სოფელი ასკანა ქალაქ ოზურგეთის ცენტრიდან 22 კილომეტრით არის დაშორებული. ასკანის თემში სამი სოფელი _ მაღალი ეწერი, დაბალი ეწერი და მზიანი შედის.
როგორც ოზურგეთის მუნიციპალიტეტის ბევრ სოფელში, აქაც წყალთან დაკავშირებული პრობლემები წლების მანძილზე აწუხებს მოსახლეობას.
ასკანაში წყლის სისტემის რეაბილიტაციასთან დაკავშირებით ახალი პროექტის გახორციელება ორი თვის წინ დაიწყო. მისი ღირებულება მილიონ ორასი ათას ლარს შეადგენს. იგი გათვლილია 800 ოჯახზე და 2014 წლის 1 დეკემბერს უნდა დასრულდეს.
ტენდერი წყლის სისტემის რეაბილიტაციასთან დაკავშირებით მუნიციპალიტეტის გამგეობამ გამოაცხადა, რომელიც, ასევე, არის სამუშაოების დამკვეთი და მის შესრულებაზე პასუხისმგებელი.
პროექტის გახორციელებას მონიტორინგს ინფრასტრუქტურის სამსახური უწევს. ცენტრალური მაგისტრალი, სადაც უნდა ჩაიწყოს წყლის მილები, 6 კილომეტრია, შიდა ქსელი _ 15 კილომეტრი, მთლიანი ქსელი კი 25 კილომეტრია.
ასკანაში წყლის სისტემის რეაბილიტაციასთან დაკავშირებული სამუშაოები ერთი კვირით შეჩერებული იყო. "გურია ნიუსის" წყაროს ინფორმაციით, ეს სამუშაოები არაკეთილსინდისიერად ხორციელდებოდა _ არხში, მილებთან ერთად, არ იყო ქვიშის "ბალიში", რასაც პროექტი ითვალისწინებდა და ქვიშის მაგივრად ქვა-ღორღი იყო ჩაყრილი. როგორც კომპეტენტურმა პირებმა გვითხრეს, ეს იმიტომ გაკეთდა, რომ ქვიშის მოტანა დიდ თანხებთან იყო დაკავშირებული.
ასკანის დეპუტატი ილია მამალაძე "გურია ნიუსთან" ადასტურებს ინფორმაციას სამუშაოების დროებით შეჩერების შესახებ, თუმცა, სხვა მიზეზს ასახელებს:
_ სამუშაოები ნამდვილად იყო დროებით შეჩერებული, მაგრამ ხარვეზები უკვე აღმოფხვრილია და სამუშაოების შესრულება განახლლდა.
_ბატონო ილია, რა იყო სამუშაოების შეჩერების მიზეზი?
_ არხს შუა გზაზე თხრიდნენ, რაც არ შეიძლება _ მაშინ მოძრაობა უნდა შეჩერებულიყო. ეს იყო და ეს.
_ ჩვენ გვაქვს ინფორმაცია, რომ სამუშაოები არ სრულდება კეთილსინდისიერად. როგორც ვიცით, არხში, მილებთან ერთად, უნდა ჩაიყაროს ქვიშა, რაც არ გაკეთებულა. ამან შეიძლება გამოიწვიოს მილების დახეთქვა და სხვა პრობლემები...
_ არა, არ არის სიმართლე. მე რომ გითხარით ის პრობლემა იყო, იმაზე იყო შენიშვნები, _ გვითხრა სოფლის დეპუტატმა.
"გურია ნიუსი" დაუკავშირდა ასკანაში წყლის სისტემის რეაბილიტაციაზე პასუხისმგებელ პირს ცეზარ ქერქაძეს, რომელიც სამუშაოების შეჩერების სულ სხვა მიზეზს ასახელებს:
_თვენახევარია შეუსვენებლად ვმუშაობთ და ამიტომ შევისვენეთ ერთი კვირით. მუშებს ათასი პირადი საქმე აქვთ და იმიტომ მოხდა ასე. ახლა ვმუშაობთ ჩვეულებრივად.
_ ბატონო ცეზარ, ინფორმაცია გვაქვს, რომ სამუშაოები ისე არ სრულდება, როგორც პროექტითაა განსაზღვრული. მაგალითად, არხში, მილებთან ერთად, არ ჩაუყრიათ ქვიშა…
_ პროექტში იყო გაწერილი ორმოს დაღრმავება 50 სმ-ზე, ჩვენ ვთხრიდით 120 სანტიმეტრზე. ამის მერე შევთანხმდით და ახლა ვაკეთებთ ისე, როგორც ინფრასტრუქტურის სამსახურიდან გვითხრეს.
ოზურგეთის მუნიციპალიტეტის გამგეობის ინფრასტრუქტურის სამსახურის საინვესტიციო და გარემოს განვითარების განყოფილების უფროსი თემურ ჩავლეიშვილი ადასტურებს, რომ სამუშაოები ხარვეზებით სრულდებოდა:
_ სამუშაოების, როგორც დამკვეთი, ისე მასზე პასუხისმგებელი პირი მუნიციპალიტეტის გამგეობა. ხარვეზები იყო ნამდვილად, ამიტომ შევაჩერეთ სამუშაოები _ ჩვენი სამსახურის მიერ მოხდა დროულად რეაგირება,
_ რა ხარვეზებზეა საუბარი?
_ არ იყო გამოყენებული ქვიშის "ბალიში". ამის შესახებ გავაფრთხილეთ სამუშაოს შემსრულებელი და გამოასწორეს ეს ხარვეზი. სილის მოტანა თანხებთან არის დაკავშირებული, ამიტომ ეს არ უნდოდა კომპანიას, მაგრამ ჩვენ ამის საშუალება არ მივეცით და დროულად მოვახდინეთ რეაგირება. სამუშაოები ისე სრულდება, როგორც პროექტით არის განსაზღვრული.
