ოზურგეთის მუნიციპალიტეტის ახალარჩეული საკრებულოს სხდომა, 2 აგვისტოს არის ჩანიშნული.
ამ ეტაპზე ვრცელდება ინფორმაცია, რომ საკრებულოს თავმჯდომარის კანდიდატად, "ქართული ოცნების" ოზურგეთის რაიონული ორგანიზაციის თავმჯდომარე, დავით დარჩია განიხილება.
ასევე, არ არის გამორიცხული, რომ დარჩიას კანდიდატურა დათო სიხარულიძით ჩაანაცვლონ.
კონკრეტულად ამ საკითხზე "ქართული ოცნების" ლიდერები გიორგი ვოლსკი და ზვიად კვაჭანტირაძე ჩვენთან საუბრის დროს ასეთ კომენტარებს აკეთებენ:
გიორგი ვოლსკი: ჯერ ჩვენ არ ვიცით ვინ იქნება და "გურია ნიუსში", ხომ არ გამოვაცხადებთ. მიდის განხილვები, ამ ეტაპზე ზუსტ ინფორმაციას ვერ მოგაწვდით საკრებულოს თამვჯდომარის კანდიდატებთან დაკავშირებით. ყველაფერი გახდება ცნობილი საკრებულოს სხდომაზე.
ზვიად კვაჭანტირაძე: შეგახსენებთ, რომ მეც "ქართული ოცნება" ვარ და რა თქმა უნდა, მეც დავით დარჩიას კანდიდატურას ვუჭერ მხარს. მიუხედავად იმისა, რომ დრო ბევრს უტარებს მძიმე გამოცდას, მე და დათო ვიყავით და ვრჩებით თანამებრძოლებად და ამ ბრძოლაში ჩვენ, პირადად და ჩვენს პარტიას ერთმანეთისთვის და ჩვენი მიზნებისთვის არასდროს გვიღალატია. ასე რომ, თუ მხარდაჭერაზეა საუბარი მუნიციპალიტეტის თემთა საკრებულოს თავმჯდომარის პოსტზე დათო დარჩიას ჩემი სრული მხარდაჭერა აქვს და იმედი მაქვს საკრებულო მას მხარს აუცილებლად დაუჭერს. ასევე დიდი იმედი მაქვს, რომ ახალი გამგებლის მერაბ ჭანუყვაძის, რომელსაც ასევე მთელი გულით ვუჭერდი მხარს ყოველთვის და დათო დარჩიას ხელმძღვანელობით მუნიციპალიტეტის საკრებულოს თანამშრომლობა ნაყოფიერი იქნება და ჩვენ ყველანი ერთად მივაღწევთ ოზურგეთის სოფლების სწრაფ განვითარებას.
თავად დათო დარჩია ჩვენთან სატელეფონო საუბრის დროს ამბობს, რომ არ სურს ამ საკითხზე საუბარი.
"ვიცი, რომ განიხილება ჩემი კანდიდატურა. მეტი არაფრის თქმა არ შემიძლია. 2 აგვისტოს ყველაფერი გახდება ცნობილი".
"გურია ნიუსი" ასევე დაინტერესდა თუ რა წესით ხდება საკრებულოს თავმჯდომარის არჩევა და შევიდა თუ არა რამე ცვლილება კანონმდებლობაში.
“საქართველოს ახალგაზრდა იურისტთა ასოციაციის“ ოზურგეთის ოფისის ხელმძღვანელის, თამაზ ტრაპაიძის თქმით, საქართველოს ორგანული კანონი ადგილობრივი თვითმმართველობის კოდექსის თანახმად – მუნიციპალიტეტის საკრებულოს თავმჯდომარისა და თავმჯდომარის მოადგილის (მოადგილეების) არჩევა და თანამდებობიდან გადაყენება მუნიციპალიტეტის საკრებულოს უფლებამოსილებებს განეკუთვნება.
რაც შეეხება საკრებულოს თავმჯდომარის არჩევის წესს იგი შემდეგნაირად ხდება:
1. მუნიციპალიტეტის საკრებულოს თავმჯდომარეს თავისი შემადგენლობიდან, მუნიციპალიტეტის საკრებულოს უფლებამოსილების ვადით, სიითი შემადგენლობის ნახევარზე მეტით ირჩევს მუნიციპალიტეტის საკრებულო. 2. მუნიციპალიტეტის საკრებულოს თავმჯდომარის კანდიდატურის დასახელების უფლება აქვს მუნიციპალიტეტის საკრებულოს არანაკლებ 3 წევრს. 3. მუნიციპალიტეტის საკრებულოს თავმჯდომარეობის კანდიდატების წარდგენის შემდეგ მუნიციპალიტეტის საკრებულოს სხდომის თავმჯდომარე აცხადებს კანდიდატთა სიას და კანდიდატებისაგან ითხოვს თანხმობას, კენჭი იყარონ საკრებულოს თავმჯდომარის თანამდებობაზე. სხდომის თავმჯდომარე კენჭისყრისათვის ადგენს კანდიდატთა ერთიან სიას მათი წარდგენის რიგითობის მიხედვით. 4. თუ მუნიციპალიტეტის საკრებულოს თავმჯდომარის არჩევნებში 1 კანდიდატი მონაწილეობდა და მან ვერ დააგროვა ხმების საჭირო რაოდენობა, იმართება ხელახალი არჩევნები. 5. თუ მუნიციპალიტეტის საკრებულოს თავმჯდომარის არჩევნებში 2 კანდიდატი მონაწილეობდა და ვერცერთმა ვერ დააგროვა ხმების საჭირო რაოდენობა, იმ კანდიდატს, რომელმაც ყველაზე მეტი ხმა მიიღო, ხელახლა ეყრება კენჭი. თუ მან ამ შემთხვევაშიც ვერ დააგროვა ხმების საჭირო რაოდენობა, იმართება ხელახალი არჩევნები. კენჭისყრის დროს ხმების თანაბრად გაყოფისას იმართება ხელახალი არჩევნები. 6. თუ მუნიციპალიტეტის საკრებულოს თავმჯდომარის არჩევნებში 2-ზე მეტი კანდიდატი მონაწილეობდა და ვერცერთმა ვერ დააგროვა ხმების საჭირო რაოდენობა, იმართება არჩევნების მეორე ტური იმ 2 კანდიდატს შორის, რომლებმაც ყველაზე მეტი ხმები მიიღეს. მეორე ტურში კენჭისყრის დროს ხმების თანაბრად გაყოფისას იმართება ხელახალი არჩევნები. თუ მეორე ტურში ვერცერთმა კანდიდატმა ვერ დააგროვა ხმების საჭირო რაოდენობა, იმ კანდიდატს, რომელმაც მეტი ხმა მიიღო, ხელახლა ეყრება კენჭი. თუ მან ამ შემთხვევაშიც ვერ დააგროვა ხმების საჭირო რაოდენობა, იმართება ხელახალი არჩევნები. თუ არჩევნების მეორე ტურში გასულმა კანდიდატმა მოხსნა თავისი კანდიდატურა, მის ნაცვლად კენჭი ეყრება მიღებული ხმების რაოდენობის მიხედვით მომდევნო კანდიდატს. 7. მუნიციპალიტეტის საკრებულოს თავმჯდომარეობის კანდიდატს უფლება აქვს, ყოველი კენჭისყრის წინ მოხსნას თავისი კანდიდატურა. 8. მუნიციპალიტეტის საკრებულოს თავმჯდომარეობის კანდიდატად ერთი და იმავე პირის წარდგენა შეიძლება ზედიზედ მხოლოდ ორჯერ.
