“ჰაერში გვახდევინებენ ფულს!”

დაბა ჩოხატაურის მოსახლეობა გაერთიანებული წყალმომარაგების კომპანიის წინააღმდეგ გამოდის და ამბობს, რომ კომპანიის წარმომადგენლებმა ისინი მოატყუეს:

_ რამდენიმე დღეა, დაბაში გაერთიანებული წყალმომარაგების კომპანიის ოზურგეთისა და ჩოხატაურის ოფისების წარმომადგნელები დადიან და წყლის მრიცხველებს ლუქავენ. გუშინწინ ბენდელიანის ქუჩაზეც იყვნენ. როგორც გვითხრეს, 1 ნოემბრიდან დახარჯული წყლის საფასურს მრიცხველის მიხედვით გადავიხდით. მრიცხველის ღირებულების _100 ლარის დაფარვა კი ნაწილ-ნაწილს მოგვიწევს.

აქამდე ვიცოდით, რომ მრიცხველები უფასოდ დაგვიდგეს. ყოველ შემთხვევაში, ასე გვითხრეს დადგმისას. ახლა კი გაირკვა, რომ თანხა უნდა გადავიხადოთ. ამას ემატება ისიც, რომ წყლის მოწოდება ცუდად ხორციელდება. წყლის მოსვლამდე, დაახლოებით ნახევარი საათის განმავლობაში, ონკანებში ჰაერი მოდის, რაც მრიცხველის ჩვენებაზე აისახება _ ფაქტობრივად, ჰაერში ვიხდით ფულს! _ ამბობენ ჩვენთან საუბარში ბენდელიანის ქუჩის მცხოვრებლები, რომლებმაც დახმარება ადგილობრივ ხელისუფლებასაც სთხოვეს.

ამ თემაზე სასაუბროდ გასულ კვირას ბენდელიანის ქუჩის მცხოვრებლებს გურიის გუბერნატორი გიორგი ჩხაიძე, ჩოხატაურის საკრებულოს თავმჯდომარე ზაალ მამალაძე და გამგებელი ირაკლი კუჭავა შეხვდნენ.

ირაკლი კუჭავას თქმით, მოსახლეობა მრიცხველის თანხის ნაწილ-ნაწილ გადახდის შესახებ წინასწარ იყო ინფორ­მირებული:

_ მე ვესაუბრე გაერთიანებული წყალმომარაგების წარმომადგენლებს და მითხრეს, რომ ამის შესახებ მოსახლეობა ინფორმირებული იყო, _ აღნიშნა კუჭავამ მოსახლეობასთან შეხვედრისას.

ბენდელიანის ქუჩის მაცხოვრებლები გამგებელს არ დაეთანხმნენ და აღნიშნეს, რომ მსგავსი ინფორმაცია მათთვის არავის მიუწოდებია:

_ ეს რომ გვცოდნოდა, არ დავდგამდით. ბევრს საკარმიდამო ნაკვეთი აქვს და იქაც მრიცხველი დაგვადგმევინეს. გამოდის, რომ ორი, სამი მრიცხველის თანხა გვაქვს გადასახდელი. შეიძლება თქვათ, რომ თვეში 3 ან 5 ლარი ბევრი არ არის, მაგრამ ჩვენთვის, უმუშევარი ხალხისთვის ეს სოლიდური თანხაა. ამას ემატება ისიც, რომ ძლიერი წნევის გამო მილები და ონკანები სულ გაგვიფუჭდა, _ პრეტენზიები არ დაუმალავს მოსახლეობას.

გურიის გუბერნატორის გიორგი ჩხაიძის თქმით, ამ საკითხს გაერთიანებული წყალმომარაგების კომპანიასთან კიდევ ერთხელ გაივლიან:

_ სამწუხაროდ, ვიღაცამ შეცდომაში შეიყვანა ხალხი. ძალიან ცუდია, რომ ადამიანები არაინფორმირებულები აღმოჩნდნენ. ამ საკითხს კიდევ ერთხელ გავივლით. აუცილებლად გავარკვევთ წნევის საკითხსაც, _ დასძინა გუბერნატორმა.

