5 მილიონ 370 ლარი სახელმწიფო უსაფრთხოებისა და კრიზისების მართვის საბჭოსთვის, 2 მილიონი ლარი საქართველოს ეროვნული უშიშროების საბჭოს, 1 მილიონ 365 ათასი ლარი კი მთავრობის ეკონომიკურ საბჭოს.
აღნიშნულს "საქართველოს 2015 წლის სახელმწიფო ბიუჯეტის შესახებ" საქართველოს კანონპროექტში არეგულირებს.
ცნობისთვის, საქართველოს ეროვნული უშიშროების საბჭო საქართველოს პრეზიდენტის სათათბირო ორგანოა, რომელიც შექმნილია სამხედრო აღმშენებლობისა და ქვეყნის თავდაცვის ორგანიზების, ეროვნულ უშიშროებასთან დაკავშირებული საშინაო და საგარეო პოლიტიკის, სტაბილურობისა და მართლწესრიგის უზრუნველყოფის სტრატეგიულ საკითხებზე, აგრეთვე ქვეყნის უსაფრთხოების სფეროში და ეროვნული ინტერესებისათვის საფრთხის შემცველი ყველა ტიპის კრიზისული სიტუაციების მართვის მიზნით უმაღლესი პოლიტიკური გადაწყვეტილებების მისაღებად.
იგი პრეზიდენტის დაქვემდებარებაშია.
რაც შეეხება სახელმწიფო უსაფრთხოებისა და კრიზისების მართვის საბჭოს, იგი საქართველოს მთავრობის დადგენილებით, მიმდინარე წლის 6 იანვარს შეიქმნა.
როგორც დადგენილებაშია ნათქვამი სახელმწიფო უსაფრთხოებისა და კრიზისების მართვის საბჭო (შემდგომში – საბჭო) შექმნილია სახელმწიფო უსაფრთხოებასთან დაკავშირებული საშინაო და საგარეო პოლიტიკის, ქვეყნის სტაბილურობისა და მართლწესრიგის უზრუნველყოფის სტრატეგიულ საკითხებზე; აგრეთვე, სახელმწიფო უსაფრთხოების სფეროში და ეროვნული ინტერესებისათვის საფრთხის შემცველი ყველა ტიპის კრიზისული სიტუაციების მართვის მიზნით უმაღლესი პოლიტიკური გადაწყვეტილებების მისაღებად.
საბჭოს თავმჯდომარე საქართველოს პრემიერ-მინისტრია. ხოლო, საბჭოს წევრია, საბჭოს მდივანი, მისი თანაშემწე სახელმწიფო უსაფრთხოების საკითხებში.
აღნიშნული საბჭო პრემიერ-მინისტრის უშუალო დაქვემდებარებაშია.
ერთი შეხედვით, საქართველოს ეროვნული უშიშროების საბჭოსა და სახელმწიფო უსაფრთხოებისა და კრიზისების მართვის საბჭოს, თითქმის მსგავსი ფუნქციები აქვთ და განსხვავება მხოლოდ იმაშია, რომ ერთი პრეზიდენტის წინაშეა ანგარიშვალდებული, მეორე კი პრემიერის, მათი მომდევნო წლის ბიუჯეტში კი საკმაოდ დიდი სხვაობაა.
თუმცა, როგორც ცენტრ "მომავლის ინიციატივების" ხელმძღვანელი, იურისტი ლევან ალაფიშვილი „გურია ნიუსთა“ საუბრისას განმარტავს, ხსენებული ორი საბჭო არც კომპეტენციებით და არც ფუნქციურად ერთიდაიგივე არაა. მათი ძირითადი სხვაობა კი ისაა, რომ უშიშროების საბჭო კონსტიტუციური ფორმატია. სახელმწიფო უსაფრთხოებისა და კრიზისების მართვის საბჭო კი სულ რამდენიმე თვეა შეიქმნა და მისი კომპეტენციები კანონით განსაზღვრული არ არის.
"ეს ისეთი სპეციფიკური ორგანოებია, რომელთა ბიუჯეტი, საქმიანობის სპეციფიკისა და დასახული ამოცანების გათვალისწინებით, შესაძლოა ბოლომდე გასაგები ან გამჭირვალე არ იყოს.
