ყოველწლიური საერთაშორისო ელექტრონული მუსიკალური ფესტივალი, ქვეყანაში დაპირისპირების საგანი გახდა.
საზოგადოების ნაწილი, "კაზანტიპს" გარყვნილებისა და ამორალური საქციელის ბუდედ მიიჩნევს. იგივე აზრზე არიან სასულიერო პირებიც, რომლებიც სოფელ ანაკლიაში საპროტესტო აქციების ჩატარებას გეგმავენ.
თუმცა, საზოგადების ნაწილს მიაჩნია, რომ ქვეყნის ეკონომიკური და ტურისტული განვითარებისთვის, "კაზანტიპი" საქართველოში აუცილებლად უნდა ჩატარდეს. ამ ყველაფრის ფონზე კი ხელისუფლება დუმს.
ფაქტი კი ერთია, ინვესტორი ქვეყანაში მთავრობის თანხმობის გარეშე ვერ ჩამოვიდოდა და პროექტის განხორციელებას არ დაიწყებდა. თავად იმიტირებული ქვეყანა "კაზანტიპის" დამაარსებელი და "პატარა პრეზიდენტი" ნიკიტა I (მარშუნოკი) ამბობს, რომ ზეიმზე, რომელიც ანაკლიაში 10 დღე ჩატარდება, არანაირი გარყვნილება არ იქნება.
პროტესტანტებს სთხოვს, დაელოდონ 1 სექტემბერს და ამის შემდეგ განსაჯონ, შეაფასონ, როგორი ზეიმი ჩატარდა. იგი მთავრობასაც აკრიტიკებს.
ნიკიტა I ხელისუფლებას აღებული ვალდებულებები შესრულებას სთხოვს. მისი თქმით, იმისთვის, რომ ქვეყანაში ინვესტიცია შემოვიდეს, საჭიროა მთავრობამ ინვესტორს ხელი შეუწყოს.
"იმისთვის, რომ აქ ინვესტიცია შემოვიდეს, საჭიროა საინვესტიციო კლიმატი. ამისთვის კი საჭიროა ხელისუფლებამ აღებული ვალდებულება შეასრულოს. ზოგჯერ, ეს ყველაფერი მხოლოდ სიტყვიერად ხდება. ჩვენ შეგვიძლია ეს ადგილი გავაცოცხლოთ. ამაში ეჭვიც არ გვეპარება.
რადგან ანაკლიაში არის ის საწყისი ბაზისი, რომელიც მსხვილი საკურორტო ზონის განვითარებისთვის არის საჭირო. ეს ჩვენთან ერთად მოხდება, თუ ჩვენს გარეშე, არ ვიცი. მაგრამ, დამეთანხმეთ, ჩვენ სწრაფად განვავითარებთ.
საკმაოდ სერიოზული ადამიანები გვესაუბრებიან ამ ადგილის აღმშენებლობაზე. თუმცა, ყველა აკვირდება აქ მიმდინარე მოვლენებს. ვიცი რომ არიან ადამინები, რომლებიც "კაზანტიპის" ჩატარებას აპროტესტებენ, თუმცა, ვერ გავიგე რატომ? დაფიქრდნენ იმაზე რომ, ისინი სამეგრელოს რეგიონის ეკონომიკურ განვითარებას აპროტესტებენ.
ადამიანებს მისცენ იმის უფლება, საკუთარი შემოსავალი ჰქონდეთ და ნორმალურად იცხოვრონ. ჩვენ შეგვიძლია ეს ყველაფერი მივცეთ. ეს არ დაგავიწყდეთ."
_ ჩვენს ქვეყანაში გამოხატვის თავისუფლებაა…
_ როგორც ჩანს. მე მაოცებს იმ ადამიანების პოზიცია, რომლებიც საპროტესტო აქციებს მართავენ. რა თქმა უნდა, თქვენც იცით ამის შესახებ. როგორ ფიქრობთ, რამ უბიძგა ამ ადამიანებს, ნამდვილად მორალისთვის ბრძოლამ თუ რამე სხვა მიზეზი არსებობს? მოდით, ვთქვათ, თქვენ ხომ ჟურნალისტები ხართ, ხომ იცით ყველაფერი? მოდით ეკლესიაზე არ ვისაუბროთ, ადამიანებს, რომლებიც ამ ზეიმს აპროტესტებენ, ეკლესიასთან არანაირი კავშირი არ აქვთ. ზუსტად ვიცი, ისინი არ საუბრობენ ღმერთთან.
