რეგიონული განვითარებისა და ინფრასტრუქტურის მინისტრის თანამდებობას ნოდარ ჯავახიშვილი დაიკავებს. ამის შესახებ პრემიერმა ღარიბაშვილმა განაცხადა. მისივე თქმით, რომ მთავრობის განახლება ჩვეულებრივი პროცესია და ამით არაფერი შეიცვლება, რადგან დაწყებული პროექტები გრძელდება.
შეგახსენებთ, რომ რეგიონული განვითარებისა და ინფრასტრუქტურის მინისტრი დავით შავლიაშვილი თანამდებობიდან დღეს გადადგა:
_ დავით შავლიაშვილი იყო ეფექტიანი მინისტრი და რისკიანი მენეჯერი, რომელსაც არ უჭირდა გადაწყვეტილების მიღება, თუმცა ჯანმრთელობის მდგომარეობის გამო მე მას თანამდებობაზე დარჩენას ვეღარ დავაძალებდი, _ აღნიშნა ღარიბაშვილმა.
პრემიერის თქმით შავლიაშვილმა თანდაყოლილი სერიოზული დაავადების გამო, ბოლო ოთხი თვის განმავლობაში გადადგომის თხოვნით არაერთხელ მიმართა, თუმცა რთული ვითარებისა და არსებული გამოწვევების გათვალისწინებით, ეს არ მოხდა.
"ჩვენთვის მნიშვნელოვანი იყო, პირველი კვარტალი დასრულებულიყო წარმატებულად. ინფრასტრუქტურის სამინისტროს პირველი კვარტლის ბოლოს ბიუჯეტის 107%-იანი შესრულება ჰქონდა, ხოლო გასული წელი 97%-იანი შესრულებით დაასრულა, რაც ბოლო წლებში არ დაფიქსირებულა. მინდა, კიდევ ერთხელ დავადასტურო მისი ეფექტიანობა, ის იყო საკმაოდ რისკიანი მენეჯერი, რომელსაც არ უჭირდა გადაწყვეტილების მიღება, მათ შორის რთული გადაწყვეტილების მიღება. თუმცა, ამ თვეების განმავლობაში გაურთულდა ჯანმრთელობის მდგომარეობა, რადგან მოგეხსენებათ, რომ სამინისტროში მძიმე შრომა და სტრესული სამუშაოა. მეწყინა მისი გადადგომა, თუმცა ვეღარ დავაძალებდი, გაეგრძელებინა მუშაობა, რადგან ეს მის ჯანმრთელობას შეეხებოდა", _ განაცხადა პრემიერ-მინისტრმა.
