სასჯელაღსრულების რუსთავის № 6 და №5 ქალთა დაწესებულებაში, პატიმრები შიმშილობენ. ისინი საქმეების გადასინჯვასა და სამედიცინო მომსახურეობის გაუმჯობესებას ითხოვენ. მსჯავრდადებული ქალების მოთხოვნაა შეწყალების კომისიამ მათი საქმეები შეისწავლოს.
სასჯელაღსრულების დაწესებულებებში პატიმართა შიმშილობის ფაქტთან დაკავშირებით, უფლებადამცველი გიორგი თევზაძე ამბობს: "როგორც ჩემთვის გახდა ცნობილი, მშვიდობიანი შიმშილობის პროტესტი მიმდინარეობს სასჯელაღსრულების №5 ქალთა დაწესებულებაში.
ასევე, უკმაყოფილებას გამოთქვამენ რუსთავის №6 დაწესებულებაში მყოფი მსჯავრდადებულები. მათი ძირითადი მოთხოვნაა საქმეების გადასინჯვა, შესაბამისი სამედიცინო მომსახურეობის უზრუნველყოფა. მსჯავრდადებული ქალები ითხოვენ შეწყალების კომისიის მხრიდან მათი საქმეების შესწავლის ადეკვატური მიდგომის გათვალისწინებას.
მიმართავს სასჯელაღსრულების ახალ ხელმძღვანელობას, მეტი ყურადღება გაამახვილონ პატიმართა უფლებებისა და მათი სამედიცინო მომსახურეობის გაუმჯობესების მიმართულებით. ხელისუფლებას კი შევახსენებ, რომ მათ პოზიტიურ ვალდებულებას წარმოადგენს პატიმართა უფლებების უზრუნველყოფის ხელშეწყობა, მითუმეტეს ხელისუფლების ერთ-ერთ დანაპირებს სამართლიანობის აღდგენა და სისხლის საქმეების გადასინჯვის ეფექტური სამართლებრივი მექანიზმის შექმნის აუცილებლობა წარმოადგენდა".
რა ხდება სასჯელაღსრულების რუსთავის № 6 და №5 ქალთა დაწესებულებაში, როგორია მოშიმშილე პატიმრების მდგომარეობა, ამასთან დაკავშირებით "გურია ნიუსთან" სასჯელაღსრულებისა და პრობაციის სამინისტროს სამედიცინო დეპარტამენტის უფროსი ნათია ლანდია აცხადებს:
"პირველადი ჯანდაცვის ექიმები ყოველდღიურად ახორციელებენ მსჯავრდებულების ჯანმრთელობის მდგომარეობაზე ზედამხედველობას, დაავადებათა პრევენციას, სკრინინგს, დიაგნოსტიკასა და მკურნალობას.
ასევე, უტარდებათ კლინიკო-ლაბორატორიული და დიაგნოსტიკური კვლევები და შესაბამისი დროული ინტერვენციები (სამედიცინო ჩარევები). საჭიროების შემთხვევაში იწვევენ კონსულტანტებს- სხვადასხვა ექიმ-სპეციალისტებს დიაგნოზების ვერიფიცირების მიზნით, ხორციელდება დროული რეფერალი (გადაყვანა) როგორც სასჯელაღსრულების ცენტრალურ საავადმყოფოში, ტუბერკულოზის სამკურნალო და სარეაბილიტაციო ცენტრში, ისე სამოქალაქო სექტორის 42 პროვაიდერ კლინიკაში.
შიმშილობასთან დაკავშირებით მსჯავრდებულთა ჯანმრთელობაზე მონიტორინგი სამედიცინო პერსონალის მხრიდან კიდევ უფრო გაძლიერებულია. მე-6 დაწესებულების მსჯავრდებულს სამედიცინო მომსახურებას უწევს მთავარი ექიმი, 3 პირველადი ჯანდაცვის ექიმი, 4 მორიგე ექიმი, ექიმი-სტომატოლოგი, ფარმაცევტი და 12 ექთანი.
2014 წლის 1 იანვრიდან 1 აგვისტომდე ჩატარებულია ექიმ-სპეციალისტთა 1806, ხოლო 1 აგვისტოდან დღემდე 200 კონსულტაცია და ინსტრუმენტული გამოკვლევა. რაც შეეხება რეფერალს, 1 იანვრიდან დღემდე განხორციელებულია 210 რეფერალი სამოქალაქო სექტორში და 68 რეფერალი სასჯელაღსრულების სამკურნალო (მე-18 და მე-19) დაწესებულებებში. ამავდროულად მიეწოდებათ საჭირო მედიკამენტები ბაზისური მედიკამენტების ნუსხის შესაბამისად (500 დასახელება), სამედიცინო დანიშნულების საგნები, სახარჯი მასალა, სტომატოლოგიური მომსახურებისათვის საჭირო საგნები და სამოქალაქო სექტორის ექიმების მიერ დანიშნული მედიკამენტები. აქედან გამომდინარე, სამედიცინო მომსახურეობაზე ხელმისაწვდომობა დროული და უზრუნველყოფილია როგორც კლინიკური, ფარმაცევტული, ისე ლოჯისტიკური მმართველობის კუთხით", _ განაცხადა ლანდიამ.
