ოზურგეთის მუნიციპალიტეტის საკრებულოს განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის სხდომაზე, 2015 წლის ბიუჯეტის პროექტის განხილვა დაიწყო. პროექტის განხილვა ორშაბათს, 17 ნოემბერს შედგა.
კომისიის თავმჯდომარემ ლელა საჯაიამ შეხვედრაზე ვრცლად ისაუბრა იმ პროექტების შესახებ, რომელიც ბიუჯეტით მომავალ წელს უნდა გახორციელდეს. მან გააკეთა განცხადება, რომ ბიუჯეტის პროექტის განხილვას დეპუტატებმა კიდევ რამდენიმე შეხვედრა უნდა დაუთმონ: _ კარგია, რომ აქტიურად ჩავერთეთ ბიუჯეტის პროექტის განხილვაში, მაგრამ ჩვენ გვაქვს კონკრეტული კითხვები. აქედან გამომდინარე, აუცილებლად უნდა მოვიდნენ ა.(ა).ი.პ.-ს დირექტორები და დეტალურად აგვიხსნან იმ პროექტების შესახებ, რომლის გახორციელებას აპირებენ 2015 წელს, _ თქვა საჯაიამ.
კომისიის წევრებმა ბიუჯეტის სხვადასხვა მუხლის თაობაზე შენიშვნები გამოთქვეს: სპორტის, ტურიზმის და ახალგაზრდულ საქმეთა ა(ა)ი.პ-ი ჩამოყალიბდეს დამოუკიდებლად; ბიუჯეტში გათვალისწინებული იქნას სკოლამდელი სააღმზრდელო დაწესებულებების აღმზრდელი მასწავლებლების გადამზადებისთვის საჭირო თანხები; მოსმენილი იქნას კულტურის, საგანმანათლებლო სფეროს ა.(ა) ი.პ-ების, როგორც მხარჯავი დაწესებულებების ინფორმაციები, როგორიცაა ურეკის კულტურის ცენტრისთვის გათვალისწინებული 125 000 ლარი, როცა მთლიანად მუნიციპალიტეტის კულტურის ცენტრისთვის მხოლოდ 150 (ასორმოცდაათი) ათასი ლარია ჩასმული.
კომისიის სხდომაზე სოფელ თხინვალის დეპუტატმა ბიძინა გობრონიძემ ასეთი კომენტარი გააკეთა:
_ სიმართლე რომ გითხრათ, დღეს თხინვალის ბედით უფრო ვარ დაინტერესებული, ვიდრე სპორტის, მაგრამ, ეს არ ნიშნავს იმას, რომ მე არ გამაჩნია აზრი ამ სფეროსთან დაკავშირებით. კარგი იქნება, თუ შეიქმნება სპორტის, ტურიზმის და ახალგაზრდულ საქმეთა ა(ა)ი.პ-ი. ეს ნამდვილად საჭიროა, რადგან ჩვენ უნდა წავიდეთ წინ და არ უნდა დავბრუნდეთ წარსულში. კარგი შედეგები გვქონდა და ახლაც გვაქვს სპორტში, რასაც უნდა მოვუფრთხილდეთ, _ თქვა ბიძინა გობრონიძემ.
