საჯარო სამსახურის ბიუროს ვებ-გვერდზე, სადაც თანამდებობის პირების ქონებრივი დეკლარაციებია განთავსებული, რამდენიმე პირის დეკლარაცია არ იძებნება.
"გურია ნიუსის“ მიერ გადამოწმებული ინფორმაციით, ვებ-გვერდზე არ არის მთავარი პროკურორის გიორგი ბადაშვილის დეკლარაცია, რასაც საჯარო სამსახურის ბიურო ტექნიკური ხარვეზით ხსნის, თუმცა მისი აღმოფხვრის ვადებს ვერ აკონკრეტებს.
როგორც საჯარო სამსახურის ბიუროს ცხელი ხაზის ოპერატორი ამბობს, რომ ამ შემთხვევაში ბიუროს საჯარო ინფორმაციის გამოთხოვაზე პასუუხისმგებელ პირის უნდა მივმართოთ და დეკლარაცია დაუყოვნებლივ გადმოგვეგზავნება.
"კონკრეტულად გიორგი ბადაშვილის დეკლარაციასთან დაკავშირებით არის ტექნიკური ხარვეზი, ამიტომ ვერ ხედავთ თქვენ საიტზე, მაგრამ შეგიძლიათ მოგვწეროთ ელექტრონულ ფოსტაზე და გამოგეგზავნებათ“, _ განმარტა ოპერატორმა.
ცნობისთვის, გიორგი ბადაშვილის ფინანსური მდგომარეობის შესახებ ინფორმაცია "გურია ნიუსმა“ მისი დანიშვნის შემდეგ გამოაქვეყნა. თუმცა, შეიცვალა თუ არა მთავარი პროკურორის ფინანსური მდგომარეობა, ინფორმაციის მოწოდებამდე, უცნობია.
აღსანიშნავია ისიც, რომ საჯარო სამსახურის ბიუროს ვებ-გვერდზე კიდევ რამდენიმე პირის დეკლარაციას დეტალური ძებნა სჭირდება. მათ შორისაა საქართველოს პრემიერ-მინისტრის, ირაკლი ღარიბაშვილის 2014 წლის დეკლარაციაც.
კითხვაზე, რატომაა საჭირო კონკრეტული პირების დეკლარაციებს გაფართოებული ძებნა, როდესაც სხვა საჯარო მოხელეების დეკლარაციები სახელის და გვარის მითითებითაც იძებნება, საჯარო სამსახურის ბიუროს ოპერატორი გვპასუხობს, რომ "ხანდახან ასე არის საჭირო, ეს არის პროგრამული მხარე“.
როგორც "ინფორმაციის თავისუფლების განვითარების ინსტიტუტის" (IDFI) მკვლევარი გოგა თუშურაშვილი "გურია ნიუსთან“ საუბრისას ამბობს, მსგავსი პრობლემები ხშირად არის, თუმცა ინფორმაციის გამოთხოვის შემდეგ დეკლარაციებს დაუბრკოლებლად იღებენ.
"ეს პრობლემა, სამწუხაროდ, ხშირად დგას. არის შემთხვევები, როდესაც ვებ-გვერდზე კონკრეტული თანამდებობის პირის ინფორმაციის მოძიება საერთოდ ვერ ხერხდება, მაგრამ როდესაც ოფიციალურად გამოვითხოვეთ ინფორმაცია, მოგვაწოდეს. რა თქმა უნდა, ეს ძალიან ცუდია, მაგრამ იმის შემოწმების ბერკეტი არ გვაქვს, ხელოვნურად ხდება ამ ინფორმაციების დაფარვა საიტიდან, თუ ტექნიკურ პრობლემასთან გვაქვს საქმე. თუ ეს ტექნიკური პრობლემაა, მაშინ ეს რაც შეიძლება სწარფად უნდა აღმოიფხვრას“, _ ამბობს თუშურაშვილი.
მისივე თქმით, საქართველო ერთ-ერთი გამორჩეული ქვეყანაა, სადაც ყველა საჯარო თანამდებობის პირის ქონებრივი დეკლარაცია საიტზეა და ერთ საჯარო სივრცეშია მოქცეული.
"ძალიან სამწუხაროა, რომ როცა ინფორმაცია საიტზე უნდა იყოს, დაინტერესებული პირი ამ დეკლარაციას ვერ პოულობს. მაგალითად, ასევე არ იძებნებოდა დიმიტრი დარბაისელის დეკლარაცია. ვიცოდით, რომ ვებ-გვერდზე უნდა ყოფილიყო განთავსებული, თუმცა გარკვეული პერიოდის განმავლობაში ის გამქრალი იყო საიტიდან და არ იძებნებოდა. თუმცა ინფორმაციის გამოთხოვის შემდეგ ეს ინფორმაცია მოგვაწოდეს“, _ ამბობს თუშურაშვილი.
ცნობისთვის, თანამდებობის პირი ქონებრივი მდგომარეობის დეკლარაციას რამდენიმე შემთხვევაში ავსებს. კონკრეტულად კი – თანამდებობაზე გამწესებიდან ორი თვის ვადაში; თანამდებობის დატოვებიდან ორი თვის ვადაში; თანამდებობაზე ყოფნის განმავლობაში ყოველწლიურად, ყოველი წინა დეკლარაციის შევსების თარიღიდან ერთი წლის გასვლის შემდეგ, ერთი კვირის ვადაში; საქართველოს პარლამენტის წევრობის კანდიდატი, კანდიდატად რეგისტრაციიდან ერთი კვირის ვადაში; დეკლარაციის ვადაში წარუდგენლობის შემთხვევაში, ჯარიმის დაკისრებიდან 2 კვირის ვადაში.
