ეს იმ შემთხვევაში, თუ საქართველოს პარლამენტის ჯანდაცვის კომიტეტის მიერ მომზადებული ახალი კანონპროექტი დამტკიცდება.
საქმე იმაშია, რომ ახალი კანონპროექტის მიხედვით, თუ არსებულ კანონში მშვილებელსა და გასაშვილებელ ბავშვს შორის ასაკობრივი სხვაობა არ უნდა იყოს 16 წელზე ნაკლები, ახალი რეგულაციით, დაწესდება ზედა ზღვარიც – სხვაობა 50 წელს არ უნდა აღემატებოდეს.
თუმცა ასაკობრივი სხვაობის შესახებ ჩანაწერი არ იქნება გათვალისწინებული, თუ მშვილებელი ბავშვის დედინაცვალი, მამინაცვალი ან ნათესავი იქნება.
კიდევ ერთი წესი, პირდაპირი გაშვილების პროცედურას შეეხება. კერძოდ, პირს, რომელიც ბავშვზე უარს იტყვის, მშვილებელი ოჯახის არჩევის უფლება აღარ ექნება. იგეგმება რეგისტრაციის პროცესის დახვეწა და პოტენციური მშობლებისთვის სპეციალური მოსამზადებელი კურსების დანერგვაც.
არასამთავრობო ორგანიზაცია „ევრი ჩაილდ“-ის დირექტორი ცვლილებებს მიესალმება, თუმცა ასაკობრივი ზღვარის დაწესებას, დისკრიმინაციად აფასებს.
მას მაგალითად მოჰყავს არა ჩვილის, არამედ მოზარდი ბავშვების გაშვილების შემთხვევები და ამბობს, რომ აღნიშნული ცვლილებებით 14 წლის მოზარდებს გაშვილების გზა მოჭრილი ექნებათ.
თუმცა სხვაგვარი დამოკიდებულება აქვთ ფსიქოლოგებს, რომლებიც მიიჩნევენ, რომ ყველა შემთხვევამ, რომელიც ოჯახის მხრიდან ბავშვის შვილად აყვანის სურვილის გამოთქმას ეხება, ინდივიდუალურად უნდა იქნეს შესწავლილი.
აღსანიშნავია, რომ კანონპროექტში ცვლილების ერთ-ერთ მიზეზად, ავტორები, ბავშვის შვილად აყვანის მსურველთა დიდ რიცხვსაც ასახელებენ. ასევე, მოცდის პერიოდს.
ცნობისთვის, ამჟამად ბაზაში 3 000-მდე მშვილებელია რეგისტრირებული, წელიწადში კი დაახლოებით 200 ბავშვი შვილდება.
