2 აგვისტოს, გურიის გუბერნიის სააქტო დარბაზში, ოზურგეთის თვითმმართველი ქალაქის საკრებულოს სხდომა გაიმართა. უხუცესმა წევრმა ნანული ორაგველიძემ დეპუტატებს ის 22 საკითხი გააცნო, რომლის განხილვა და დამტკიცება დეპუტატებმა ოთხ საათში მოახერხეს.
საკრებულოს თავმჯდომარე გელა კობალაძე გახდა, რომელმაც 11 ხმა მიიღო. მისი კონკურენტი დამოუკიდებელი დეპუტატი ლევან მგელაძე იყო. რაც შეეხება თავმჯდომარის მოადგილის არჩევნებს, აქ მხოლოდ ერთი კანდიდატი დასახელდა და ეს ადგილი ნინო გოგუაძემ დაიკავა.
დიდი ხმაური მოჰყვა საკრებულოს რეგლამენტის დამტკიცებას. დეპუტატების ერთი ნაწილი ამტკიცებდა, რომ რეგლამენტის წაკითხვა აუცილებლად უნდა მომხდარიყო და ასევე წინასწარ უნდა მიეწოდებინათ რეგლამენტის პროექტი დეპუტატებისთვის. საბოლოოდ, რეგლამენტი დეპუტატების უმრავლესობამ წაკითხვის გარეშე დაამტკიცა.
_ ქალაქ ოზურგეთის მუნიციპალიტეტის საკრებულოს რეგლამენტის დოკუმენტი წინასწარ უნდა გვქონოდა დეპუტატებს, რათა გავცნობოდით და მიგვეღო გადაწყვეტილება საჭირო იყო თუ არა ცვლილებების შეტანა. ვინაიდან ეს ასე მოხდა, მე ვაპირებ ამ საკითხის გასაჩივრებას სასამართლოში, _ გვითხრა "ნინო ბურჯანაძე – ერთიანი ოპოზიციის" დეპუტატმა თამარ ნადირიძემ.
ახალარჩეულ საკრებულოში, ამ ეტაპზე, ორი ფრაქცია შეიქმნა: "ქართული ოცნება – თავისუფალი საქართველო", რომლის თავმჯდომარე თემურ სალუქვაძე გახდა; ფრაქცია "პატრიოტთა ალიანსის" თავმჯდომარე კი ნანული ორაგველიძეა.
საკრებულოს სხდომაზე ასევე მოხდა კომისიის თავმჯდომარეების არჩევა.
საკრებულოს სამანდატო, საპროცედურო საკითხთა და ეთიკის კომისიის თავმჯდომარის პოსტი "საქართველოს პატრიოტთა ალიანსის" გურიის კოორდინატორმა გოჩა ძიმისტარაშვილმა; საფინანსო-საბიუჯეტო კომისიის თავმჯდომარის _ ანასეულის დამოუკიდებელმა დეპუტატმა ლავრენტი ბიგვავამ; სივრცით -ტერიტორიული დაგეგმარებისა და ინფრასტრუქტურის კომისიის თავმჯდომარის _ ლევან თოიძემ; ქონების მართვისა და ბუნებრივი რესურსების საკითხების კომისიის თავმჯდომარის _ მედეა მახარობლიძემ; სოციალურ საკითხთა კომისიის თავმჯდომარის _ ნინო ტაბატაძემ ჩაიბარეს.
საკრებულოს სხდომას ესწრებოდნენ შეზღუდული შესაძლებლობების მქონე პირთა გურიის ცენტრის ბენეფიციარები.
_ პირველად ვესწრები საკრებულოს სხდომას და ნამდვილად არ ვიცოდი თუ შეიძლებოდა ჩემი დასწრება და თუ მქონდა ამის უფლება. არასამთავრობო ორგანიზაცია "პარტნიორობა უფლებებისთვის" და "შეზღუდული შესაძლებლობების მქონე პირთა გურიის რეგიონის ცენტრის" წევრი და ბენეფიციარი ვარ. მინდა დავესწრო საკრებულოს სხდომებს და გავარკვიო, რა პროგრამების დამტკიცებას აპირებენ 2015 წლის ბიუჯეტში შეზღუდული შესაძლებლობების მქონე პირებისთვის, – გვითხრა თამუნა ლურსმანაშვილმა.
