მიწის დაუმუშავებლობისთვის სანქციები მცირემიწიან ფერმერებს არ შეეხებათ

მთავრობის ეკონომიკური გუნდის ახალმა ინიციატივამ, დაუმუშავებელი მიწებისთვის სანქციების დაკისრების შესახებ,  საზოგადოებაში მითქმა-მოთქმა გამოიწვია.

როგორც სოფლის მეურნეობის სამინისტროში აცხადებენ, პროექტი ჯერ-ჯერობით იდეის დონეზეა, თუმცა აზუსტებენ, რომ სანქციები არავითარ შემთხვევაში მცირემიწიან ფერმერებს არ დაუწესდებათ:

"მცირემიწიან ფერმერებს, პირიქით,  ვეხმარებით. მათი დამხარეების პროგრამა სამწლიანი იყო და შედეგები უკვე მოიტანა. გლეხებისთვის აგრობარათების გაცემა წელსაც გაგრძელდება.  მთავრობის ეკონომიკური გუნდის ინიციატივა კი, რომელიც ჯერ დამუშავების პროცესშია,  იმას გულისხმობს, რომ იმ  ფერმერებმა, რომლებიც დიდი ფართობის მიწებს ფლობენ და არ ამუშავებენ, უნდა გამოიყენონ, ან ვინმეს იჯარით გადასცენ. ჩვენ არ გვაქვს იმის ფუფუნება, რომ მიწა დაუმუშავებელი გვქონდეს", _ აცხადებენ სამინისტროში.

სოფლის მეურნეობის სამინისტროს მონაცემებით, დღეს საქართველოში, დაახლოებით, 750 000 ჰექტრამდე სახნავი მიწის ფართობია, საიდანაც 400 000 ჰექტარამდე მუშავდება. ვინაიდან სამინისტრო 2013 წლიდან მცირემიწიან ფერმერებსა და გლეხებს ხვნის სამუშაოებში ეხმარება, დაუმუშავებელი მიწების უმეტესი ნაწილი არა გლეხებისა და ფერმერების მცირე მიწებია, არამედ, როგორც უწყებაში აცხადებენ, კერძო საკუთრებაში არსებული მიწის დიდი, ათეულობით ჰექტარი მასივები, რომლებიც კერძო პირებმა ან კომპანიებმა შეიძინეს და უკვე წლებია ხელუხლებელია.

"ხელისუფლებისთვის მნიშვნელოვანია მაქსიმალურად შეუწყოს ხელი მათ, ვინც სასოფლო-სამეურნეო მიწას ამუშავებს და ადგილობრივი, ხარისხიანი პროდუქცია მოჰყავს. ამ მიმართულებით მთავრობაში კონსულტაციები მიმდინარეობს. ხელისუფლების მიდგომა ასეთია:  ერთი მხრივ, პირობითად, შევუმციროთ გადასახდი მათ, ვინც მიწას ამუშავებს და, მეორე მხრივ, გავუზარდოთ მათ, ვისაც საკუთრებაში არსებული სასოფლო-სამეურნეო მიწის ათეულობით ჰექტარი ფართობი წლებია მიტოვებული და დაუმუშავებელი აქვს. მნიშვნელოვანია, გაჩნდეს სტიმული, მფლობელებმა აღნიშნული მიწის ფართობები დაამუშაონ/ გასცენ იჯარით ან იქონიონ ისეთ მდგომარეობაში, რომ პრობლემები არ შეუქმნან მომიჯნავე ნაკვეთებს", _ ნათქვამია განცხადებაში, რომელსაც სოფლის მეურნეობის სამინისტრო ავრცელებს.

დაუმუშავებელ მიწებზე შესაძლო სანქციების დაწესებას საქართველოში ზოგი მიესალმება, ზოგი კი ამას კერძო საკუთრებაში ჩარევად მიიჩნევს.

თბილისის ფორუმის მომხმარებლები აქტიურად განიხილავენ ამ თემას:

"ვისაც მანქანა ჰყავს და დღეში ერთ საათზე მეტს არ დადის მანქანით, იმასაც დააკისრეთ სანქციები…ვისაც ტელევიზორი აქვს და არ უყურებს…ვისაც სახლი აქვს და შიგ არავინ ცხოვრობს….ვისაც ბეჭედი აქვს და არ იკეთებს…. იდიოტიზმი გვიახლოვდება".

"ვისაც ბანკში ფული აქვს და არ ხარჯავს, დახვრიტონ ბარემ.”

"მივესალმები ამ კანონს, არიან ოჯახები, რომლებსაც ედიკას და მიშას დროს ჰექტრობით მიწები აქვთ ხელში ჩაგდებული. რომლებიც ისე უგდიათ: არც წყალს გვთხოვს და  არც პურს, ეგდოს  რაო!   ჰოდა იხადონ ახლა ჯარიმა ან დაამუშაონ ან სხვა დაამუშავებს და მოიყვანს მოსავალს, არაა პრობლემა!"

"საკუთრების უფლება ჯერ არავის გაუუქმებია. მე თუ მინდა მიწა ვიყიდო მხოლოდ იმისთვის, რომ ინვესტიცია განვახორციელო და 10 წელიწადში ძვირად გავყიდო, ვისი რა საქმეა, მე როგორ ვიყენებ ჩემს საკუთრებას? როდიდან დაწესდა დემოკრატიულ ქვეყნებში პრინციპი, რომ საკუთრების არამიზნობრივი განკარგვისთვის ჯარიმები წესდება?"

"საქართველო მცირემიწიანი ქვეყანაა. დავამუშაოთ მიწები, ან გადავიხადოთ ჯარიმა და ასე მაინც დავეხმაროთ ბიუჯეტს. მეც მაქვს დაუმუშავებელი მიწა (აგარაკის ტერიტორია), აწი რამეს მოვიფირებ… და ეს მე პირადად ნამდვილად სამართლიანად მიმაჩნია…".

"ჰოლანდია ავიღოთ მაგალითად. ხალხს ტერიტორიები  არ ჰყოფნის. შენობებზე თესავენ და მოყავთ მოსავალი. ჩვენ მადლიანი მიწები გვაქვს და არ ჯობია მოვუაროთ? მიტაცება რომ ვიცით ჰექტრობით, მაგრამ ხელის გატოკება არ გვიყვარს, ასე არაა ბიძია".

"ცოტა პატრიოტულად მეგობრებო! პატრიოტულად! ქვეყნის შენება/ფეხზე დაყენება მსხვერპლს მოითხოვს… სულიერს, ხორციელს, ფინანსურს… გონივრულად!…. " _  წერენ ფორუმის მომხმარებლები.

მთავრობის ახალ ინიციატივაზე საბოლოო სიტყვა პარლამენტს ეკუთვნის. რაც შეეხება პარლამენტის პოზიციას, როგორც აგრარულ საკითხთა კომიტეტის თავმჯდომარე გიგლა აგულაშვილი ამბობს, პარლამენტი მას შემდეგ იმსჯელებს ამ საკითხზე, როდესაც განსახილველად შეიტანენ.

"პარლამენტში ჯერ არ შემოსულა ეს ინიციატივა.  თუმცა მე, პირადად,  ვხედავ ასეთი რეგულაციის საჭიროებას, მაგრამ არა იმ თვალსაზრისით, რომ ვინმე დავსაჯოთ. არამედ ხელი შევუწყოთ, რომ ჩვენს ქვეყანაში პროდუქცია იქმნებოდეს. მიწა იძლეოდეს სარგებელს მიწის მფლობელისთვის და  სახელმწიფოსთვისაც", _ გვითხრა აგულაშვილმა.