შესაძლებელია თანხობრივი განსხვავება განპირობებული იმ გარემოებით, რომ ახლადშექმნილი უსაფრთხოებისა და კრიზისების მართვის საბჭოს ფორმირება ახლა ხდება, მათ შორის აპარატის.
გასულ წელს, როცა კანონში ამ საბჭოს შესახებ ჩანაწერი არ იყო, მაშინ სარეზერვო ფონდიდან გამოეყო კანცელარიას ფული, რომ ამ საბჭოს აპარატის, პერსონალის თუ ტექნიკის უზრუნველყოფა მომხდარიყო.
სავარაუდოდ, ამასთან შეიძლება გვქონდეს საქმე. სხვა მხრივ, არ ვფიქრობ, რომ რაიმე გადაჭარბებული შეიძლება იყოს აქ.
ბიუჯეტი არის დაგეგმილი – წლის განმავლობაში რა ხარჯები შეიძლება ჰქონდეს, მაგრამ წლის ბოლოს არაა გამორიცხული, რომ ამდენი არ გაიხარჯოს.
მართალია საქართველო კანონში დეკლარირებულად 2010 წლიდან პროგრამულ ბიუჯეტზეა გადასული, საბიუჯეტო კოდექსში ეს წერია, მაგრამ დღემდე ვერცერთმა ხელისუფლებამ ვერ მოახერხა, ამ საქმის დაწყება.
პროგრამული ბიუჯეტი ამ შეკითხვებს- რატომ არის ამ ორი საბჭოს ბიუჯეტში ამხელა სხვაობა, პასუხს გაგვცემდა. ასევე იმაზე, თუ რა მიზნებისთვის სჭირდებათ, რა რესურსია და ა.შ.", _ ამბობს ალაფიშვილი.
რაც შეეხება ეკონომიკურ საბჭოს, რომლისთვისაც 2015 წლის ბიუჯეტიდან 1 მილიონ 365 ათასი ლარია გამოყოფილი, გასული წლის 31 დეკემბერს, მთავრობის გადაწყვეტილებით, ქვეყნის ეკონომიკური პოლიტიკისა და ეკონომიკური სტრატეგიის დაგეგმარებისა და მათი შემუშავების კოორდინაციის მიზნით შეიქმნა.
ეკონომიკური საბჭოს თავმჯდომარეც პრემიერ-მინისტრია. საბჭოს მდივანი კი, საქართველოს პრემიერ-მინისტრის თანაშემწე ეკონომიკურ საკითხებში.
მიხეილ სააკაშვილის ყოფილი მრჩეველი ეკონომიკურ საკითხებში და მანამ ეროვნული ბანკის პრეზიდენტი, რომან გოცირიძე, „გურია ნიუსთან“ ამბობს, რომ სჯობდა პრემიერს 1 ან 2 უცხოელი მრჩეველი დაექირავებინა და ეს თანხა მათთვის გადაეხადა, რადგან ეკონომიკური საბჭო ბიუროკრატიული წარმონაქმნია.
"ეკონომიკური საბჭო, რომლის აპარატიც, როგორც ამბობენ 41 კაცია და რომელსაც ამხელა ბიუჯეტი აქვს, არარაციონალური ორგანოა. ამას სჯობს დაიქირაონ 1 ან 2 კარგი მრჩეველი უცხოეთიდან. ეს უფრო მეტი შედეგის მომტანი იქნება და უფრო ახალი იდეების, ვიდრე რაღაც ბიუროკრატიული წარმონაქმნი, რომლის შედეგიც რაში გამოიხატება არ ვიცით.
ესაა ეკონომიკური პროფილის სამინისტროების მუშაობის დუბლირება.
ეკონომიკურ საბჭოს არ სჭირდება აპარატი. მას სჭირდება 2 კაცი, რომელიც მოამზადებს ქაღალდებს და საბჭოს სხდომებს გაუწევს ტექნიკურ დახმარებას. დანარჩენი საქმე უნდა კეთდებოდეს ადმინისტრაციაში.
პრემიერ-მინისტრს უნდა ჰყავდეს მუდმივი მრჩეველი, რომელიც ეკონომიკურ საკითხებში რჩევას მისცემს და ეს უნდა იყოს საერთაშორისო დონის ექსპერტი. სჯობს მას გადაუხადონ მილიონი. თუმცა, ამ ფულით 10 ექსპერტს მოიწვევენ", _ უთხრა "გურია ნიუსს" გოცირიძემ.
