ბოლო დღეებში საზოგადოებაში აქტიური განხილვის თემაა ჭადრაკის ფედერაციისთვის სპორტისა და ახალგაზრდობის საქმეთა სამინისტროდან გამოყოფილი ოთხწლიანი ბიუჯეტი – 38.5 მილიონი ლარი.
საზოგადოების უკმაყოფილებაც ამან გამოიწვია, რადგან თითო წელიწადზე გადანაწილებით ეს თანხა ბევრად ძვირი გამოდის, ვიდრე რამდენიმე წამყვანი სპორტული ფედერაციის ბიუჯეტი ერთად აღებული. მაგალითად, წლეულს ძიუდოს წლიური ბიუჯეტი 2 300 ათასი ლარია, ჭიდაობისა – 2 500 ათასი, კალათბურთის და ფეხბურთისა – 7-7 მილიონი.
როგორც საქართველოს ჭადრაკის ფედერაციის პრეზიდენტმა გია გიორგაძემ განმარტა, ამ თანხიდან 32 მილიონი ლარი მიზნობრივი გრანტია, რომელიც განკუთვნილია ორი შეჯიბრებისთვის – 2018 წლის მსოფლიოს თასისა და 2018 წლის საჭადრაკო ოლიმპიადისთვის. ეს ორი შეჯიბრება ერთ პაკეტში განიხილება და ჭადრაკის საერთაშორისო ფედერაცია (ფიდე) ოლიმპიადის მასპინძლობის უფლებას ისე არ მოგცემს, წინა წელს მსოფლიოს თასსაც თუ არ ჩაატარებ.
მსოფლიოს თასი 2017 წელს თბილისში ჩატარდება და მასში 128 მონაწილე ითამაშებს. მხოლოდ საპრიზო ფონდი 1 530 თასი ლარია, მთლიანი ბიუჯეტი კი დაახლოებით 3 მილიონი დაჯდება (მონაწილეთა მიღება, გზის ფული – 800 ევროს ექვივალენტი ევროპელებზე, სხვებზე – 1200-სი; მინიმუმ, 4-ვარსკვლავიან სასტუმროში ცხოვრება; მსაჯების მიღება-დაბინავება, სხვადასხვა აქტივობები…).
საჭადრაკო ოლიმპიადას ბათუმი უმასპინძლებს, სადაც დაახლოებით 3 ათასამდე სტუმარს ელოდებიან. მათთვის სასტუმროს თანხა ორგანიზატორმა უნდა გადაიხადოს, თან ოლიმპიადა 2 კვირა გრძელდება, ქართულმა მხარემ კი ვალდებულება აიღო მათ 5-ვარსკვლავიან სასტუმროებში განთავსებაზე. ეს მათი ერთგვარი ხრიკი იყო წინასაარჩევნო კამპანიისას სამხრეთ აფრიკული დარბანის წინააღმდეგ, ვისაც უკვე აქვს გამზადებული ინფრასტრუქტურა ამგვარი ღონისძიების სამასპინძლოდ.
საგანგებოდ ამ ოლიმპიადისთვის, ბათუმში დარბაზის აშენება არ იგეგმება.
სავარაუდოდ, გამოიყენებენ ერთ-ერთ მშენებარე სპორტულ დარბაზს, რომელსაც საქართველოს სპორტისა და ახალგაზრდობის საქმეთა სამინისტრო აშენებს.
ბოლო დღეებში ასევე გაირკვა, რომ ამ ოლიმპიადის მასპინძლობაზე თანხმობა საქართველოს მთავრობას განუცხადებია ჯერ კიდევ 2012 წელს, ბიძინა ივანიშვილის პრემიერობისას, და გარანტიებიც გაუცია, რაც საქართველოს ჭადრაკის ფედერაციამ განაცხადთან ერთად წარუდგინა ფიდე-ს. ეს ოლიმპიადაც მთლიანად სახელმწიფო ბიუჯეტიდან ფინანსდება და მის ჩატარებაში სპონსორები არ მონაწილეობენ.
ჩვენი ოლიმპიადა ბევრად ძვირი დაჯდება გაისად ბაქოში გასამართავ ანალოგიურ თამაშებზე, რადგან საქართველოს ჭადრაკის ფედერაციამ მომენტით ისარგებლა და ოლიმპიადას ქვეყანაში ჭადრაკის განვითარების სახელწიფო პროგრამაც მიაბა, რადგან არაერთი მცდელობის მიუხედავად, სამთავრობო დონეზე მის განხილვასაც ვერ მიაღწია, არათუ – დამტკიცებას და დახმარებას.