მოსახლეობამ ხელისუფლებას სხვა პრობლემებზეც უამბო და დახმარება სთხოვა: _ ამ ქუჩაზე ერთი შენობაა, რომელიც მუნიციპალიტეტის ბალანსზეა. იგი დასანგრევია, რადგან ადამიანებს საფრთხეს უქმნის. აქვე არის საკარმიდამო ნაკვეთი, სადაც ძველი ნანგრევებია. იქ გველების ბუდეა და განსაკუთრებით ზაფხულშია საშიში _ ბავშვები ვერ გამოგვიშვია გარეთ. ნაკვეთი საკრებულოს წევრს, დავით შარაშიძეს ეკუთვნის. რამდენჯერმე ვთხოვეთ, ეს ძველი შენობა დაენგრია, თუმცა, უშედეგოდ, _ აღნიშნა მოსახლეობამ.

საკრებულოს თავმჯდომარის ზაალ მამალაძის თქმით, დავით შარაშიძესთან ამ საკითხს გაივლის და ეს პრობლემა მოსახლეობას დროულად მოუგვარდება. მისივე ინფორმაციით, ამორტიზირებული შენობა, რომელიც მუნიციპალიტეტს ეკუთვნის, უახლოეს ხანში დაიშლება:

_ ეს პრობლემა მალე მოგვარდება. ამ დროისთვის ავარიულ შენობაში ორი ოჯახია შესახლებული, რომლებსაც ჩვენ შევთავაზეთ ქირით გადასვლა _ ქირას მათ მუნიციპალიტეტი გადაუხდის, _ თქვა ზაალ მამალაძემ.

_ ყველა ყოველთვის რაღაცას გვპირ­დება, ამიტომ დაპირებების აღარ გვჯერა. მხოლოდ ჩვენი ხმები უნდათ და მეტი არაფერი, _ თქვეს შეხვედრაზე მყოფმა მოქალაქეებმა.

_ თქვენი ხმების გულისთვის თითქმის 16-საათიან რეჟიმში ვმუშაობთ. ამის დასტურია ისიც, რომ ამ ქუჩაზე ასფალტი იგება, _ უპასუხა მოსახლეობის პრეტენზიას გამგებელმა ირაკლი კუჭავამ.

გურიის გუბერნატორის გიორგი ჩხაიძის თქმით, გურიაში 9 წლის განმავლობაში მართლაც არაფერი გაკეთებულა და ამიტომაც ხელისუფლებას კარგად ესმის მოსახლეობის პრეტენზიები:

_ კარგად გვესმის თქვენი. 9 წლის განმავლობაში გურიაში არაფერი გაკეთებულა, იყო მხოლოდ და მხოლოდ დაპირებები. რეგიონში მძიმე მდგომარეობაა და ეს ყველაზე კარგად ჩვენ ვიცით. ამიტომაც, ადგილობრივ ხელისუფლებასთან ერთად, მაქსიმალურს ვაკეთებთ, რომ გურიაში ბევრი პროექტი გაკეთდეს. მე, პირადად, ვცდილობ, რომ მთავრობისთვის გურია პრიორიტეტული იყოს და ასეც იქნება. ტყუილი დაპირებები არასდროს მიმიცია _ "გურია ნიუსი" აქაა, ყოველთვის "ჩასაფ­რებულია" და არაფერი ეპარება. ეს ძალიან კარგია და მისასალმებელი _ ერთ­გვარი სტიმულიცაა, რომ არაფერი დაგვავიწყდეს და მიცემული სიტყვა შევასრულოთ. ასე რომ არ მოვიქცეთ, დამერწმუნეთ, არავინ გვაპატიებს, პირველ რიგში კი მედია, _ აღნიშნა გიორგი ჩხაიძემ.

მოსახლეობამ ადგილობრივ ხელისუფ­ლებას ნაპირსამაგრი სამუშაოების ჩატარებაც სთხოვა. მათი თქმით, ბოლო 20 წელია, ეს პრობლემა არ მოგვარებულია და ყოველ გაწვიმებაზე მათ საფრთხე ემუქრებათ. ირაკლი კუჭავას ინფორმაციით, მომავალი წლის ბიუჯეტში ეს საკითხი გათვალისწინებულია და შესაბამისად,   .პრობლემაც მოგვარდება