"საქართველოს ყველა ძირითად სავაჭრო პარტნიორ ქვეყანაში პოლიტიკური და ეკონომიკური შოკების გამო, ქართულ ექსპორტს პრობლემები ექმნება," _ ამის შესახებ "ახალგაზრდა ფინანსისტთა და ბიზნესმენთა ასოციაციის" ("აფბა") ანალიტიკოსმა პაატა ბაირახტარმა საგარეო ვაჭრობის იანვრის სტატისტიკაზე დაყრდნობით განაცხადა. ორგანიზაციამ დღეს "რეპორტიორის" პრესკლუბში ბრიფინგი გამართა და ექსპორტის კლების მიზეზები განმარტა.
ექსპორტის 60%-იანი კლება ფიქსირდება რუსეთის მიმართულებით, 75%-მდე შემცირდა უკრაინაში ექსპორტი, 20%-მდე აზერბაიჯანში და დაახლოვებით 30%-ის ფარგლებში დაფიქსირდა ექსპორტის კლება თურქეთში. ჯამში, მიმდინარე წლის იანვარში ექსპორტი 20%-ზე მეტად შემცირდა.
"ყველა ამ მიმართულებით მნიშვნელოვანი პრობლემებია. რუსული კრიზისის გამო საკმაო მოცულობით იკლო ღვინის ექსპორტმა. უკრაინაში საომარი მოქმედებების და ეკონომიკური კრიზისის გამო შემცირებულია ვაჭრობა როგორც ექსპორტის, ისე იმპორტის მიმართულებით. თურქეთში ეკონომიკური ზრდის მნიშვნელობანი შენელებაა და გასული წლის ბოლოს ეკონომიკური ზრდის უარყოფითი მაჩვენებელიც კი დაფიქსირდა. რაც შეეხება აზერბაიჯანს, იქ ექსპორტის უდიდესი ნაწილი ავტომობილების რეექსპორტი იყო, 2014 წლის გაზაფხულზე კი აზერბაიჯანმა 2005 წლამდე ავტომობილების შეყვანა აკრძალა, რის გამოც ქართულ ექსპორტს ავტომობილების რეექსპორტის სახით 200 მილიონამდე დოლარი გამოაკლდა. ეს ეფექტი დღემდე მოქმედებს და ექსპორტის საერთო მაჩვენებელს ამცირებს," _ განაცხადა ანალიტიკოსმა.
ექსპორტის 30%-მდე ზრდა ფიქსირდება ბულგარეთის მიმართულებით, თითქმის გაორმაგებულია ექსპორტი გერმანიაში და 50%-იანი ზრდაა იტალიის მიმართულებით.
"რაც შეეხება იმპორტს, 2015 წლის იანვარში გასული წლის იგივე პერიოდთან შედარებით ექსპორტი დაახლოებით 4%-ით გაიზარდა. აქედან, 12-13%-იანი ზრდა ფიქსირდება თურქეთიდან იმპორტზე, 20%-ს გადააჭარბა ჩინეთიდან იმპორტის ზრდამ, რუსეთიდან იმპორტი იანვარში დაახლოებით 35%-ით გაიზარდა, გერმანიიდან 20%-ით და აშშ-დან 70%-ის ფარგლებში. შემცირება ფიქსირდება აზერბაიჯანიდან, რუმინეთიდან, არაბთა გაერთიანებული ემირატებიდან, ბულგარეთიდან და უკრაინიდან. თუმცა, ღირებულებით გამოსახულებაში ექსპორტის კლების მიუხედავად, აზერბაიჯანის, უკრაინის და რუმინეთის შემთხვევაში გაზრდილია შემოტანილი საქონლის მოცულობა, რაც, "აფბას" შეფასებით, ცალკეულ სასაქონლო პროდუქციაზე, მაგალითად ნავთობპროდუქტებზე ფასების კლებით შეიძლება აიხსნას.
ამდენად, სავაჭრო პარტნიორ ქვეყნებში შექმნილი მდგომარეობა გადამდები აღმოჩნდა ქართული ექსპორტისთვის და "აფბას" შეფასებით, საგარეო ვაჭრობის კუთხით შექმნილი პრობლემების დიდი ნაწილი იმპორტირებულია," _ განაცხადა ბაირახტარმა.
