“სადაც არ უნდა ვიყო _ ქუჩაში თუ მარსზე, ბრძოლას გავაგრძელებ რეჟიმის წინააღმდეგ”

"ერთიანი ნაციონალური მოძრაობის" ლანჩხუთის რაიონული ორგანიზაციის თავმჯდომარე და საკრებულოს დეპუტატი კახაბერ ასკურავა ლანჩხუთის  რაიონულ პოლიციის სამმართველოში პარასკევს, 1 აგვისტოს დაკითხეს. ამავე დღეს, მას სისხლის სამართლის კოდექსის 125-ე მუხლის პირველი ნაწილით ბრალი უკვე წარედგინა _ ასკურავას ბრალი ედება ლანჩხუთის მუნიციპალიტეტის საკრებულოს საპროცედურო კომისიის თავმჯდომარის და დეპუტატის რომან ბიწაძის და ლანჩხუთის ადგილობრივი მცხოვრების ლილი ებრალიძის ფიზიკურ შეურაცხყოფაში.

ვრცელდებოდა ინფორმაციას, რომ ასკურავას დაკითხვის დროს დააკავებდნენ.

კახაბერ ასკურავამ დაკითხვის შემდეგ მედიის წარმომადგენლებთან კომენტარი გააკეთა:

_ "ქართული ოცნების" მთავარი მოტივი არის ჩემი, როგორც დეპუტატის უფლებამოსილების შეწყვეტა. მინდა ყველას გასაგონად ვთქვა: აუცილებლად გავაგრძელებ სამართლებრივ ბრძოლას. აქვე პირობას ვდებ, სადაც არ უნდა ვიყო – საკრებულოში, ოფისში, ქუჩაში თუ მარსზე, ბრძოლას გავაგრძელებ არსებული რეჟიმის წინააღმდეგ.

იმ დროს, როცა საქართველოს პროკურატურაში (ბადაშვილის უწყებაში) ტომებად ალაგია "ნაციონალური მოძრაობის" წევრების მიმართ ფიზიკური, სიტყვიერი თუ სხვა ტიპის, მათ შორის საქართველოს პარლამენტარების წინააღმდეგ გახორციელებული შეურაცხყოფის გამოუძიებელი საქმეები, მე დღეს ვიდეოკამერის წინ (ჩვენს მიერ მოპოვებული ინფორმაციით, ოპერატორი დავით ნაცვალაძე  აჭარიდან ჩამოიყვანეს და ის ერთ დროს "რეალ ტვ"-ის ოპერატორი  იყო. ავტ.) ბრალი წამიყენეს 125 მუხლის პირველი ნაწილით, რასაც პირდაპირი პოლიტიკური მიზანი აქვს, რათა შემიწყდეს საკრებულოს წევრის უფლებამოსილება და ლანჩხუთის საკრებულოში არ ისმოდეს "ნაციონალური მოძრაობის" ხმა, რომელიც არა "ქართულმა ოცნებამ", არამედ ამომრჩეველმა მომანიჭა.

სისხლის უკანასკნელ წვეთამდე ვიბრძოლებ სიმართლის დასამტკიცებლად და სამართლებრივ ბრძოლას სასამართლოში გავაგრძელებ. იმედი მაქვს, ქართული მართლმსაჯულება გაუძლებს პროკურატურის ზეწოლას და იხელმძღვანელებს მხოლოდ ფაქტებით და არა ისე, როგორც ეს დღევანდელ ხელისუფლებას სურს, _ თქვა კახაბერ ასკურავამ.

ნიკოლოზ ათუნაშვილი, კახაბერ ასკურავას ადვოკატი: _ სისხლის სამართლის კოდექსის 125-ე მუხლის პირველი ნაწილი  ითვალისწინებს ჯარიმას, საზოგადოებისთვის სასარგებლო შრომას და ა. შ.

სისხლის სამართლის საქმეს ამ ეტაპზე  სრულყოფილად არ ვიცნობთ, დღეს (კომენტარი ჩაწერილია 1 აგვისტოს. ავტ) გადმოგვცემენ მასალების ქსეროასლს. გავიგეთ მხოლოდ ის და ვიცით, რომ დაზარალებული არიან რომან ბიწაძე და ლილი ებრალიძე. მათი განცხადებით, კახაბერ ასკურავამ მიაყენა შეურაცხყოფა. საერთოდ, ბრალის წაყენება ხდება დასაბუთებული ვარაუდის საფუძველზე. მოცემულ შემთხვევაში, საქმეში არსებული მასალები არ იძლევა საფუძველს დასაბუთებული ვარაუდისთვის, რომ კახაბერ ასკურავამ, სავარაუდოდ, ჩაიდინა რაიმე დანაშაული. ასკურავას თქმით, ერთ-ერთი დაზარალებული ამბობდა, რომ საბოლოოდ უნდა დასრულდეს "ნაცმოძრაობის" პერიოდი. აქედან გამომდინარე, ჩნდება შთაბეჭდილება, კახაბერ ასკურავას, როგორც "ნაცმოძრაობის" ლანჩხუთის რაიონული ორგანიზაციის თავმჯდომარის და საკრებულოს დეპუტატის მიმართ პოლიტიკურ დევნას აქვს ადგილი,  _ თქვა ნიკოლოზ ათუნაშვილმა.

თუ კახაბერ ასკურავას მიმართ სასამართლომ გამამტყუნებელი განაჩენი გამოიტანა, ამ შემთხვევაში მას შეუწყდება დეპუტატის უფლებამოსილება.

ასკურავას ადვოკატი ამ საკითხთან დაკავშირებით შემდეგ კომენტარს აკეთებს:

_ ჩვენ მასალების გაცნობის შემდეგ მოვიპოვებთ გამამართლებელ მტკიცებულებებს. იმ დროს იქ იმყოფებოდა რამდენიმე ადამიანი, რომლებიც სიმართლეს იტყვიან და რეალურად მოჰყვებიან, რა მოხდა. დავკითხავთ ამ პირებს, მასალებს კი წარვადგენთ პროკურატურაში და სასამართლოში. იმედს გამოვთქვამთ, რომ გამოძიება და სასამართლო დარწმუნდება კახაბერ ასკურავას უდანაშაულობაში.

საბოლოოდ, ოზურგეთის რაიონულმა სასამართლომ, "ერთიანი ნაციონალური მოძრაობის" ლანჩხუთის რაიონული ორგანიზაციის თავმჯდომარეს და ლანჩხუთის საკრებულოს დეპუტატს კახაბერ ასკურავას, გირაოს სახით 2 000 ლარის გადახდა დააკისრა.

ოზურგეთის რაიონული სასამართლოსთან იმყოფებოდნენ "ნაცმოძრაობის" წევრები. ერთ-ერთი მათგანის _ ოთარ რევიშვილის თქმით, ის, რაც დღეს ხდება კახაბერ ასკურავას წინააღმდეგ, არის პოლიტიკური თამაშის ნაწილი: "ეს არის სამარცხვინო ფაქტი და დღევანდელი ხელისუფლების პირდაპირი დაკვეთა, რათა გაანადგურონ "ნაცმოძრაობა", მაგრამ ეს არ მოხდება", _ გვითხრა ოთარ რევიშვილმა.