“აქ შემოსახლებულებს ყველას ძალიან გვიჭირს!”

ოზურგეთის მუნიციპალიტეტის ყოფილი საავადმყოფოს  შენობაში ათობით ოჯახი თვითნებურად შეიჭრა და ცხოვრობს. იქ მყოფი პირები "გურია ნიუსთან" საუბარში ამბობენ, რომ, როგორც მათვის გახდა ცნობილი, ამ შენობაში ადგილობრივი ხელისუფლება სოციალურად დაუცველების, უსახლკაროების და მეწყერსაშიშ ზონაში მცხოვრები ადამიანების შესახლებას აპირებს.

_ როცა ეს ამბავი გავიგეთ, ავდექით და შემოვედით. აქ მდიდარი არავინ არის და ყველანი დახმარებას ვითხოვთ. არსად არ ვაპირებთ წასვლას. ხელისუფლებისგან დახმარებას ველოდებით. გვჯერა, არ გაგვყრიან შენობიდან, _ ამბობენ საავადმყოფოს შენობაში შესახლებულები.

საავადმყოფოს პირველ სართულზე, სადაც ადრე რეანიმაციული განყოფილება იყო, ახლა ეთნიკური ბოშები ცხოვრებენ. ახალგაზრდა ქალბატონი მარენ რაისა სამ ოთახში 14 სულთან ერთად ცხოვრობს: _  მალე ცხრა შვილის დედა გავხდები.  სულ პრობლემები გვქონდა სახლთან დაკავშირებით, ქუჩაშიც გაგვითენებია. ოზურგეთში დავიბადე და ვცხოვრობ. ადგილობრივი ხელისუფლება შეგვპირდა, რომ დაგვეხმარება და ვნახოთ, რა იქნება, _ გვითხრა მარენ რაისამ.

შენობის დანარჩენ სართულებზე ოზურგეთის მუნიციპალიტეტის ქალაქის და სოფლიდან ჩამოსული ადამიანები, აგრეთვე, აჭარიდან ჩამოსული ადამიანებიც ცხოვრობენ.

სოფიკო პაპუნაშვილი: _ ამ ეტაპზე ხალხი სამუშაოდაა გასული. გვიან შემოდიან შენობაში. ვადასტურებ, რომ ჩვენით შემოვედით ამ შენობაში, მაგრამ რა გვექნა?! ძალიან მძიმე მდგომარეობაში ვცხოვრობთ _  შუქი არ არის, წყალი არ გვაქვს, ეს არის მთავარი პრობლემა. აქ ყველას გვიჭირს. დახმარება ვის არ ვთხოვეთ, მაგრამ შედეგი არ ჩანს, ჩვენი პრობლემა ისევ მოუგვარებელია. იძულებული ვიყავით აქ შემოვჭრილიყავით. სახლი არ მაქვს. 11 სული ვცხოვრობდით ორ ოთახში, სახლი კი გადაგვიხურეს, მაგრამ თავად შენობა ისეთ მდგომარეობაშია, აუცილებლად დაინგრევა.  აქ ახლა ოთხი სული გადმოვედით და ორ ოთახში ვცხოვრობთ. 

მარინა ხურციძე: _ ქალაქ ოზურგეთში გამსახურდიას ქუჩაზე ქირით ვცხოვრობდი, შემდეგ ქირის ფულს ვერ ვიხდიდი. როდესაც გავიგე,  ყოფილი საავადმყოფოს შენობაში შემოდიოდნენ, ავდექი და მეც შემოვედი. სამი სული ვცხოვრობთ. ოთხი ვიყავით, მაგრამ შარშან ერთი შვილი გარდამეცვალა. ისეთ დღეში ვართ, არ ვიცი, სად გადავუხადო წლისთავი. ძიმითში ვცხოვრობდით, მაქვს მიწის ნაკვეთი, ვინმე თუ დამეხმარება და სახლს ჩამიდგამს, დავბრუნდები ჩემს სოფელში.

მაყვალა მურვანიძე: _ ნასაკირალში, საერთო საცხოვრებელ სახლში ვცხოვრობდი ხუთი წელი. იქ ოთახები განადგურებულია და იძულებული გავხდი, დამეტოვებინა  და წამოვსულიყავი. ვის არ ვთხოვე დახმარება, მაგრამ ჯერ არაფერი ჩანს. დაბის რწმუნებულმა, შოთა ართმელაძემ დამიწერა შუამდგომლობა დახმარების თაობაზე და ვნახოთ, რა იქნება.

ნოდარ მჟავანაძე: _ სოფელ ბახვში, მეწყერსაშიშ ზონაში ვცხოვრობდით, ძალიან მძიმე მდგომარეობაში ვიყავით. დახმარებას ვითხოვთ. წყლისა და შუქის პრობლემა გვაქვს.