ჩვენ ვსაუბრობთ იმაზე რომ, ზეიმი ჯერ არ ჩატარებულა, ამ ადამიანებმა კი პროექტს დიაგნოზი ადრე დაუსვეს. კონკრეტულად რაში მადანაშაულებენ? რატომ მიშლიან გავაკეთო ის რისი გაკეთებაც კარგად ვიცი?
გთხოვთ, მოიკრიბეთ მოთმინება და ამ თემაზე 1 სექტემბერს ვისაუბროთ. მე, კანონს თუ დავარღვევ, ციხეში დავჯდები.
თუ არ მოხდება რაზეც პროტესტანტები საუბრობენ, მაშინ?! სისულელეა ის, რაზეც ისინი საუბრობენ.
მოდით, საქმეს მიხედეთ. რეკომენდაციას მოგცემთ, მიხედეთ ბორდელებს რომელიც უკვე 29-მდეა. ინტერნეტს, კაზინოს. სამუშაო გაქვთ, რას გადაეკიდეთ პატარა ანაკლიას, რომელსაც არაჩვეულებრივი მომავალი აქვს. ჩვენ შეგვიძლია ჩვენი პოზიციების დაცვა.
არ შეიძლება დაიჯერო ყველაფერი, რაც ინტერნეტში წერია. მით უმეტეს, როდესაც სერიოზული ადამიანები, არასერიოზულ განცხადებებს აკეთებენ, ეს მათ არ უხდებათ. იმისთვის, რომ გაკეთდეს ღრმა ანალიზი რა არის კაზანტიპი, სანამ ქუჩაში გამოხვიდოდით, ურიგო არ იქნებოდა მე გამსაუბრებოდით და ჩემთვის დაგესვათ კითხვები.
_ თქვენ საუბრის დასაწყისში თქვით: "ხელისუფლებაში საუბრობენ, მაგრამ საქმის კეთება არ იციან" რას გულისხმობდით?
_ აქ ცალკეულ ადამიანებზე ვსაუბრობ, რადგან გადაწყვეტილებას ცალკეული ადამიანები ღებულობენ.
_ შეგიძლიათ დააკონკრეტოთ ვინ არიან ის ცალკეული ადამიანები?
_ რა თქმა უნდა, მაგალითად ეკონომიკის მინისტრი, გიორგი კვირიკაშვილი. მისმა განცხადებამ გამაკვირვა. ეკონომიკის მინისტრმა თქვა, რომ ღმერთი დასჯის. უცნაურია.
_ ხომ შეიძლება ეკონომიკის მინისტრი მორწმუნე იყოს და ღმერთის სწამდეს...
_ კი ბატონო. მოდი ასე ვთქვათ, მე რა დავაშავე? თუ რამე დანაშაული ჩავიდინე, პირველ რიგში ღმერთი მე დამსჯის. მსოფლიოს სხვადასხვა ქვეყნიდან ჩამოდიან, 22 წელია პროექტი არსებობს, ანუ გამოდის, ჩვენ ისეთ რამეს ვაკეთებთ, რაც ღმერთს ნებავს. მოდით, წინასწარ დასკვნებს ნუ გავაკეთებთ. აბსოლუტურად განსხვავდება ერთმანეთისგან რელიგია, მორალი და ეკონომიკა. ამიტომ ერთმანეთში და ნუ აურევთ.
_ კვირიკაშვილის გარდა, სხვა რომელ მინისტრთან გქონდათ შეხვედრა და დაგრთეს თუ არა ნება, ამ ადგილზე ჩაგეტარებინათ ეს ღონისძიება?
