"კვირის თემის" წინა გადაცემაში, განათლების მინისტრმა, თამარ სანიკიძემ საპარლამენტო უმცირესობის წევრი, სერგო რატიანი გააკრიტიკა და განათლების სისტემაში მიმდინარე რეფორმების გასაცნობად სამინისტროში დაპატიჟა.
_ სერგო რატიანის შეკითხვები, რაღაც კონტექსტში, ცოტა აზრს არის ხოლმე მოკლებული. მე მას ბევრჯერ ვთხოვე და ველაპარაკე _ შეკითხვები თუ გაქვთ, მობრძანდით, გავიაროთ, რომ უკეთესი წარმოდგენა შეგექმნას, რა პროცესები მიმდინარეობს განათლების სამინისტროში,-მეთქი, მაგრამ ჯერჯერობით ეს "ბედნიერება არ გვეღირსა" და არ მობრძანდა ბატონი სერგო, _ განაცხადა ჩვენთან საუბრისას განათლების მინისტრმა.
სანიკიძის მიერ ჩვენს ეთერში გაკეთებულ განცხადებას სერგო რატიანი გამოეხმაურა და მინისტრის მიპატიჟებაც მიიღო:
_ თქვენთან ინტერვიუში, თამარ სანიკიძემ განაცხადა, რომ ოპოზიციის, კერძოდ, ჩემი კრიტიკა, აზრს მოკლებულია და მთავაზობს, მიმდინარე პრობლემების განსახილველად, განათლების სამინისტროში მისვლას. რასაკვირველია, ვიღებ ამ მიპატიჟებას (მით უმეტეს, რომ ადრე, სტატუსშეჩერებული სტუდენტების პრობლემის მოგვარებასთან დაკავშირებით, ეს თავად მოვუწოდე) და ვთავაზობ საკითხების ჩამონათვალს, რომლებსაც პრობლემურად მივიჩნევთ.
1. დაახლოებით 60 000 მასწავლებლიდან 20 000-ს აქვს აღებული მასწავლებლის სერთიფიკატი. რატომაა მთავრობის მიერ ინიცირებულ კანონპროექტში ამოღებული მუხლი, რომლის თანახმადაც, მასწავლებლის სერთიფიკატის მოქმედების ვადა 8 წელია?
2. რატომ აწესებს უკვე სერტიფიცირებული მასწავლებლებისთვის ახალ სქემაზე გადასვლა დამატებით პირობებს? ამასთან, მოთხოვნებს ადგენს არა კანონი, არამედ საქართველოს მთავრობა. ეს, თავისთავად, მასწავლებლებს განუსაზღვრელ ვითარებაში აგდებს.
3. რატომ არ ემატებათ მასწავლებლებს და მითუმეტეს, სერტიფიცირებულ მასწავლებლებს ხელფასი იანვრიდან?
4. რატომ ფინანსდება წელიწადში 9-10 ათასი სტუდენტი, როდესაც იმავე თანხით და დაფინანსების ძველი წესით შესაძლებელი იყო დაახლოებით 20 000 სტუდენტის დაფინანსება?
5. რატომ არ აითვისა განათლების სამინისტრომ 2013 წელს საგანმანათლებლო დაწესებულების ინფრასტრუქტურის განვითარების მუხლით გათვალისწინებული, დაახლოებით, 21 მილიონი ლარი, 2014 წლის 6 თვის ანგარიშით კი _ 12 მილიონი ლარი?
6. და ბოლოს, მაინტერესებს, პირადად განათლების მინისტრის პოზიცია მთავრობის მიერ ინიცირებულ კანონზე, რომელიც ითვალისწინებს უმაღლესი სასწავლებლების ფინანსების ხაზინაში გადატანას და რომლითაც იზღუდება უნივერსიტეტების ფინანსური დამოუკიდებლობა, _ აღნიშნა რატიანმა.
განათლებაზე არა, თუმცა, ქვეყანაში არსებულ დემოგრაფიულ ვითარებაზე ისაუბრეს ოზურგეთის სახელმწიფო თეატრში ხელისუფლების წარმომადგენლებმა. შეხვედრა პარლამენტის ჯანდაცვისა და სოციალურ საკითხთა კომიტეტის ინიციატივით გაიმართა ადგილობრივი მოსახლეობის ინფორმირების მიზნით, თუ რა დემოგრაფიული საფრთხის წინაშე დგას ჩვენი ქვეყანა და რა ნაბიჯებს დგას სახელმწიფო ამ მწვავე პრობლემის მოსაგვარებლად. როგორც ამ შეხვედრაზე ითქვა, გურია იმ რეგიონებს შორისაა, სადაც სიკვდილიანობა შობადობას სჭარბობს.
