ვინ არის “მასკოტი გიო” და რატომ შეიცვალა ტურიზმის სიმბოლო “ქართული ღვინო”?!

"ტურიზმის ეროვნული ადმინისტრაციის" გადაწყვეტილებით,  ქართული ტურიზმის მთავარი საბრენდო ნიშანი – "ქართული ღვინო",  "მასკოტი გიომ"  ჩაანაცვლა.

ადმინისტრაციის განმარტებით, ტურისტებისთვის ინფორმაციის მიწოდება  "მასკოტის"  ტიპაჟის მეშვეობით, პრაქტიკულ საშუალებადაა მიჩნეული. მისი სახასიათო,  ვიზუალური მხარე მნახველს, ინფორმაციის აღქმას, დამახსოვრებას უადვილებს და ახალისებს.

"ტურიზმის ეროვნული ადმინისტრაციის" თქმით, პირველ ეტაპზე "მასკოტის" ვიზუალი შეიქმნა, რამდენიმე მოქმედებით და აქსესუარით. საქართველოს ცხრავე რეგიონში, ისევე როგორც აჭარის ავტონომიური რესპუბლიკაში, გამოყენებული უნდა იყოს დამახასიათებელი სამოსი,  ან აქსესუარი (ქუდი, ჟილეტი და სხვა).

ასევე, მიმართულებების დამახასიათებელი აქტივობის აქსესუარით (თხილამურით, სნოუბორდით, მარხილით, ველოსიპედით ანკესით, ნავით, ზურგჩანთით, მეკლდეურის აქსესუარით, სპელო აქსესუარით -თავზე ფანრით, დურბინდით და სხვა). პერსონაჟ "მასკოტის" დაიტანენ  საინფორმაციო დაფებზე, რომლებიც განთავსდება სასაზღვრო პუნქტებთან, ქალაქებში, დაბებსა და სოფლებში არსებულ ტურისტების მიერ მონახულებად, ყველა ადგილთან, ისტორიულ და კულტურულ ძეგლებთან, პარკებსა და დასასვენებელ ტერიტორიებზე.

ვინაიდან აღნიშნული დაფები უნდა განთავსდეს ყველანაირ ატრაქციასთან,  საჭიროა "მასკოტის" თხრობის მანერის განსაზღვრა. 

პირველ ეტაპზე  შერჩეული "მასკოტის" ესკიზური ნახატი შეიქმნა, საქართველოს მაიდენტიფიცირებელი და ასევე ტურისტული აქტივობების ამსახველი აქსესუარების გამოყენებით.

მთავარი პერსონაჟი მოძრავი, მეტყველი სახით; პერსონაჟი ციგით; პერსონაჟი თხილამურით; პერსონაჟი ხევსურეთში; პერსონაჟი თუშეთში; პერსონაჟი სვანეთში; პერსონაჟი აჭარაში; პერსონაჟი რაჭაში; პერსონაჟი კახეთში; პერსონაჟი იმერეთში; პერსონაჟი ალპინისტი; პერსონაჟი მეთევზე; პერსონაჟი მოჯომარდე; პერსონაჟი წყაროსთან.

რამდენად მომგებიანი იქნება ქართულ ტურიზმის პოპულარიზაციისთვის ახალი მარკეტინგული ხერხი, რომლის სიმბოლო "მასკოტი გიოა", ამას "გურია ნიუსთან" ტურიზმის დეპარტამენტის ყოფილი ხელმძღვანელი, მაია სიდამონიძე განმარტავს:

