სპეცოპერაცია "ქართული" -ს დროს, ესპანეთის ეროვნული პოლიციის აგენტებმა და სამოქალაქო გვარდიის წევრებმა, ქვეყანაში მყოფი ქართული კრიმინალური დაჯგუფების 28 წევრი დააკავეს, რომლებსაც ამ დროისათვის დაახლოებით 50-მდე საცხოვრებელი ბინის ქურდობა ედებათ ბრალად.
თუმცა, არ არის გამორიცხული, რომ მათ ბრალი დაუმძიმდეთ. ინფორმაციას ამის შესახებ ესპანურენოვანი ინტერნეტგამოცემა www.elicebergdemadrid.com-ი ავრცელებს.
გამოცემის ინფორმაციით, ქართველ კრიმინალთა დაკავება ერთდროულად სხვადასხვა ქალაქებში – მადრიდში, კასტილია ლა მანჩსა და კატალონიაში განხორციელდა. დაკავებულთა შორის "კანონიერი ქურდებიც" არიან.
აღნიშნული დანაშაულებრივი ჯგუფის დასაკავებლად მუშაობა ესპანელმა სამართალდამცველებმა გასული წლის ივნისის თვეში დაიწყეს, როცა სხვადასხვა ქალაქებში განხორიციელებული ქურდობისა და ძარცვის ფაქტებს შორის ერთნაირი ხელწერა შენიშნეს.
დაკავებულთა შორის ყველაზე უმცროსი 22, უფროსი კი 58 წლისაა. ესპანელი სამართალდამცველები აცხადებენ, რომ ამ დროისათვის ოპერაცია გრძელდება და მიმდინარეობს იმ პირთა ძიებაც, რომლებიც აღნიშნულ დაჯგუფებასთან თანამშრომლობდა.
ის რომ, ქართველი კრიმინალები კარგად არიან ორგანიზებული უკვე აღიარა პოლიციამ. ერთერთ გამოცემასთან ინტერვიუში ესპანეთის სამართალდამცავი ორგანოების წარმომადგენელმა აღნიშნა, რომ "ისინი პროფესიონალები არიან და დანაშაულს მაქსიმალური სიფრთხილით სჩადიან, ხშირად არ ტოვებენ კვალს და იყენებენ სხვადასხვა ტექნოლოგიებს. ამის შესახებ წერს გამოცემა www.elmundo.es-ი.
