“პოლიტიკის და სამართლის ცენტრის” თავმჯდომარის, ამირან გიგუაშვილს შეფასებით, ქვეყანაში ახალი პოლიტიკური გადაჯგუფება დაიწყო, რაც, ალბათ, საკმაოდ გრძელვადიანი და კატაკლიზმებით აღსავსე პროცესი იქნება.
"ვფიქრობ, ის რაც მოხდა კოალიციის შექმნის და მის შემდგომი საქმიანობის ლოგიკური გაგრძელებაა. ეს კოალიცია თავიდანვე ერთი ძირითადი მიზნისთვის, პრეზიდენტ სააკაშვილის და "ნაციონალური მოძრაობის“ ხელისუფლების შეცვლისთვის შეიქმნა და მას შემდეგ რაც მათ ეს ამოცანა მეტ–ნაკლები წარმატებით დაასრულეს თითქმის ყველა წარმომადგენლობით დონეზე, კოალიციის გამაერთიანებელი მთავარი ფაქტორიც აღარ არსებობს. შესაბამისად, დაიწყო ახალი პოლიტიკური გადაჯგუფება, რაც, ალბათ, საკმაოდ გრძელვადიანი და კატაკლიზმებით აღსავსე იქნება”, _ აღნიშნავს გიგუაშვილი.
მისივე თქმით, კრიზისის გამწვავება და ვადამდელი საპარლამენტო არჩევნების დანიშვნა "ნაციონალური მოძრაობის“ ინტერესებში არ შედის.
"რეალობა ისეთია, რომ ახალი საპარლამენტო არჩევნების შემთხვევაში “ნაციონალური მოძრაობაც” და ცალკე აღებული ნებისმიერი სხვა პარტია ხმების მინიმალურ რაოდენობას აიღებს. მათ მიერ გამოთავისუფლებულ მანდატებს კი ისევ “ოცნება” და მასთან კოალიციაში მყოფი პარტიები დაიკავებენ, ხოლო დანარჩენ ადგილებს პრორუსული ძალები, ბურჯანაძე და ინაშვილის პარტიები გაინაწილებენ. შესაბამისად, არა მგონია, დღეს პოლიტიკური კრიზისის გამწვავება პარლამენტში არსებული ძალების ინტერესებში შედიოდეს, ამიტომაც ყველანაირად ეცდებიან ეს არ მოხდეს. რაც შეეხება პროცედურას, ეს საკმაოდ რთული და სამართლებრივად ჩახლართული გზაა. თეორიულად პარლამენტის ორ მეხუთედს, ანუ სამოც დეპუტატს შეუძლია მთავრობის უნდობლობის საკითხი აღძრას. ამის შემდეგ პრეზიდენტს უნდა წარედგინოს ახალი პრემიერ მინისტრის კანდიდატურა 76 დეპუტატის მხარდაჭერით, რომელიც მან 5 დღის ვადაში უკანვე უნდა წარუდგინოს პარლამენტს დასამტკიცებლად, ან უარი განაცხადოს წარდგინებაზე. თუ პრეზიდენტი უარს განაცხადებს, ამის შემდეგ ხელახლა იგივე კანდიდატურის წარდგენას ხმა უკვე 90 დეპუტატმა უნდა დაუჭიროს და პრეზიდენტი მომდევნო სამი დღის ვადაში წარადგენს ამ კანდიდატურას, რომელსაც ხმა ისევ უმრავლესობამ უნდა დაუჭიროს. მოკლედ რომ ვთქვათ, ამჟამად ისეთი მოცემულობაა, რომ ცალკე აღებულ არც ერთ პოლიტიკურ ძალას პარლამენტში ამის გაკეთება არ შეუძლია. გარდა ამისა, ნუ დაგვავიწყდება უპარტიო დეპუტატები, რომლებიც როგორც წესი ყოველთვის, ყველა დროში ხელისუფლების თამაშს თამაშობენ. ასე, რომ ვფიქრობ პრემიერ მინისტრ ღარიბაშვილის მთავრობას ამ ეტაპზე არაფერი ემუქრება, თუ თავად ოცნება არ გადაწყვეტს ახალი პოლიტიკური რეალობის შექმნას. რაც შეეხება ალასანიას, მიმაჩნია და მან ეს თავის ბოლო განცხადებებშიც დაადასტურა, რომ ის მოკლევადიან პერსპექტივაში სტრატეგიულ საკითხებთან დაკავშირებით მაინც ოცნების მოკავშირე უფრო იქნება, ვიდრე "ნაციონალური მოძრაობის“, – აღნიშნავს გიგუაშვილი.
რაც შეეხება ქვეყნის დასავლურ ინტეგრაციისთვის საფრთხის შექმნას, როგორც ეს ირაკლი ალასანიამ და მისმა გუნდის წევრებმა თანამდებობის დატოვებისას განაცხადეს, გიგუაშვილი ამბობს: ფაქტია, რომ ყველაზე გამოკვეთილმა პროდასავლურმა ჯგუფმა დღეს კოალიცია დატოვა.
"თუმცა, მე მაინც იმედი მაქვს, რომ ეს ქვეყნის სტრატეგიული კურსის ცვლილებას არ ნიშნავს და ძალიან კარგია, რომ ამის შესახებ პრემიერმა ირაკლი ღარიბაშვილმა მკვეთრი და მკაფიო განცხადება გააკეთა. სულ რამდენიმე დღის წინ, თქვენივე სააგენტოს მეშვეობით გამოვთქვი მოსაზრება, რომ ალასანიას სახელისუფლებო გუნდიდან ჩამოშორებით, "ნაციონალური მოძრაობის”, როგორც მთავარ პროდასავლურ ოპოზიციურ ძალად ყოფნაზე პრეტენზიის მქონე სუბიექტის ჩანაცვლება ხდება და ვფიქრობ, ჩვენ უფრო ამის მომსწრენი ვართ. ამასთან, არ მინდა ისე გაიგოთ, რომ ალასანია, ღარიბაშვილი, ივანიშვილი დასხდნენ და ამის შესახებ წინასწარ მოილაპარაკეს. რა თქმა უნდა, ასეთი შეთქმულების თეორიები შორს არის რეალობიდან, მაგრამ ეს არ გამორიცხავს პროცესების ბუნებრივი განვითარების გზით, იგივე პოლიტიკური შედეგების მიღებას. ასე, რომ წინ რთული და საინტერესო მოვლენები გველის“, – აღნიშნა გიგუაშვილმა "გურია ნიუსთან“ საბრისას.