გასული კვირის ერთ-ერთი ხმაურიანი თემა პარლამენტარ ზურაბ ტყემალაძის განცხადება გახდა _ პენსიის ათი ლარით მომატება, პარლამენტარის აზრით, სერიოზული წინ გადადგმული ნაბიჯია. კითხვას, მას პირადად რამდენ დღეს ეყოფა 160 ლარი, ტყემალაძემ მუშნი ზარანდიასავით პათეტიკურად უპასუხა: "160 ლარი კი არ უნდა მეყოს, მე უნდა ვეყო 160 ლარს! ეს სწორად დასმული შეკითხვა არ არის."
არადა, ამ პასუხის ავტორის ქონებრივი დეკლარაცია იმდენად მსუყეა, რომ საქართველოში მცხოვრებ ყველა პენსიონერს მინიმუმ ერთი წელი დასჭირდება მსგავსი ქონების შესაგროვებლად.
ტყემალაძისგან განსხვავებით, პენსიის ათი ლარით მატება შეურაცხმყოფელია პენსიონერებისთვის, რომლებმაც თავიანთი მოსაზრება ჩვენ კორესპონდენტებთან _ გიორგი გირკელიძესთან და ჟანა მეგრელიშვილთან საუბრისას დააფიქსირეს.
ამავე ჟურნალისტებმა ჩაწერეს ინტერვიუ დიმიტრი ხუნდაძესთან და ყველა იმ აქტუალური თემით დაინტერესდნენ, რაც საზოგადოებისთვის ძალიან მნიშნელოვანია, მათ შორის სასწრაფო სამედიცინო დახმარების სამსახურის მომსახურებაზისა და აქილევსის ქუსლად ქცეულ 112-ის შესახებ.
დიმიტრი ხუნდაძემ G_News TV-სთან საუბრისას აღნიშნა, რომ 112-ის სამსახური, რომლის მომსახურების თანხა, თითოეულ მოქალაქეს მობილური ტელეფონის ბალანსიდან ყოველთვიურად ეჭრება, პრობლემას ნამდვილად წარმოადგენს:
_ გეთანხმებით, 112 ნამდვილად პრობლემაა, თუმცა, ამ კუთხით უკვე ძალიან მნიშვნელოვანი ნაბიჯებია გადადგმული, გამოძახებიდან მისვლის ადგილამდე დრო უნდა იყოს მინიმალიზებული, ეს უნდა ხდებოდეს ცენტრალიზებულად, _ ამბობს ხუნდაძე.
_ ბატონო დიმიტრი, სასწრაფო სამედიცინო დახმარების არაეფექტურად მუშაობას, გამოძახებებზე დაგვიანებას მანქანების არქონას უკავშირებენ… მართალია, ოზურგეთს ერთი ახალი ავტომობილი გადმოეცა, თუმცა, პრობლემა პრობლემად დარჩა. იგივე სიტუაციაა ჩოხატაურსა და ლანჩხუთში, სადაც ძველი, გაუმართავი ავტომობილები ჰყავთ… ამ პრობლემის დროულად მოგვარებისთვის რას აკეთებს სახელმწიფო?
_ ავტოპარკი კატასტროფულ მდგომარეობაშია და ჩვენ ეს პრობლემა, შეგვიძლია ითქვას, რომ უკვე მოვაგვარეთ. წლის ბოლომდე სრულიად ახალი 180 ავტომანქანა გვეყოლება, რომლებიც თანამედროვედ არის აღჭურვილი. ეს არის დაბალი გამავლობის მანქანები. ისინი ეტაპობრივად შემოდის და ახალ წლამდე ყველა ადგილზე იქნება. საშუალო და მაღალი გამავლობის მანქანები უკვე შემოსულია და მიდის მისი კომპლექტაცია. შესაბამისად, 140 მანქანა წლის ბოლომდე გადაეცემა ყველა მუნიციპალიტეტს, შეგიძლიათ, ჩათვალოთ, რომ ეს პრობლემა უკვე მოგვარებულია.
_ ბატონო დიმიტრი, გურია იმ რეგიონებს შორისაა, სადაც სიკვდილიანობა შობადობას აჭარბებს. ხომ არ უკავშირებთ ამას რეგიონში არსებულ მძიმე სოციალურ ფონს?
