ირაკლი ღარიბაშვილმა გუშინ უზენაესი სასამართლოს თავმჯდომარეს მოუწოდა, რომ რუსთავის მეტალურგიული ქარხნის დაყადაღებაზე მოსამართლის გადაწყვეტილებით დაინტერესდეს:
_ აღმაშფოთებელია, რომ რუსთავის მეტალურგიული ქარხანა არის დაყადაღებული. 4500 ლარის დავალიანების გამო 120 მილიონი დოლარის საწარმო არის დაყადაღებული. ეს არის კატასტროფა, ეს არის პირდაპირ დივერსია. ამ საწარმოში არის დასაქმებული 2500 ადგილობრივი მოსახლე. მინდა მივმართო იმ ადამიანს, ვინც ეს აბსოლუტურად გაუმართლებელი, დივერსიული გადაწყვეტილება მიიღო. მას მოუწევს, პასუხი აგოს 2 500 ოჯახის წინაშე და იმედი მაქვს, რომ სასამართლოს ახალი თავმჯდომარე დაინტერესდება ამ საქმით. მოსამართლე, რომელმაც მიიღო ეს გადაწყვეტილება, აუცილებლად უნდა წარსდგეს საზოგადოების წინაშე და განმარტოს, რატომ იღებს ასეთ დივერსიულ გადაწყვეტილებებს. თუ არსებობს კანონდარღვევა, გთხოვთ გამოიძიოთ. არსებობს შესაბამისი ორგანოები, მათ შეუძლიათ გაარკვიონ, მაგრამ არა ისე, რომ 4 500 ლარის დავალიანების გამო მთელი ქარხანა გააჩერო, – განაცხადა პრემიერმა და დასძინა, რომ "ყველას მოეთხოვება პასუხი ერთი სავარაუდოდ უკანონოდ მიღებულ გადაწყვეტილებაზე"
_ არ ვერევით და არც ერთი არ მისცემს თავს უფლებას, რომ ჩავერიოთ სასამართლოს გადაწყვეტილებაში, მაგრამ მივმართავ იმ ადამიანს, ვინც ეს უგუნური გადაწყვეტილება მიიღო, რომ ეს არის მარტივი საკითხი. თუ ამ ორგანიზაციას აქვს დავალიანება, მას მარტივადაც შეუძლია გადაიხადოს. ეს არის ძალიან სერიოზული საკითხი და ყველას მოვუწოდებ, რომ გააკეთონ მკაცრი რეაგირება. არც ერთი მოხელე, არც პრემიერ-მინისტრი, არც მოსამართლე, არც პრეზიდენტი არ დგას კანონზე მაღლა. ეს ყველას უნდა ახსოვდეს კარგად და ყველას მოეთხოვება პასუხი ერთი სავარაუდოდ უკანონოდ მიღებულ გადაწყვეტილებაზე, – განაცხადა ირაკლი ღარიბაშვილმა.
პრემიერ-მინისტრის ამ გადაწყვეტილებას უკვე მოყვა გამოხმაურებები.
ს.ს. "ქართული ფოლადის“ დირექტორი ნათია ჯაყელი, რომელსაც რუსთავის მეტალურგიული ქარხნის ამჟამინდელ მფლობელებთან საკუთრების კანონიერებასთან დაკავშირებით სამართლებრივი დავა აქვს, ამბობს, რომ გუშნდელი განცხადებით პრემიერმა სასამართლოზე ზეწოლა მოახდინა:
_ სამართლებრივი ბრძოლის დაწყებისთანავე ვაფრთხილებდით ყველას რომ არ ჩარეულიყვნენ ორი კერძო სუბიექტის დავაში და არ მომხდარიყო საკითხის პოლიტიზირება. შედეგმა მოლოდინს გადააჭარბა.
გაუგონარი ფაქტია ქართული მართლმსაჯულების ისტორიაში, ქვეყნის მაღალი თანამდებობის პირი, პრემიერ-მინისტრი, თავს უფლებას აძლევს მოსამართლეს მოუწოდებს საზოგადოების წინაშე ანგარიშით წარსდგეს, ხოლო მის მიერ მიღებულ გადაწყვეტილებას “დივერსიულს” უწოდებს…
გუშინდელი განცხადება სასამართლო ხელისუფლებაზე პირდაპირი ზეწოლა, მოსამართლეთა დაშინება და კონკრეტულ კერძო დავაში უხეში ჩარევაა. მით უფრო, როცა სასამართლო პროცესი ჯერ არ დასრულებულა და პრემიერის მიერ გავრცელებული ინფორმაციაც არ შეესაბამება სინამდვილეს.