"ვფიქრობ, რომ სანამ რაიმე ბრენდს გამოიგონებ, მანამდე ამისთვის დიდი კვლევის ჩატარებაა საჭირო. რებრენდინგის დროს, პირველ რიგში, მნიშვნელოვანია, კვლევის გაკეთება. მეორეს მხრივ,  რა შემუშავდება, რა არის ქვეყნის მესიჯი, რა ტიპის კომუნიკაცია შედგება.  თუნდაც, რა უნდა გააკეთო ამ ტიპის ბარათით, რა დანიშნულება აქვს მას და ა.შ.  თუ ეს "მასკოტი  გიო"   ქვეყნის სტუმართმოყვარეობის სიმბოლოა, არ ვიცი,  ეს შეიძლება იყოს კარგიც და ცუდიც. ამ ყველაფერს  კვლევა უნდა. კონკრეტული სამუშაო ჯგუფის შექმნა, სადაც სხვადასხვა ტიპის მარკეტინგული კომპანიები,  ექსპერტები  და კვლევითი ორგანიზაციები იქნება ჩართული. ეჭვი მაქვს,  ეს არ გაკეთებულა. კარგი იქნება, მერე მაინც გაკეთდეს, დაიტესტოს, რამდენად კარგად მუშაობს და რამდენად ადეკვატურად იღებენ ტურისტები ამ პერსონაჟს.

საინტერესოა,  თუნდაც პერსონაჟი. რატომ ბიჭი და არა გოგონა? რატომ ადამიანი და არა ცხოველი? სხვა ქვეყნებში ასეთი ტიპის ლოგოებზე კვლევა მიმდინარეობს და მხოლოდ ამის შემდეგ ხდება პერსონაჟის გამოგონება.  გამიჩნდა კითხვა, როგორ უნდა მოახდინოს ამ პერსონაჟმა ადგილობრივ და საერთაშორისო ტურისტებზე  სხვადასხვა ტურისტული სანახაობების. რა უნდა ქნას?  ჯერჯერობით, აეროპორტში არ მინახავს, "მასკოტი გიო" რომ მხვდებოდეს. არანაირი ტურისტული დანიშნულების ადგილას. სად არის "მასკოტი გიო"?  ჯერ ესაა საკითხავი."

_ რამდენად მომგებიანი იქნება ქართული ტურიზმის განვითარებისთვის ახალი სავიზიტო ბარათი – "მასკოტი გიო"?

_ თუ ისინი ამ პროექტს მასშტაბურად გაუკეთებენ იმპლიმენტაციას, დაგვხვდება ყველგან და  ასე ვთქვათ, იქნება სტუმართმოყვარე "მასკოტი გიო," მაშინ  შეიძლება ადამიანს ის დაამახსოვრდეს. აი, დღეს,  "მასკოტი გიოს" ვერავინ აღიქვამს, რადგან არავის არსად ხვდება, არც კახეთში, არც აჭარის რეგიონში, სადაც ტურისტული სეზონის პიკია. არსად მინახავს "მასკოტი გიო".   სადღაც სურათზე დადეს და თავიანთ დახურულ ღონისძიებებზე დადის ეს პერსონაჟი.  წესით, აეროპორტში და საინფორმაციო ცენტრებში უნდა ყოფილიყო, მაგრამ არ არის!  სად არის?  არ არის. გვიმალავენ? (იცინის) გამოაჩინონ.

რატომ გახდა  ახალი ტურისტული ლოგოს,  "მასკოტიო გიო",  შექმნა საჭირო და რა სარგებელს მოუტანს იგი ქართულ ტურიზმის განვითარებას, ამასთან დაკავშირებით "გურია ნიუსი" ტურიზმის ეროვნული ადმინისტრაციის ხელმძღვანელს, გიორგი სიგუას დაუკავშირდა. თუმცა, სიგუამ გვითხრა, რომ იგი სატელეფონო კომენტარს არ იძლევა და ამისთვის მასთან ოფისში უნდა მივიდეთ, ან კითხვები ელექტრონული ფოსტის საშუალებით  გავუგზავნოთ.  

