ლანჩხუთის მუნიციპალიტეტის საკრებულოს რიგგარეშე სხდომის შემდეგ, ცნობილი გახდა კომისიებისა და ფრაქციების ახალი თავმჯდომარეებისა და წევრების ვინაობა. ყველაზე დიდი ვნებათაღელვა საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარის არჩევას მოჰყვა _ აქ ორი კანდიდატი დაუპირისპირდა ერთმანეთს: რომან ბიწაძე "ქართული ოცნებიდან" და გიორგი გოგუაძე "ერთიანი ნაციონალური მოძრაობიდან".
ფარულ კენჭისყრამდე მედიისთვის ცნობილი გახდა, რომ ლანჩხუთის მუნიციპალიტეტის ყოფილი გამგებლის კანდიდატურას მხარს "ქართული ოცნების" წევრებიც უჭერდნენ. ეს ხმის დათვლის პროცედურის დროს დადასტურდა, როდესაც მან 13 ხმა მიიღო, მისმა კონკურენტმა კი _ 16 ხმა. ასე რომ, სამანდატო, საპროცედურო, იურიდიულ საკითხთა და ეთიკის კომისიის თავმჯდომარე რომან ბიწაძე გახდა. ეს ფაქტი მაშინვე გააპროტესტა გიორგი გოგუაძემ და სხდომათა დარბაზი დატოვა: "ჩრდილოეთ კორეაში გამოაცხადეს, რომ ისინი მსოფლიო ჩემპიონები გახდნენ ფეხბურთში. არ მეგონა, ჩრდილოეთ კორეა თუ იქნებოდა ლანჩხუთი", _ განაცხადა გოგუაძემ დარბაზის დატოვების შემდეგ.
გოგუაძის თანაგუნდელმა კახა ასკურავამ სოციალურ ქსელში ასეთი კომენტარი გაავრცელა: "ლანჩხუთის მუნიციპალიტეტის საკრებულოში თანამდებობათა 100% -დან 100-ვე "ქართულმა ოცნებამ" დაიკავა. აქ არაფერია გასაკვირი, რომ არა ერთი გარემოება _ ნუ გამოდიხარ და ნუ მიმტკიცებ ყელმოღერებული, რომ არა "ქართული ოცნება", საქართველოში დემოკრატია სულს ღაფავდა, რომ დღე და ღამე ხალხზე ზრუნვაში ათენ-აღამებ… და მთავარი, ამ თითქმის ორი წლის განმავლობაში, ჯერჯერობით, მხოლოდ პრემიების, ფეშენებელური ავტომობილების, სკამების გადანაწილების და ლაპარაკის მეტი ვერაფერი ვნახეთ".
_ ჩემთვის წინასწარ იყო ცნობილი, რომ კოალიციის რამდენიმე წევრი გოგუაძის მხარდაჭერას აპირებდა, მაგრამ ამას თუ გაბედავდნენ, არ მეგონა, _ თქვა რომან ბიწაძემ.
ამის შემდეგ საკრებულოს სხდომა მშვიდ გარემოში წარიმართა _ დანარჩენი კომისიის თავმჯდომარეობის კანდიდატებს კონკურენტები არ ჰყავდათ.
საკრებულომ ალექსანდრე სარიშვილი ერთხმად აირჩია საფინანსო-საბიუჯეტო კომისიის თავმჯდომარედ; სოციალურ საკითხთა, განათლების, კულტურისა და ახალგაზრდულ საქმეთა კომისიის თავმჯდომარე ია ჩხაიძე გახდა; საკრებულოს სივრცით-ტერიტორიული დაგეგმარების და ინფრასტრუქტურის კომისიას ბესიკ ტაბიძე უხელმძღვანელებს; ეკონომიკის, ქონების მართვისა და ბუნებრივი რესურსების საკითხთა კომისიის თავმჯდომარე გიორგი ჩახვაძე იქნება.
კომისიის თავმჯდომარეების არჩევის შემდეგ, ფრაქციების თავმჯდომარეების და წევრების ვინაობა გახდა ცნობილი: "ქართული ოცნება-დემოკრატიული საქართველო": თავმჯდომარე _ კახა ურუშაძე, მოადგილე _ თეიმურაზ მარშანიშვილი; მდივანი _ ია ჩხაიძე; წევრები _ ბესიკ ტაბიძე, ალექსანდრე სარიშვილი, გიორგი ხელაძე, დავით ჩხარტიშვილი, ელენე ნაჭყებია, თეიმურაზ ალექსაია; "ქართული ოცნება" – "კონსერვატორები": თავმჯდომარე _ ალექსანდრე მახათაძე, წევრები _ იოსებ სარჯველაძე, გელა კილაძე; "დავით თარხან-მოურავი საქართველოს პატრიოტთა ალიანსი": თავმჯდომარე _ ემზარ თევდორაძე; წევრები _ დარეჯან ბურჭულაძე, ომარ გოგიჩაიშვილი; "თავისუფალი-დემოკრატები": თავმჯდომარე _ ელგუჯა ჩხაიძე, წევრები _ გიორგი ჩახვაძე; ელისო ჭიჭინაძე; "მაჟორიტარები": თავმჯდომარე _ ჯუმბერ ბლაგიძე; წევრები _ ევგენი ჩიჩუა, გიორგი მორჩილაძე.
ჩვენი ინფორმაციით, საკრებულოში ფრაქციის შექმნას აპირებენ "ნაციონალური მოძრაობის" წარმომადგენლები.
