ტელეკომპანია "რუსთავი 2"-მა საქართველოს პრემიერ-მინისტრის ირაკლი ღარიბაშვილის გამოსვლა გაწყვიტა, რაც ტელეკომპანიამ დღეს ამოქმედებული "მაუწყებლობის შესახებ კანონის" მოთხოვნით ახსნა.
"ჩვენ იძულებული ვართ გავწყვიტოთ პრემიერის გამოსვლა, ვინაიდან ამას მოითხოვს ამოქმედებული "მაუწყებლობის შესახებ კანონი", _ აღნიშნა საინფორმაციო გამოშვების წამყვანმა პაატა იაკობაშვილმა.
ცნობისთვის, "მაუწყებლობის შესახებ" კანონი პარლამენტმა მესამე მოსმენით 2015 წლის 19 თებერვალს დაამტკიცა.
ცვლილებით, მაუწყებელს შეუძლია, საათში მხოლოდ 20% – 12 წუთი დაუთმოს რეკლამას. დღეს მოქმედი წესებით, მაუწყებელს დაწესებული აქვთ ლიმიტი, რომლის მიხედვითაც, ტელევიზიებს დღე-ღამის განმავლობაში მაუწყებლობის საერთო ხანგრძლივობის 20% შეუძლია, გამოიყენოს რეკლამისთვის და ეს დრო სურვილის მიხედვით გადაანაწილოს. ამ წესის შენარჩუნებას, საათობრივი ლიმიტის შემოღებასთან ერთად, ითვალისწინებდა კანონპროექტის თავდაპირველი ვარიანტი, რომელიც დარგობრივი ეკონომიკის კომიტეტმა კომუნიკაციების ეროვნული კომისიის ავტორობით მოამზადა და რომლის პირველადი ვარიანტის მიმართ ტელეკომპანიებმა არაერთი კრიტიკული შენიშვნა გამოთქვეს.
ტელეკომპანიების შენიშვნების უმეტესობასთან ერთად, გაითვალისწინეს მოთხოვნა მაუწყებლობის ხანგრძლივობის მიხედვით დაწესებული 20%-იანი შეზღუდვის გაუქმების შესახებ. კანონპროექტიდან ასევე ამოიღეს ნორმა, რომელიც სატელევიზიო პროგრამების ანონსებში სპონსორებზე მითითებას კრძალავდა – ამგვარი მითითებისთვის საათში 4 წუთიანი ლიმიტი წესდება; ტელეკომპანიის სხვა შენიშვნებთან ერთად, გათვალისწინებულია იმ წესის ორი წლით შენარჩუნება, რომლის მიხედვითაც ახალი ამბების რეკლამით შეწყვეტა შეიძლება 15 წუთში ერთხელ – ეს ლიმიტი 30 წუთამდე 2017 წლის 15 იანვრიდან გაიზრდება. იმ შენიშვნებიდან, რომელიც ტელეკომპანია "რუსთავი 2"-ს ჰქონდა, ერთადერთი მხოლოდ ის შენიშვნა არ იქნა გათვალისწინებული, რომელიც საათში 20%-იანი სარეკლამო ლიმიტის ამოქმედების 2016 წლისთვის გადავადებას ეხებოდა.
კანონი ძალაში დღეიდან შევიდა.
