ზამთრის გრძელი ღამეები ქსოვის მოყვარული ქალბატონებისთვის შესაშური დროა. ვისაც ქსოვა გიყვართ ან მის ანაბანას მაინც ფლობთ, გთავაზობთ რეგლანით ქსოვის წესს. მართალია, ვის მიკერებული სახელო მოსწონს და ვის კიდევ _ რეგლანი, მაგრამ გაითვალისწინეთ, რომ რეგლანით ნაქსოვი მოდაშია.
რეგლანის ქსოვა ზემოდან იწყება. ამისთვის უნდა გამოიყენოთ წრიული ჩხირები. გვახსოვდეს, რომ 1 სანტიმეტრში საშუალოდ ორი თვალი ჯდება. გაზომეთ თქვენი კისრის (ან იმისი, ვისაც უქსოვთ) გარშემოწერილობა და ორზე გაამრავლეთ (ვთქვათ, 52 სმ-ია. დაგვჭირდება 104 თვალის აკრეფა მარჯვენა ხელით დაკავებულ შეტყუპებულ ჩხირზე).
მოვქსოვოთ რეზინი: ერთი თვალი წაღმა, ერთიც _ უკუღმა. რეზინი მოქსოვეთ ორი ან სამი თითის სიბრტყეზე, თუ გსურთ, უფრო მეტიც. ამის შემდეგ ქაღალდი და კალამი მოიმარჯვეთ და თუ გაქვთ 104 თვალი, ანუ ამდენ თვალზეა რეზინი მოქსოვილი, გამოაკელით რვა თვალი რეგლანისთვის, რეგლანის ხაზებისთვის საჭიროა 2-2 თვალი. გავყოფთ სამზე, ანუ უკანა, წინა და მხრებისთვის განკუთვნილ თვლებზე: 104_8=96, 96:3=32
პირველი: 32 თვალს (უკანა ნაწილი) უნდა გამოვაკლოთ 4 თვალი, _ რეგლანის უკანა ხაზების 4 თვალი.
მეორე: 32 თვალსაც რეგლანის წინა ხაზებისთვის განკუთვნილ 4 თვალს გამოვაკლებთ და 2-ზე გავყოფთ. 14 თვალი ერთი მხრისაა, 14 თვალი _ მეორესი. დაგვრჩა მესამე ნაწილი _ 32 თვალი და მას რეგლანის ხაზის რვავე თვალი მივამატოთ _ 32+8=40. ეს 40 თვალი უკვე წინა ნაწილისაა. ეს პრინციპი გამოიყენება ყველა შემთხვევაში, რა ზომისაც არ უნდა იყოს კისერი, რამდენი თვალიც უნდა ეტეოდეს სანტიმეტრში და როგორ ძაფსა და ჩხირზეც უნდა ვიწყებდეთ ქსოვას. ოღონდ, თვლების რაოდენობა შესაბამისად უნდა გაზარდოთ ან შეამციროთ. დავიწყოთ რეზინის გაგრძელება მარტივი სახით _ წინდისებური ქსოვით. პირველი მწკრივის გავლებისას ნახაზის მიხედვით გადავთვალოთ თვლები, ნემსითა და ძაფით აღვნიშნოთ რეგლანის 2-2 ხაზი. რეგლანის ხაზის აქეთ-იქით წაღმა პირის ქსოვისას, აუცილებელია მატება. მატება ნიშნავს ყულფის გაკეთებას და მოუქსოვლად მარჯვენა ჩხირზე გადატანას.
გულისპირზე რომ კარგად დადგეს ჯემპრი ან კაბა და ყელზე ცუდად არ მოგებჯინოთ, ამისთვის საჭიროა რეგლანის ხაზების დანიშვნის შემდეგ, წრიულად კი არ ვქსოვოთ, რეგლანის უკანა ხაზებს, აქეთ-იქით, 3-4 თვალით გადმოცადეთ, შევწყვიტოთ ქსოვა და ისევ უკან გავბრუნდეთ. შემდეგ მწკრივზე ისევ რამდენიმე თვალით გადმოვცდეთ წინა ნაქსოვს და ასე გავაგრძელოთ, ვიდრე თვლები ერთმანეთს მკერდის ჭრილთან არ შეხვდება. რაც უფრო დიდი ჭრილი გინდათ მკერდთან (მით უფრო, თუ დეკოლტეს აკეთებთ), მით ნაკლები თვლებით უნდა გადმოცდეთ წინა ნაქსოვს _ ანუ შეწყვიტოთ იმ მწკრივის ქსოვა და უკან გაბრუნდეთ.
