ლანჩხუთის მუნიციპალიტეტის ბიუროს სხდომაზე, ტრადიციულად აქტიური იყო ფრაქცია "მაჟორიტარების" თავმჯდომარე ჯუმბერ ბლაგიძე, რომელმაც რამდენიმე აქტუალური საკითხი დასვა ბიუროს წევრების წინაშე.
სუფსაში სტიქიამ უსახლკაროდ დატოვა ნაგუზალოვების ხუთსულიანი ოჯახი, რომელიც დროებით მეზობლებთანაა შეხიზნული. სუფსის მაჟორიტარის თქმით, ადგილზე არსებობს დროებითი საყოფაცხოვრებო უზრუნველყოფისთვის საჭირო ვაგონი, რომლის ტრანსპორტირებისა და ნაგუზალოვების საკარმიდამო ნაკვეთში გადატანისთვის ამწე და სატვირთო მანქანაა საჭირო. მუნიციპალიტეტის გამგებელი ზაზა ურუშაძე დეპუტატს დაპირდა, იმ დღესვე მოინახულებდა დაზარალებულებს და ადგილზე გადაწყვეტდა პრობლემებს.
ჩვენ დავინტერესდით, როგორ განვითარდა მოვლენები და პარასკევს ბატონ ჯუმბერს დავუკავშირდით. მასთან საუბრის შემდეგ გაირკვა, რომ გამგებელი ამ საკითხის მოსაგვარებლად სუფსაში არ ჩასულა.
_ დღეს ვაპირებ კიდევ ერთხელ შევახსენო მას ამის შესახებ, _ თქვა ბლაგიძემ.
_ სხვათა შორის, სამომავლოდ ნაგუზალოვების საცხოვრებელი სახლის აღსადგენად ცენტრალური ბიუჯეტი 16 ათას ლარს გამოყოფს, მას შემდეგ, რაც მოხდება შესაბამისი პროექტის შედგენა, _ გვითხრა გამგეობის ინფრასტრუქტურის და არქიტექტურის სამსახურის უფროსის მოვალეობის შემსრულებელმა თენგიზ ხელაძემ.
რაც შეეხება კიდევ ერთ საკითხს, რომელიც ჯუმბერ ბლაგიძემ დააყენა, ის ეხება სუფსის მოსახლეობის შეშით უზრუნველყოფას.
"სატყეო დეპარტამენტმა ტყე-კაფი სუფსელებს კი გამოუყო, მაგრამ მოსახლეობას სიშორის გამო (12-13 კმ.) უჭირს შეშის დამზადება და გამოტანა. ამიტომაც ხალხმა ე.წ. ღრმაღელის ფართობებში დაიწყო შეშის დამზადება, მაგრამ საბუთის გარეშე გარემოს ზედამხედველობის ინსპექცია მათ ამის საშუალებას არ აძლევს. მე მოვითხოვ, შეიქმნას კომისია, რომელიც ადგილზე შეისწავლის ამ პრობლემას და გაარკვევს აღნიშნული ტერიტორიის ბედს, რომელიც არც სატყეო დეპარტამენტის ბალანსზეა და არც ეკონომიკის სამინისტროს. იქნებ გავარკვიოთ ვისია ეს მიწა, მოვეხმაროთ მოსახლეობას, რომ შეშის დამზადების უფლება ოფიციალურად მოიპოვოს" _ ამბობს დეპუტატი.
დეპუტატ გიორგი ჩახვაძის თქმით, სუფსაში არის კიდევ ერთ ადგილი, ე. წ. ჭიჭვის ტყე, სადაც ხე-ტყე ბლომადაა, მაგრამ შესასვლელი გზა ფაქტობრივად, არ არსებობს და იქნებ ამ გზის აღდგენა მოხერხდესო.
ჩვენი ინფორმაციით, საკრებულოში აღნიშნულ საკითხზე შეიქმნა მუშა ჯგუფი, საკრებულოს თავმჯდომარის მოადგილეს, გელა კილაძის ხელმძღვანელობით, რომელიც ადგილზე შეისწავლის პრობლემას რაც შეიძლება შემჭიდროვებულ ვადებში.