_ რა თქმა უნდა, ერთ-ერთი მნიშვნელოვანი ფაქტორი სოციალური გარემოა _ ქვეყანაში მოსახლეობის 10 -12 პროცენტი სოციალურად დაუცველია. ეს არის მნიშვნელოვანი პრობლემა. სწორედ ამიტომ, ჩვენ ხელისუფლებაში მოსვლისთანავე გამოვაცხადეთ მთავარ პრიორიტეტად ჯანდაცვა და სოციალური სფერო. ყურადღება გავამახვილეთ ყველაზე ღირებულზე _ ადამიანზე, მის ჯანმრთელობაზე… შესაბამისი პრიორიტეტები საფინანსო დოკუმენტში აისახა.
_ ქვეყანაში არსებული ბევრი პრობლემიდან ერთ-ერთი ოჯახური ძალადობაა. რა ნაბიჯებს დგამს სახელმწიფო ამ პრობლემის მოსაგვარებლად გარდა ოფიციალური განცხადებებისა?
_ ოჯახური ძალადობა ყოველთვის იყო. ახლა, უბრალოდ, უფრო ბევრი შემთხვევები გამოდის სააშკარაოზე. მე თვითონ მქონდა შსს-ში შეხვედრა იმ პირებთან, ვისაც სტატისტიკასთან ხელი მიუწვდება. იქ დავრწმუნდი, რომ ასეთი დანაშულის მატებას ადგილი არ აქვს, მაგრამ დავინტერესდი ერთი რამით და, ასე ვთქვათ, მოყვარულის დონეზე მოვიძიე, რამდენი დანაშაული შუქდებოდა ერთ-ერთი კონკრეტული ტელევიზიის მხრიდან, რამდენი იყო ერთ-ერთ გასულ წელს ასეთი დანაშაული და რამდენი შუქდება ამ წელს ამავე ტელევიზიის მხრიდან. როცა იყო იმ წელს ორი ასეთი დანაშაული გამოტანილი სააშკარაოზე, რეალურად მომხდარი იყო 11. წელს იგივე ამ ტელევიზიის მხრიდან იგივე დანაშაული იყო ყველა სამ საათში ერთხელ გაშუქებული. ამის გამო, პატრიარქმაც ითხოვა, რომ ხალხს სტრესში ნუ აგდებთო. მოსახლეობას ინფორმაცია უნდა მიეწოდოს, მაგრამ იმ დოზით, რა დოზითაც შეიძლება იყვნენ ინფორმირებული.
_ როდის და როგორ გაუმჯობესდება სოციალურად დაუცველთათვის სტატუსის მინიჭების საკითხი?
_ ის კრიტერიუმები, რითაც ხდება სოციალურად დაუცველთათვის სტატუსის მინიჭება, აბსოლუტურად არაობიექტური და უსამართლოა. ამ კრიტერიუმით შეფასების დროს, ზოგჯერ ოჯახი, რომელიც რეალურად ამ სტატუსის მატარებელი უნდა იყოს და შემწეობას იღებდეს, ვერ იღებს. ეს იყო წინა ხელისუფლების სახელმძღვანელო, რომელიც მორგებული იყო წინასაარჩევნო სისტემასთან და მიჰყვებოდა პირდაპირ საარჩევნო კალენდარს, წინასაარჩევნოდ ხდებოდა დახმარების მატება, არჩევნების შემდეგ კი _ კლება.
ჩვენ, ბოლო ექვსი თვის განმავლობაში, იუნისეფის მხარდაჭერით, ჩავატარეთ კვლევა. მომავალი წლიდან აუცილებლად მოხდება ოჯახების ახალი კრიტერიუმებით შეფასება. ეს კრიტერიუმები დამყარებული იქნება ძირითადად ობიექტურ მიზეზებზე, გავითვალისწინებთ ოჯახის ქონებრივ, ფინანსურ რესურსს, ყოფით მდგომარეობას. ვფიქრობ, კრიტერიუმები იქნება მეტად სამართლიანი და ობიექტური. ჩვენ გავაორმაგეთ სოციალური დახმარებები. რასაკვირველია, ესეც ცოტაა, მაგრამ იმას, რაც იყო, ნამდვილად ჯობს.
გადაცემის _ "კვირის თემა" _ სრული ვერსიის ნახვა შეგიძლიათ აქ.
