ბოლო დროს სულ უფრო აქტუალური ხდება "პანორამა თბილისის" პროექტი, რომლის განხორციელებაც ქალაქის ისტორიულ ნაწილში – სოლოლაკის ქედზე, თავისუფლების და ერეკლეს მოედნების ტერიტორიაზე იგეგმება.
იმის გათვალისწინებით, რომ "პანორამა თბილისის" პროექტის ძველ თბილისში განხორციელება შეცვლის ქალაქის მასშტაბს, ახალ ნიშნულად იქცევა შემდგომი მშენებლობებისთვის და საბოლოოდ უარყოფითად აისახება ძველი თბილისის იერსახეზე, ჩვენ, ამ პეტიციის ხელმომწერები მოვითხოვთ, რომ პროექტი არ განხორციელდეს ქალაქის ისტორიულ ნაწილში. ამასთან ვაცხადებთ, რომ:
პროექტს არ ახლავს დასაბუთება იმის შესახებ თუ რატომ არის აუცილებელი ამ პროექტის განხორციელება სოლოლაკის ქედის, თავისუფლების მოედნის და ერეკლეს მოედნის ტერიტორიაზე და რა სარგებელს მოუტანს ის თბილისის ისტორიულ ნაწილს, როგორც ურბანულ ძეგლს. პროექტი ეწინააღმდეგება იმ სახელოვნებათმცოდნეო კვლევებს, რომელიც საპროექტო დოკუმენტაციის ნაწილია და რის მიხედვითაც რეკომენდირებულია შენობათა გაბარიტები, სილუეტი და მოცულობა არ იყოს ამოვარდნილი ტრადიციულად ჩამოყალიბებული ურბანული ქსოვილიდან და ლანდშაფტიდან;
1999 და 2001 წლებში თბილისის ისტორიული ნაწილი წარსდგა UNESCO-ს მსოფლიო მემკვიდრეობის ნუსხაში. დღეისათვის ნომინირებული ძეგლი, მსოფლიოს 11 ძეგლთან ერთად იმყოფება წინასწარ სიაში და ელოდება გადაწყვეტილებას. სწორედ ნომინირებული ძეგლის ტერიტორიის საზღვრებში "პანორამა-თბილისის" მასშტაბის პროექტის განხორციელება აუცილებლად გახდება UNESCO-ს მხრიდან უარის თქმის საფუძველი. აღნიშნული კი ნეგატიურ გავლენას მოახდენს როგორც კულტურული მემკვიდრეობის, ასევე ქვეყნის პოპულარიზაციის საკითხზე.
სატრანსპორტო თვალსაზრისით არსებობს რისკი, რომ გადაიტვირთოს სამივე სალოკაციო ტერიტორიასთან მისასვლელი გზები, რაც დისკომფორტს შეუქმნის როგორც ისტორიულ ზონაში მცხოვრებ და ზოგადად ქალაქის დანარჩენ მოსახლეობას, ასევე თბილისის სტუმრებს.
გასათვალისწინებელია ისიც, რომ სატრანსპორტო ნაკადების ზრდით გამოწვეული გამონაბოლქვი დაამძიმებს ისედაც რთულ ეკოლოგიურ მდგომარეობას, რაც დამატებით საფრთხეს შეუქმნის მოსახლეობის ჯანმრთელობას.
გარემოსდაცვითი თვალსაზრისით დაუშვებელია სოლოლაკის ქედის, როგორც ლანდშაფტური ტერიტორიის ხელყოფა. ასევე, ბეტონის მოცულობებში დარგული ნერგები ვერ იქნება იმ ეკოსისტემის შემცვლელი, რომლის გაჩეხვაც გათვალისწინებულია პროექტის მიხედვით.
"პანორამა-თბილისი" არის კომერციული და არა სოციალური პროექტი. მისი განხორციელება მომგებიანი იქნება პროექტის ინვესტორისთვის და არა ისტორიული ქალაქისა და მოსახლეობისთვის.
არგუმენტი რომ მისი განხორციელების შემთხვევაში დასაქმდება რამდენიმე ათასი ადამიანი, ვერ ჩაითვლება მყარ საფუძვლად, ვინაიდან პროექტის სხვა ადგილას განხორციელების შემთხვევაშიც შესაძლებელია სამუშაო ადგილების გაჩენა. უფრო მეტიც, პროექტის ისტორიული ქალაქის მიღმა განხორციელება შექმნის ახალი მიზიდულობის ცენტრს, სადაც შესაძლებელი იქნება როგორც აღნიშნული პროექტის განვითარება და გაფართოება, ასევე ახალი ინვესტიციების მოზიდვა.
ჩვენ ღიად ვაცხადებთ, რომ ყველა შესაბამისმა სახელმწიფო, თუ ადგილობრივი ხელისუფლების ინსტიტუციამ მხედველობაში უნდა მიიღოს "პანორამა თბილისის" პროექტისადმი არსებული უაღრესად მაღალი საზოგადოებრივი ინტერესი და უზრუნველყოს პროექტთან დაკავშირებული ყველა ეტაპის საჯაროობა. ყველა დაინტერესებულ პირს საშუალება უნდა მიეცეს დაარწმუნოს შესაბამისი გადაწყვეტილების მიმღები პირები, რომ "პანორამა თბილისის" პროექტის ქალაქის ისტორიულ ნაწილში განხორციელება დაუშვებელია და არ ემსახურება ისტორიული ქალაქის ინტერესებს.
ქალაქი ეკუთვნის ხალხს და არა კონკრეტულ მიწაზე საკუთრების უფლების მქონე იურიდიულ თუ ფიზიკურ პირს.
ხელმომწერები: ტფილისის ჰამქარი; პარტიზანული მებაღეობა; იარე ფეხით; თბილისის არქიტექტურული ფორუმი; ჩემი ქალაქი; კამპუსი; მწვანე ალტერნატივა; მწვანე მუშტი; საყდრისის გადარჩენის საზოგადოებრივი კომიტეტი; საზოგადოებრივი ინიციატივა "გადავარჩინოთ რვაფეხა"; საზოგადოება "ბათომი"; ფრონტლაინ-ჯორჯია; თანამედროვე ხელოვნების ცენტრი-თბილისი; სამოქალაქო საზოგადოების ინსტიტუტის ბათუმის ფილიალი; რაჭის დამცველები; ანტიტექტურა.
