დაბა ურეკში სამწვრთნელ შეკრებაზე მყოფ ლანჩხუთის "გურიას" ორი უკრაინელი ფეხბურთელი შეუერთდა. კლუბის მთავარი მწვრთნელის, თემურ ლორიას ინფორმაციით, ერთ-ერთი ბელორუსული კლუბიდან 26 წლის თავდამსხმელი შეველიურა და დონეცკის "ოლიმპიდან" 20 წლის შემტევი ნახევარმცველი კონოვალოვი "გურიაში" აპირებენ კარიერის გაგრძელებას. სასიამოვნო სიახლეა ისიც, რომ კლუბს დაუბრუნდა ვილი ისიანი, რომელიც შარშანწინ "გურიას" მთავარი მეგოლე იყო და გასულ წელს მშობლიურმა ბოლნისის "სიონმა" დაიბრუნა კიდეც. ვილიმ გასულ შემოდგომაზე ევროთასებზე გამოიჩინა თავი და რამდენიმე გოლიც გაიტანა. თუმცა, შემდგომ მშობლიურ კლუბს ვერ შეეწყო და ხელმეორედ დაუკავშირა ბედი "გურიას". ამასობაში ლანჩხუთელებმა მეორე სპარინგ მატჩი ჩაატარეს და ამჯერზე ურეკის ნაცვლად ლანჩხუთში, სათადარიგო მინდორზე უმასპინძლეს მეტოქეს. ვინაიდან უმაღლესი ლიგის ყველა გუნდი საზღვარგარეთ ემზადება მეორე წრისთვის, საამხანაგო მეტოქედ მხოლოდ პირველი ლიგის გუნდები თუ შემოგვრჩა და "ქედასთან" მარცხის შემდეგ თერჯოლის "საპოვნელასთან" მოუწიათ ჩვენებურებს თამაში. აღსანიშნავია, რომ სასტარტოში თემურ ლორიამ ისიანი და ახალწვეული უკრაინელი კონოვალოვი გაამწესა, ისევე, როგორც შალამბერიძე და კოშკაძე. შეველიურას გასინჯვა ჯერ ტრავმის გამო ვერ მოხერხდა, აი, კონოვალოვმა კი დიდი ვერაფერი შთაბეჭდილება დატოვა.
საერთოდ ძნელია ერთი კვირის შეკრებილი გუნდის შეფასება, მაგრამ პირველ ტაიმში "გურია" პირველი ლიგის ლიდერს ჯობნიდა და ტაიმი ბოლოს ცინცაძის გოლით დაწინაურდა კიდეც. სხვათა შორის, ამ ტანმაღალმა ცენტრალურმა მცველმა უკვე მეორედ გაიტანა.
მეორე ტაიმში მოედანზე ადგილობრივი კადრები _ ინგოროყვა და წილოსანი გამოჩნდნენ, რომლებმაც არც თუ ურიგო თამაში აჩვენეს და მასპინძელთა უპირატესობა კვლავაც შესამჩნევი გახლდათ. ეს შედეგშიც აისახა და ისიანის გოლით "გურიამ" 2-0 იმარჯვა.
