საქართველოს ტურიზმის ეროვნული ადმინისტრაციის ხელმძღვანელი გიორგი სიგუა, რომელსაც საკმაოდ მნიშვნელოვანი სფერო აბარია, ბოლო დროს ხმაურიანი განცხადებებით გამოირჩევა. გამონაკლისი არც "გურია ნიუსთან" საუბარი აღმოჩნდა. ჩვენს კითხვას _ არის თუ არა ბახმაროში ნამყოფი და რა გეგმები აქვს კურორტთან მიმართებაში, ასე უპასუხა:
_ ბახმაროში კი ვარ ნამყოფი, მაგრამ ბახმაროზე მაშინ ვისაუბროთ, როცა ამის დრო მექნება. მანამდე კი მოეშვით არასწორი ინფორმაციის გავრცელებას, _ გვითხრა და ტელეფონი გაგვითიშა.
როგორც გავარკვიეთ, სიგუა "გურია ნიუსის“ მიერ გავრცელებულმა ინფორმაციამ გააღიზიანა, რომლიც სანდო წყაროზე დაყრდნობით მომზადდა და რომლის თანახმადაც იგი თანამდებობიდან გაათავისუფლეს.
_ ჩემთვის არ დაგირეკავთ და ასეთ ინფორმაცის რატომ ავრცელებთ?
_ დაგირეკეს ბატონო გიორგი, თანაც რამდენჯერმე. თუმცა, ჩვენთვის მიუწვდომელი აღმოჩნდით.
_ ტყუილია.
_ ერთი კვირის წინაც ვცდილობდით თქვენთან დაკავშირებას, თუმცა უშედეგოდ. ფეისბუქზეც კი მოგწერეთ.
_ ტყუილია.
_ როდესაც ბახმაროს შესახებ მასალას ვამზადებდით, თქვენთანაც დავრეკეთ, ცხელ ხაზზეც და როგორც გითხარით პირადადაც მოგწერეთ.
_ ახლა გადავამოწმე და თქვენგან არაფერი მომსვლია. ალბათ სხვას გაუგზავნეთ.
_ როგორც ჩანს კარგად ვერ ამოწმებთ. ის სტატიაც გამოგიგზავნეთ, რომელიც კურორტ ბახმაროს ეხებოდა და თქვენი მოსაზრებები გვაინტერესებდა....
_ არაფერი მოსულა, _ მეტისმეტად კატეგორიულად გვიმტკიცებდა სიგუა, რომელმაც, როგორც ზემოთ აღვნიშნეთ ბახმაროს თემაზე ჩვენთან საუბარი "მოუცლელობის მიზეზით“ არ ისურვა.
არადა, ეს თემა რომ კარგად იცის და სტატიაც რომ წაკითხული აქვს, ამას ფეისბუქის მესინჯერიც მოწმობს.