სასამართლოში დავის საგანი არა 4500 ლარის დაკისრებაა, არამედ ს.ს. “ქართული ფოლადის” საკუთრებაში არსებული და რეაბილიტაციის პროცესში უკანონოდ გასხვისებული უძრავ-მოძრავი ქონების სამეურვეო მასაში დაბრუნებაა. სასარჩელო მოთხოვნა: 2011 წლის 27 დეკემბერს, დადებული ქარხნის აქტივების და მათ შორის წიდის ნასყიდობის ხელშეკრულების ბათილობაა. ეს ყბადაღებული წიდა და ნაცარი ჯერ შპს “რუსთავის ინდუსტრიულ ჯგუფზე” გაიყიდა 3 მილიონ ლარად და იმავე დღეს, იგივე ქონება, ასევე გუდავაძის კომპანია შპს “რუსთავის ფოლადზე” 256 მილიონ ლარად გადაიყიდა. ამ ფიქციური გარიგებებისა და ფინანსური მაქინაციის შედეგად შპს “რუსთავის ფოლადმა” 39 მილიონი ლარის საგადასახადო ზედმეტობა მიიღო, ხოლო ბიუჯეტმა ამავე ოდენობის ზარალი. სწორედ ეს გარიგებები სცნო თბილისის საქალაქო სასამართლომ, უკვე მეორედ, კანონსაწინააღმდეგოდ და ბათილად. ეს არის დივერსია?!, _ ამბობს ჯაყელი.
სს “ქართული ფოლადი” მოუწოდებს "მაღალი პასუხისმგებლობის მქონე ყველა ინსტიტუტს, უცხო ქვეყნის დიპლომატიურ წარმომადგენლობებს, საერთაშორისო ორგანიზაციებს, სახალხო დამცველს, არასამათავრობო სექტორს მოახდინონ მკაცრი რეაგირება პრემიერის აღნიშნულ არამართლზომიერ და უფლებაშემლახველ განცხადებაზე".
_ უმთავრესი, რაც სახელმწიფოებრიობას და სახელმწიფოებრივ თავმოყვარობას ეხება, პარემიერმინისტრის განცხადებამ კითვხვები ისევ წარმოშვა, პასუხის იმედი, არც ქმედებით და არც წერილობით, არ მაქვს მაგრამ მაინც შევახსენებ:
საქართველოს კონსტიტუციით სასამართლო ხელისუფლება დამოუკიდებელია?! სახელმწიფოს პირველი პირის მიერ მსგავსი განცხადება სასამართლოზე და საზოგადოებაზე პირდაპირი ზეწოლაა?!
სახელმწიფოს პირველმა პირმა შეიძლება ორ მოდავე სუბიექტს შორის ვინმეს მხარე დაიჭიროს?!
რაც შეეხება დივერსიას _ 2013 წლის 24 ივნისს „ქართული ფოლადის“ აფეთქებას ორი ადამიანის სიცოცხლე შეეწირა. დივერსია და ტერაქტი ესაა!!!!
სახელმწიფო დღემდე აფერხებს და ხელს უშლის გამოძიებას. მინიმუმ ადექვატური რეაქცია რომ გქონოდათ, იქნებ აგვეცილებინა შემდგომი ტრაგედიები! იქნებ ვერავის გაებედა ვაზაგაშვილისა და ხარძიანის მკვლელობა?!
საქართველოს ხელისუფალნო! ალეკო მაისურაძისა და ზაზა ნინიძის სიცოცხლე არ ღირდა „იმედის“ მოჩვენებით თანადგომად! თქვენ აქაც მხარედ იქეცით!
ბუჯეტის ზარალი?! ეს კითხვები რატომ არ უჩნდება პრემიერს როცა ინა გუდავაძისა და მისი კრიმინალური ჯგუფის მიერ ბიუჯეტიდან მინიმუმ 39 მილიონის მოპარვას ეხება საქმე?!
შპს “რუსთავის ფოლადის” განცხადებები საწარმოს გაჩერებისა და 2500 დასაქმებულის გათავისუფლების შესახებ სასამართლოსა და საზოგადოების, პირდაპირი შანტაჟია. სამწუხაროდ, იგივე პრემიერმაც გაიმეორა და, ორი სუბიექტის კერძო დავაში დაინტერესებულ პირად მოგვევლინა. ეს პირდაპირ არღვევს სასამართლო დამოუკიდებლობასა და სს “ქართული ფოლადის” კანონიერ ინტერესებს, _ აცხადებს "ქართული ფოლადის" დირექტორი და ირაკლი ღარიბაშვილს მიმართავს:
_ ასე რომ, თქვენ, ბატონო პრემიერო, გუშინ მხარე იყავით და ინა გუდავაძისა და მისი ჯგუფის ტყუილის ტირაჟირება მოახდინეთ!
რაც შეეხება სასამართლოს, _ მისი განმარტება იურიდიულად დასბუთებული გადაწყვეტილებაა!
ირაკლი ღარიბაშვილს, დღეს პრემიერს, ხოლო 2013 წლის 24 ივნისს, შინაგან საქმეთა მინისტრს, არ გაუჩნდა კითხვები და სამძიმრის სურვილი?!
რატომ მაშინ არ გაუჩნდა კითხვები როცა ორი ინსტანციის გადაწყვეტილება კუბლაშვილმა და უდიპლომო მოსამართლეებმა შეცვალეს?! ან მაშინ, როცა „რუსთავის ფოლადის“ მესვეურები ბიუჯეტს ძარცვავდნენ?!
დუმილი ამ შემთხვევაში არ არის „ოქრო ქებული“! ეს დუმილი მკვლელების ქურდების და ძალადობის თანაზიარობაა! _ დასძენს ნათია ჯაყელი.
