საკონსტიტუციო სასამართლომ, რამდენიმე დღის წინ, უცხო ქვეყნის მოქალაქეებისთვის სასოფლო-სამეურნეო მიწების შეძენაზე დადგენილი მორატორიუმი გააუქმა.
"სასამართლოს პლენუმმა 2012 წლის 26 ივნისის გადაწყვეტილებით, საქმეზე "დანიის მოქალაქე ჰეიკე ქრონქვისტი საქართველოს პარლამენტის წინააღმდეგ", ძალადაკარგულად ცნო ის ნორმა, რომელიც უცხოელებს უკრძალავდა გამხდარიყვნენ სასოფლო-სამეურნეო დანიშნულების მიწის მესაკუთრეები.
საკონსტიტუციო სასამართლოს სარჩელით მომართა ავსტრიის მოქალაქე მათიას ჰუტერმა და მოითხოვა ამ სადავო ნორმების ძალადაკარგულად ცნობა. სასამართლომ ჩათვალა, რომ სადავო ნორმას იგივე შინაარსი აქვს, რაც ნორმას, რომელიც არაკონსტიტუციოურად იქნა ცნობილი საკონსტიტუციო სასამართლოს პლენუმის 2012 წლის გადაწყვეტილებით", _ განმარტა საკონსტიტუციო სასამართლოს მრჩეველმა, გიორგი სულხანიშვილმა.
გადაწყვეტილებას ექსპერტებისა და ზოგიერთი მთავრობის წარმომადგენლის მხრიდან კრიტიკული შეფასებები მოჰყვა.
მოგვიანებით იუსტიციის მინისტრ თეა წულუკიანმა განაცხადა, რომ უცხო ქვეყნის მოქალაქეებზე მიწების გასხვისებასთან დაკავშირებით ახალი რეგულაციები ამოქმედდება.
"შევთანხმდით იმაზე, რომ საქართველოში სწორი აგრარული პოლიტიკის ჩამოყალიბების მიზნით, რომელიც ევროკავშირის აგრარულ პოლიტიკასთან იქნება შესაბამისობაში, ჩვენ გვჭირდება რეგულაციები. შევთანხმდით იმაზე, რომ მაგალითად უცხოეთში დაფუძნებული იურიდიული პირები მომავალშიც ვერ შეიძენენ საქართველოში სასოფლო-სამეურნეო კატეგორიის მიწას. თუკი უცხოელს დასჭირდება, რომ შეიძინოს საქართველოში სასოფლო-სამეურნეო მიწა, მან აქ უნდა დააარსოს იურიდიული პირი. მას უნდა ჰქონდეს მკაცრად გაწერილი საინვესტიციო გეგმა და დარგობრივ სამინისტროებს და მთავრობასაც უნდა შეუთანხმოს ის საინვესტიციო საქმიანობა, რომელსაც აპირებს. ჩეენთვის მთავარია, ინვესტიციებს ხელი შეეწყოს, რომ ის მექანიზმი, რომელსაც ჩვენ პარლამენტს შევთავაზებთ, იყოს მაქსიმალურად მოქნილი", – თქვა თეა წულუკიანმა.
ამასთან, წულუკიანის თქმით, მიმდინარეობს მსჯელობა იმაზეც, თუ რა რეჟიმს შეიძლება, დაექვემდებარონ უცხოელები, რომლებიც ჩამოდიან საქართველოში მხოლოდ იმიტომ, რომ საკუთარი მრავალშვილიანი ოჯახები გამოკვებონ ქართული მიწის დამუშავებით.
რა კონკრეტულ რეგულაციებზეა საუბარი, ამაზე "კომერსანტი" წერს და უწყებათაშორისი კომისიის წევრ ზაქარია ქუცნაშვილზე დაყრდნობით აღნიშნავს, რომ მიწის შეძენის მსურველ ინვესტორს, სოფლის მეურნეობის სფეროში მუშაობის გამოცდილება უნდა ჰქონდეს. ასევე, ფლობდეს სათანადო საინვესტიციო კაპიტალის საბანკო დოკუმენტაციას.
ამასთან, საუბარია გარკვეული დონის ბინადრობის ცენზის დაწესებაზეც, თუმცა საკითხი ჯერჯერობით მხოლოდ მოსაზრების დონეზე არსებობს.
ქუცნაშვილის განმარტებით, კომისია მიწის შემსყიდველი უცხო ქვეყნის მოქალაქეების ორ კატეგორიად დაყოფას გეგმავს. ერთი, რომელიც საქართველოში ინვესტირებისათვის, მეორე კი საცხოვრებლად ჩამოდის. გამმიჯვნელი აღნიშნულ ორ კატეგორიას შორის,მიწის ფართობი იქნება.
მისივე ცნობით, თუ საქართველოს მოქალაქეს 25 ჰექტარი მიწის ნაკვეთს გადასცემს სახელმწიფო, უცხო ქვეყნის მოქალაქეზე ბევრად ნაკლები ფართობის მიწის ნაკვეთი გასხვისდება.
როდის შეიძლება ამოქმედდეს ახალი რეგულაციები, ამ ეტაპზე უცნობია.
