"მლიქვნელთა გუნდმა გადაწყვეტილება მიიღო, მე პარტიიდან გარიცხული ვარ", _ ასე ეხმაურება ბათუმის მაჟორიტარი დეპუტატი მურმან დუმბაძე "ქართული ოცნების" პოლიტსაბჭოს გადაწყვეტილებას პარტიიდან მისი გარიცხვის შესახებ.
ვის უკავშირებს ამ გადაწყვეტილებას დუმბაძე, როგორ აპირებს მუშაობის გაგრძელებას და რა გზავნილს უგზავნის ის თავის ამომრჩეველს, "გურია ნიუსის" ინტერვიუდან შეიტყობთ:
_ პრემიერ-მინისტრის გადაწყვეტილებას ვეთანხმები იმ თვალსაზრისით, რომ უახლოესი დღეების განმავლობაში ვაკეთებდი განცხადებას: იმ შემთხვევაში, თუ პოლიტსაბჭო არ დაუჭერდა მხარს აჭარის მთავრობის "ქართული ოცნების“ ფრაქციის გადაწყვეტილებას, რეგიონული მთავრობის დათხოვნის შესახებ, მაშინ მე პარტიას დავტოვებდი.
თუმცა, პოლიტსაბჭოს არავითარი გადაწყვეტილების მიღების უფლება არ აქვს, იმპიჩმენტის პროცედურის თვალსაზრისით. როდესაც შევედი პოლიტსაბჭოზე მკითხეს, თქვენ იგივე აზრზე რჩებით, თუ იცვლით პოზიციასო, ვუთხარი რომ პოზიციას არ ვცვლიდი და თუ ისინი მხარს არ უჭერდნენ ამ გადაწყვეტილებას, პარტიიდან მივდიოდი. ამაზე მითხრეს, რომ მე გარიცხული ვარ პარტიიდან.
_ ანუ ისედაც აპირებდით პარტიის დატოვებას?
_ ვაპირებდი პარტიიდან წასვლას იმ შემთხვევაში, თუ ჩვენ ვერ მივიღებდით მხარდაჭერას. მე მხარდაჭერა ვერ მივიღე კონკრეტულად პრემიერისგან და პოლიტსაბჭოსგან. თუმცა, რა არის პოლიტსაბჭო, ეს არის ერთგვარი მლიქვნელთა გუნდი, რომელიც ერთ კაცს ემორჩილება.
_კონკრეტულად ვის გულისხმობთ?
_ მიმაჩნია, რომ როდესაც ადამიანი პოლიტიკიდან მიდის, ის სახელმწიფო საქმეებში არ უნდა ერეოდეს. ჩვენ რეალურად მივადექით ავტოკრატიის ჭიშკარს, რომლის იქეთ, სერიოზული პრობლემები იწყება ქვეყანაში. ამიტომ ჩემი პარტიიდან გასვლით, ამომრჩეველს ვეუბნები, რომ ქვეყანაში საქმე არც ისე დალაგებულია.
_ბატონ ბიძინა ივანიშვილს გულისხმობთ?
_დიახ, დიახ, ბატონ ივანიშვილს.
_ როგორ გააგრძელებთ მუშაობას?
_ მე ვაგრძელებთ ისე მუშაობას, როგორც ბოლო 20 წლის განმავლობაში ვცხოვრობდი. ეს არის ბრძოლა ჩემი უკეთესი სამშობლოსათვის, უკეთესი სახელმწიფოსთვის და ჩემი უკეთესი ხელისუფლებისთვის. პარლამენტში ჩემი მუშაობა ჩვეულებრივ გაგრძელდება, რადგან პარლამენტის წევრის მანდატი თავისუფალია.
_ რაც შეეხება აჭარის უმაღლესი საბჭოს სამ დეპუტატს _ ალექსანდრე ჩიტიშვილს, მედეა ვასაძეს და ჯემალ ფუტკარაძეს რომლებსაც საყვედური გამოუცხადეს, თქვენი აზრით, რამდენად ადეკვატურია, პოლიტსაბჭოს გადაწყვეტილება?
_მე მაგას ვერ შევაფასებ. პოლიტსაბჭოს ჰკითხეთ. ეს ჩემი პრეროგატივა არ არის. ჩემი პრეროგატივაა ის, რომ ქვეყანაში ხელისუფლება იყოს დაბალანსებული, ერთი ხელისუფლების სხვადასხვა შტოს თავისი კომპეტენციები ჰქონდეს. ერთი კაცი არ უნდა წყვეტდეს ერთი შტოს წამოწევას, მეორეს დაკნინების ხარჯზე და ა.შ. საქართველოში ხელისუფლებისთვის უმთავრესი პრინციპი უნდა იყოს საქართველოს კონსტიტუცია და არავითარ შემთხვევაში ერთი პიროვნება, რაგინდ დიდი ავტორიტეტიც არ უნდა იყოს ის. ვფიქრობ, რომ ხმამაღლა ამის თქმა იყო დროული და აუცილებელი, რომ ხელისუფლებამ პოზიციები შეიცვალოს.
