კოალიცია "ქართული ოცნების" პოლიტსაბჭოს სხდომა, სადაც პარტია "მრეწველების" ხელმძღვანელი პირების მიერ გაკეთებული განცხადებები უნდა განხილულიყო და შესაბამისი გადაწყვეტილება მიეღოთ, ჯერ არ ჩატარებულა.
უფრო კონკრეტულად კი, სხდომაზე გოგი თოფაძის განცხადება – "ოცნების'' პრიორიტეტი ნატო არ არის, არც ლაიტმოტივი" უნდა ყოფილიყო განხილული.
იმას, რომ განცხადებას აღნიშნულ თემასთან დაკავშირებით "ქართული ოცნების" პოლიტსაბჭოს სხდომა მიეძღვნებოდა, საპარლამენტო უმრავლესობის წარმომადგენლები აანონსებდნენ.
ქრონოლოგიურად რომ მოვყვეთ, მოვლენები შემდეგნაირად განვითარდა.
დაახლოებით 1 კვირის წინ, საპარლამენტო უმრავლესობის დეპუტატმა, გოგი თოფაძემ განაცხადა, რომ ნატო-ში არ მიგვიღებენ და არ ღირს ამაზე საუბარით ჩვენი ჩრდილოელი მეზობლების გაღიზიანება.
"ნატო საქართველოს გზა არ არის. რაც არ მომწონს არ ვმალავ. თქვენ გგონიათ ის მომწონს, რომ ნატო-ში შევალთ? ნატო-ში ვინ გვიშვებს ერთი ეს მითხარით. ნატო-ში შესვლა არ უნდოდათ ჩვენ წინამორბედებს? 10 წელი ოცნებად იყო. არ მიგვიღო ამ ნატო-მ, არც მიგვიღებს, არ შეგვიშვებენ ნატო-ში. მე არ მომწონს, რომ ნატო-ა ჩვენი გეზი. არ გვიღებს ნატო", _ განაცხადა თოფაძემ.
თოფაძის ამ განცხადებას მხარი დაუჭირა, ასევე საპარლამენტო უმრავლესობის წარმომადგენელმა, ზურაბ ტყემალაძემაც.
კოალიცია "ქართულ ოცნებაში" პარტია "მრეწველობის" ლიდერების ამ განცხადებებს არაერთგვაროვანი შეფასებები მოჰყვა, ისეთივე როგორსაც თავად თოფაძე პროგნოზირებდა. ის ამბობდა, რომ ამ თემაზე კოალიციაში აზრის სხვადასხვაობაა. თუმცა, მაინც საეჭვოდ მიაჩნდა "ოცნების" არჩევანი – ნატო.
"მეეჭვება, "ოცნებამ'' გადაწყვიტოს, რომ ნატო ჩვენი გზაა. ამ შემთხვევაში, ჩვენ ან იძულებულნი ვიქნებით ავყვეთ კოალიციას, ან დავტოვოთ", _აღნიშნა დეპუტატმა.
სწორედ ამის შემდეგ დაიწყო საპარლამენტო უმრავლესობის დეპუტატების ნაწილმა იმაზე საუბარი, რომ პარტია "მრეწველების" ლიდერების ამ განცხადებებს სპოლიტსაბჭოს სხდომა, მსჯელობა და შესაბამისი გადაწყვეტილებები მოჰყვებოდა.
"საქართველოს ნატო-სთან ინტეგრაციასთან დაკავშირებით, მრეწველთა ლიდერის, გოგი თოფაძის პოზიცია და მისი შესაბამისი განცხადება, მმართველ გუნდში მსჯელობის საგანი იქნება", _ განაცხადა "ქართული ოცნების" ერთ-ერთმა ლიდერმა გიორგი ვოლსკიმ.
დეპუტატების ნაწილმა კი, იმაზე გაამახვილა ყურადღება, რომ თოფაძის აღნიშნული განცხადება ქვეყნის გეზს ვერ შეცვლის.
"მე მინდა ნატო-ს ყველა მომხრე დავამშვიდო და ვუთხრა, ბატონი გოგი თოფაძე არ არის და ვერ არის შემძლე საქართველოს ნატო-ში ინტეგრაციის შეფერხების.
საქართველოსთვის სასიცოცხლოდ მნიშვნელოვანია, ნატო-სა და ევროკავშირის მიმართულებით ნაბიჯებს წინ გადადგმა, მაგრამ სამწუხაროდ, ამ მიმართულებით ტემპი ვერ არის ისეთი, როგორიც უნდა იყოს. ნატო-მ გადაწყვიტა მანევრების ჩატარება", – განაცხადა პარლამენტის თავმჯდომარე დავით უსუფაშვილმა, რასაც პარლამენტის უსაფრთხოების კომიტეტის თავმჯდომარე ირაკლი სესიაშვილიც იზიარებს.