_ ანუ, თქვენ გულისხმობთ მომცეს თუ არა "კურთხევა"? თითქმის ყველა მინისტრთან მქონდა პირადი შეხვედრები. ჩემთვის არავის არაფერი დაუშლია. ამ ქვეყანაში იმიტომ ჩამოვედი, მითხრეს, რომ საინვესტიციო კლიმატის მიხედვით, მე-7 ადგილს იკავებსო და უფლებებიც დაცულიაო.
მე ეს დავიჯერე და დღემდე მეჯერა. მგონი იმ გაუგებრობას, რომელიც ჩვენთან მიმართებაში ხდება, ძალიან მალე გავფანტავთ. დარწმუნებული ვარ, ჩვენს მიმართ განწყობა შეგეცვლებათ. ვაწყობთ ყველაზე მაგარ ზეიმს. დაელოდეთ 1 სექტემბერს. ეს თუ არ მოეწონება საქართველოს, თქვენ გგონიათ ძალით გაგართობთ?! ჩვენ აქ ჩამოვედით იმისთვის, რომ ზეიმი მოვაწყოთ და არა იმისთვის, რომ ვინმეს რამე დაუმტკიცოთ. ჩვენ შეგვიძლია ზეიმი შევქმნათ. მორჩა!
_ რატომ შეარჩიეთ "კაზანტიპის" ჩასატარებლად სოფელი ანაკლია, ადრე იცოდით ამ ადგილის შესახებ?
_ ვფიქრობ, საჭირო არ არის, რაღაც დეტალებს ყურადღება მივაქციოთ. როგორც ვიცი ეს ადგილი 2 წელია აშენებულია, არავის ჭირდებოდა და ყურადღებას არ აქცევდნენ, იქნებ ჩვენ გველოდებოდა? მოდი ეს შევამოწმოთ და მორჩა."
სამეგრელოსა და აფხაზეთის ადმინისტრაციულ საზღვართან, სოფელ განმუხურში იმიტირებული ქვეყანა "კაზანტიპი"-ს მშენებლობა სწრაფი ტემპით მიმდინარეობს. თუმცა, სოფელ ანაკლიასა და განმუხურს შორის მდებარე ტერიტორიაზე, რომელიც იქვე განთავსებულ სასტუმროებს ეკუთვნით, იმის ნიშანწყალს ვერ შეატყობთ, რომ იქ 30 000 ტურისტის დასახვედრად ემზადებიან. მიმდებარე ტერიტორიაზე სარეველა ბალახი ხედ არის ქცეული. ირგვლივ კი ძროხები დადიან.
ხელისუფლების არც ერთ წარმომადგენელს, რომლებმაც თავად დართეს ნება კაზანტიპის ორგანიზატორებს ინვესტიცია განეხორციელებინა სოფელ განმუხურში, ერთხელაც არ უნახავთ, რა ხდება სამეგრელო-აფხაზეთის საზღვართან და რა ინფრასტრუქტურულ სამუშაოს ატარებს ინვესტორი.
შეგახსენებთ, რომ 2014 წელს, საქართველო, კერძოდ კი ზუგდიდის მუნიციპალიტეტის სოფელი ანაკლია, რომელიც სამეგრელოსა და აფხაზეთის ადმინისტრაციულ საზღვართან სულ რამდენიმე კილომეტრით არის მოშორებული, მსოფლიოს სხვადასხვა ქალაქიდან 30 000 -მდე სტუმარს ელოდება.
"კაზანტიპი" _ იმიტირებული ქვეყანაა. "კაზანტიპის ერი" 22 წლის წინ დაარსდა, რომლის "პატარა პრეზიდენტი" ნიკიტა I (მარშუნოკი) ყოველწლიური საერთაშორისო ელექტრონული მუსიკალური ფესტივალის ორგანიზატორია.
როგორც "გურია ნიუსთან" "კაზანტიპის: ფესტივალის ორგანიზატორებმა განაცხადეს,
"კაზანტიპის" ფესტივალიდანსაქართველო 60 მილიონილარისშემოსავალსმიიღებს"