მაყვალა ბურკანაძე: _ მარტოხელა ქალი ვარ, ვზრდი შვილიშვილს.  ქირით ვცხოვრობდი, მაგრამ რადგან ვერ მოვახერხე ორი თვის ფულის გადახდა, წამოვედი და ახლა დროებით აქ ვარ, თუმცა, არ ვიცი, სანამდე გაგვაჩერებენ და რა მოხდება. ერთ საწოლზე ორი ადამიანი ვიძინებთ. დამეწვა სახლი, შემდეგ გარდამეცვალა მეუღლე. 12 წლის განმავლობაში არ დამიტოვებია არავინ, ყველგან დავდიოდი და ვითხოვდი დახმარებას. სოციალურ დახმარებას არ ვიღებ, არ მოხერხდა არანაირად _ რა აღმოაჩინეს ასეთი ჩემთან, ვერ გავიგე, სამსახური მე არ მაქვს და შემოსავალი. 18 წელი ვმუშაობდი ექთნად და შემდეგ გამათავისუფლეს _ 54 წლის ვიყავი და ასაკიანი ხარო, მითხრეს. ნამდვილად მჭირდება დახმარება და ეს მინდა გაიგოს ხელისუფლებამ. მასწავლებელი ნათია ლომინაძე, რომ არ მყოლოდა, ჩემი შვილიშვილი ვერ დაიწყებდა სწავლას, ისეთ პირობებში ვცხოვრობთ.

გურიის გუბერნატორი, გიორგი ჩხაიძე "გურია ნიუსთან" ამ საკითხთან დაკავშირებით კომენტარს აკეთებს:

_  ეს ადამიანები საავადმყოფოს შენობაში თვითნებურად არიან შესული _ ეს არის უკანონო ქმედება. ოზურგეთის მუნიციპალიტეტი ადგენს იმ ოჯახების სიას, რომლებიც კანონის ფარგლებში უნდა დაკმაყოფილდეს ფართით. რა თქმა უნდა, მოხდება ამ ადამიანების გამოსახლება და ოჯახების განცხადებებისა და სიის საფუძველზე შესახლება, _ გვითხრა გიორგი ჩხაიძემ.

ოზურგეთის მუნიციპალიტეტის გამგებლის მოვალეობის შემსრულებლის მოადგილე, ირაკლი სირაძე: _ როდესაც მოხდება ამ შენობის რეგისტრაცია და გადავა მუნიციპალიტეტის ან თვითმმართველი ქალაქის ბალანსზე, შევისწავლით, რა კატეგორიის ოჯახები არიან იქ შესულები. თუ იმ ადამიანებს ალტერნატიული საცხოვრებელი ფართები აქვთ, გამოსახლდებიან იქედან და დაუბრუნდებიან თავიანთ სახლებს. ვინც არის უსახლკარო, ის ადამიანები დარჩებიან შენობაში, მაგრამ სანამ ეს მოხდება, შენობა აუცილებლად უნდა დაიცალოს, რადგან ეს იყო სამედიცინო დაწესებულება  და უნდა გაიწმინდოს, გასუფთავდეს, სანიტარული ნორმები უნდა იყოს დაცული, წყალი უნდა შევიყვანოთ, შუქის პრობლემა გადავჭრათ, გაზის შეყვანაზე ვიფიქროთ, ამის შემდეგ მოხდება ხალხის შესახლება შენობაში. რეესტრში, დაახლოებით, 200 ოჯახი გვყავს.

უსახლკაროთა პრობლემა ნამდვილად არის ოზურგეთის მუნიციპალიტეტში. არიან ადამიანები, რომლებსაც არ აქვთ წასასვლელი არსად, ბევრ მათგანს ჩვენ ვუხდით ქირის ფულს და ვეხმარებით.

_ საავადმყოფოს ყოფილი შენობა ეკონომიკის სამინისტროს ბალანსზეა.  სამინისტროში თუ მიმდინარეობს ამ საკითხის განხილვა?

_ ჩვენ მოგვწერა ეკონომიკის სამინისტრომ, რომ მუნიციპალიტეტს გადმოგვცემოდა ეს შენობა. ახლა უნდა მოხდეს რეგისტრაცია, მაგრამ რეესტრმა ვერ დაარეგისტრირა, რადგან შემოსავლების სამსახურთან არის რაღაც პრობლემა, ვერ გეტყვით, ზუსტად რა არის, მაგრამ მალე მოგვარდება ყველაფერი.

_ იმყოფებოდით თუ არა საავადმყოფოს ყოფილ შენობაში და ესაუბრეთ იქ შესახლებულ ხალხს?

_ ჩვენ ვიყავით საავადმყოფოში, ვისაუბრეთ მოქალაქეებს, ავუხსენით, რა მდგომარეობა არის ახლა და რა მოხდება შემდეგ. ჩვენც გვინდა დავეხმაროთ ამ ადამიანებს და აუცილებლად მოვაგვარებთ ამ საკითხს.