"მთავარია, რომ ქვეყნის ხელისუფლების, სახელმწიფოს პოლიტიკა რა არის და აქ დამატებითი კითხვა არ არსებობს", _ აღნიშნა სესიაშვილმა.
"არჩევანის წინაშე საქართველო საერთოდ არ დგას, ეს არ არის ერთი პოლიტიკური ძალის არჩევანი, ერთი თაობის არჩევანი, ეს არის არჩევანი, რომელიც გაკეთდა ჩვენი წინაპრების მიერ, რომლისთვისაც იბრძოდნენ თაობები", _ ასე გამოეხმაურე თოფაძის განცხადებას პრეზიდენტის მრჩეველი თენგიზ ფხალაძე.
ზემოთ ხსენებული განცხადების გაკეთებიდან რამდენიმე დღეში, თოფაძე უკვე არასამთავრობოებზე საუბრობს და ინიციატივით გამოდის, რომლის თანახმადაც ენჯეოების არსებობა უნდა შეიზღუდოს და მათი საბანკო ანგარიშები დაიბლოკოს.
"სხვათა შორის, ძალიან ბევრმა ქვეყანამ შეზღუდა ეს არასამთავრობოები, დაუბლოკეს ის საბანკო ანგარიშები, რომლებიდანაც უცხოეთიდან მოდის თანხები. ჩვენც ალბათ, ასე უნდა მოვიქცეთ… მაშინ, როდესაც ძირს უთხრი შენ სახელმწიფოს, შენ სამშობლოს, იმიტომ რომ შენ ღებულობ გრანტებს უცხოეთიდან, რა თქმა უნდა, პასუხი უნდა მოეთხოვოთ მათ", _ აღნიშნავს თოფაძე.
მიუხედავად იმისა, რომ პარტია "მრეწველების" ლიდერის ამ განცხადებებს, საპარლამენტო უმრავლესობის დეპუტატთა უმრავლესობა გაემიჯნა, საზოგადოებასა და პოლიტიკურ წრეებში მაინც დაიწყო იმაზე საუბარი, რომ კოალიციამ ევროპულ გზას გადაუხვია. ეს ბუნებრივიცაა თუ ბოლოდროინდელ მოვლენებს გავიხსენებთ. იგივე ვიზალიბერალიზაციასთან დაკავშირებით განვითარებულ პროცესებს.
"ერთიან ნაციონალურ მოძრაობაში" კი კიდევ რამდენიმე მაგალითს იხსენებენ იმის დასადასტურებლად, რომ კოალიციური მთავრობა ნამდვილად ქმნის განცდას ქვეყნის მიერ საგარეო ვექტორის შეცვლასთან დაკავშირებით.
საპარლამენტო უმცირესობის დეპუტატ ლევან ბეჟაშვილის თქმით, ზოგადად კოალიციას ახასიათებს მრავალპროფილიანი განცხადებები, რადგან მთავრობის პოლიტიკაა ისეთი.
"ერთის მხრივ კეთდება განცხადებები ნატო-სთან ინტეგრაციაზე, მაგრამ ბევრი ისეთი ნაბიჯი იდგმება, რომელიც უკან გვხევს. იგივე კონტრდაზვერვაში, თავდაცვაში მიმდინარე პროცესები. ეს იწვევს განცდას. რომ ქვეყანა საგარეო კუთხით სხვა მიმართულებისკენ მიემართება.
ეს განცხადებაც ტრადიციული მაგალითი იყო კოალიცაში არსებულ ვითარებასთან დაკავშირებით", _ აღნიშნავს ბეჟაშვილი "გურია ნიუსთან" საუბარში.
გოგი თოფაძის ზემოთ მოყვანილ ამ განცხადებებსა და შემდგომ საპარლამენტო უმრავლესობის მსჯელობას მოჰყვა ის, რომ სოციალურ ქსელში კამპანია – "არ იყიდო, არ გაამდიდრო პუტინის მონა" დაიგეგმა და ხორციელდება.
კერძოდ, ინტერნეტმომხმარებლებმა გოგი თოფაძის ფოტოსთან ერთად, მისი კომპანიის მიერ წარმოებულ ლუდს წარწერით – "არ იყიდო! არ გაამდიდრო! პუტინის მონა!" შექმნეს.
შეგახსენებთ, რომ გოგი თოფაძე სს "ყაზბეგი"-ს დამაარსებელი და პრეზიდენტია.