როდესაც  სიგუას ვკითხეთ – თუ ჟურნალისტი იმყოფება მაღალმთიან რეგიონში – მესტიაში, აჭარაში, ან რაჭაში, სადაც არ აქვს ინტერნეტი და არ შეუძლია თბილისში, მის ოფისში მისვლა, მაშინ რა უნდა ქნას ჟურნალისტმა – ასე გვიპასუხა: "ინტერნეტი არ არის?! არ ვიცი, მე არ ვიძლევი სატელეფონო კომენტარს" ( გიორგი სიგუას შევახსენებთ, რომ იგი ეკონომიკის სამინისტროს დაქვემდებარებული ერთ-ერთი დეპარტამენტის ხელმძღვანელია, ანუ საჯარო მოხელეა და პირდაპირი ვალდებულება აკისრია, საქართველოს ნებისმიერ მოქალაქეს  ყველანაირ სიტუაციაში გასცეს პასუხი. "გურია ნიუსი").

"გურია ნიუსი" ახალი ქართული ტურისტული ლოგოს,  "მასკოტიო გიო",  შესახებ ისევ  "ტურიზმის ეროვნულ  ადმინისტრაციას" დაუკავშირდა.

_ "ტურიზმის ეროვნული ადმინისტრაციის" გადაწყვეტილებით, "ქართული ღვინის" ნაცვლად ტურიზმის სიმბოლო  "მასკოტი გიო" გახდა.  რატომ?

_ საქართველოს,  როგორც  ტურისტული ქვეყნის ლოგოდ, გამოიყენება ადმინისტრაციის ლოგო. ღვინო არ არის საქართველოს ლოგო და სიმბოლო, არამედ იყო და არის საქართველოს ერთ-ერთი წამყვანი ტურისტული პროდუქტი. არც "მასკოტი" გახდება ქვეყნის სიმბოლო, ის არის  ერთ-ერთი მარკეტინგული ხერხი, რომელიც  ტურისტული ადგილების პოპულარიზაციისათვის გამოიყენება, როგორც შიდა, ასევე – საერთაშორისო ბაზარზე.

შეგახსენებთ, რომ "ტურიზმის ეროვნული დეპარტამენტის" ამ კომენტარამდე გიორგი სიგუამ  განაცხადა, რომ "მასკოტი გიო"  ქართული ტურიზმის მთავარი საბრენდო ნიშანი, ლოგო და სავიზიტო ბარათი იქნება.

"გახსნის ღონისძიებები ჩატარდება სხვადასხვა ლოკაციის ადგილას. ბათუმში საწყალოსნო, საპარაშუტო და სხვადასხვა სახალისო აქტივობები იქნება. რაჭაში მოეწყობა ორდღიანი ლაშქრობა, ტბაზე კი, წყლის თხილამურებით შეჯიბრებები, ბორჯომის პარკში იქნება კოსტუმირებული წარმოდგენა, ქუთაისში – ყვავილების ფესტივალი, კონცერტი, ბოდიარტი და სხვა ღონისძიებები. ყველაფერი ამის დაგვირგვინება მოხდება თბილისში, სადაც  ლისის ტბაზე იქნება გრანდიოზული ღონისძიება. იქ იქნება წარმოდგენილი ყველა პროდუქტი, რაც შევქმენით, მათ შორის იქნება პრეზენტაცია მთავარი საბრენდო ნიშნის, "მასკოტი გიო", რომელიც იქნება ლოგო, სავიზიტო ბარათი და ყველა ტურისტის თანამგზავრი საინფორმაციო დაფებიდან."

_ რის საფუძველზე შეირჩა "მასკოტი გიო" გამარჯვებულად?

_ სპეციალურმა კომისიამ განიხილა რამდენიმე კომპანიის შემოთავაზება და საბოლოოდ შეირჩა ეს კონკრეტული  გამოსახულება.

_ რამდენმა კომპანიამ  მიიღო კონკურსში მონაწილეობა?

_ ხუთმა კომპანიამ გამოთქვა სურვილი, მონაწილეობა მიეღო "მასკოტის"  შექმნაში

_  რა თანხა დაჯდა "მასკოტი გიო"-ს შექმნა და ვინ არის მისი პროტოტიპი?

"მასკოტის" პროტოტიპი არ ჰყავს.  მისი შექმნა დაჯდა 5 000 ლარი,  არა მხოლოდ ვიზუალის, არამედ 20-მდე ნახატის და ტიპაჟის შექმნა.