეურაცხყოფას ადგილი არ ჰქონია, მაგრამ იყო ფსიქოლოგიური ზეწოლა, იქ იყო სამსახურში აღდგენის დაპირება, ვიღაც ჭითანავას და მოქმედ თანამშრომლებს სთავაზობდნენ აღიარეთ, სხვა ადამიანებიც მიუთითეთ და დაგაბრუნებთ სამსახურებშიო. სწორედ ასე მოხვდნენ ციხეში ისეთი ადამიანები, რომლებსაც არავითარი კავშირი არ აქვს ამ საქმესთან.”
ირაკლი ა. და რუსლან შ. დაკავების დროს პოლიციაში აღარ მუშაობდნენ. ხელისუფლების შეცვლის შემდეგ სამსახურიდან ორივე დაითხოვეს.
კიდევ ერთი ბრალდებულის _ გიორგი გ-ს ადვოკატი ხვიჩა ხევსურიანი ამბობს, რომ მისი დაცვის ქვეშ მყოფი ბრალს აღიარებს, მაგრამ არა წამების ნაწილში. ადვოკატი აღმკვეთი ღონისძიების შეფარდების საკითხის გასაჩივრებას არ გეგმავს.
“ჯერჯერობით საერთო დანაშაულია წარმოდგენილი, ანუ ჯგუფია გამოკვეთილი, მაგრამ არ გარკვეულა ვინ რა ჩაიდინა კონკრეტულად. გიორგი გ-ზე არავინ ამბობს, რომ რამე ჩაიდინა ანუ ის საერთო ჯგუფის წევრია. თვითონ აღიარებს თავის დანაშაულს, რაშიც მონაწილეობდა, მაგრამ წამებას არ აღიარებს. კონკრეტულად რას აღიარებს, ამას ამას ვერ გეტყვით, რადგან გაუთქმელობაზე მაქვს ხელი მოწერილი,” _ ამბობს ხევსურიანი “გურია ნიუსთან”.
ზუგდიდში აღმოჩენილი ვიდეო ფირების საქმეზე პოლიციამ ცხრა მოქმედი და ყოფილი ძალოვანი დააკავა. თბილისის საქალაქო სასამართლომ გუშინ ყველა მათგანს წინასწარი ორთვიანი პატიმრობა შეუფარდა.
“წარდგენილი ბრალდების თანახმად, ყველა ბრალდებულს ბრალად ედება თავისუფლების უკანონო აღკვეთა, ჩადენილი ორგანიზებული ჯგუფის მიერ, სიცოცხლისა და ჯანმრთელობისათვის საშიში ძალადობით და ძალადობის გამოყენების მუქარით; გარდა ამისა, მათ ბრალად ედებათ წამება, ჩადენილი მოხელის მიერ სამსახურებრივი მდგომარეობის გამოყენებით და ორგანიზებული ჯგუფის მიერ. აღკვეთის ღონისძიების კონკრეტული სახის შერჩევისას, სასამართლომ მიიჩნია, რომ არსებობს აღკვეთის ღონისძიების გამოყენების როგორც ფორმალური, ასევე ფაქტობრივი საფუძვლები,” _ ნათქვამია სასამართლოს განჩინებაში.
აღკვეთის ღონისძიებად პატიმრობის შეფარდების დროს სასამართლომ გაითვალისწინა ჩადენილი ქმედების საზოგადოებრივი საშიშროების მაღალი ხარისხი და მიიჩნია, რომ ბრალდებულების თავისუფლებაში ყოფნის შემთხვევაში, არსებობს პროცესის მონაწილეებზე ზემოქმედებისა და მტკიცებულებების განადგურების საფრთხე.
აღნიშნულ საქმეზე წინასასამართლო სხდომა 13 აგვისტოს 12:00 საათზე თბილისის საქალაქო სასამართლოში გაიმართება.
