საქართველოს შეიარაღებული ძალების ქვედანაყოფებმა, რომლებიც დამოუკიდებლობის დღისადმი მიძღვნილ საზეიმო ღონისძიებაში მონაწილეობენ, თავისუფლების მოედანზე ბოლო რეპეტიცია გაიარეს.
თავდაცვის სამინისტროს ინფორმაციით, სამხედრო-საჩვენებელი კომპონენტი, 13.00 საათზე, თავისუფლების მოედანზე, საქართველოს შეიარაღებული ძალების სხვადასხვა სახეობის კოლოფის მარშირებით დაიწყება, რომელიც ლესელიძისა და ლეონიძის ქუჩებიდან თავისუფლების მოედნის მიმართულებით გადაადგილდება.
თავისუფლების მოედანზე განთავსდება: საწყისი საბრძოლო მომზადების 200 კურსდამთავრებული, რომელიც სამხედრო ფიცს დადებს, 40 მედროშე, ავღანეთიდან "მტკიცე მხარდაჭერის" მისიიდან დაბრუნებული მე-5 ქვეითი ბრიგადის 51-ე ბატალიონის 240 სამხედრო მოსამსახურე, პირველი ქვეითი ბრიგადის მე-12 ბატალიონის ასეული, ავიაციისა და საჰაერო თავდაცვის სარდლობის პირადი შემადგენლობა, დავით აღმაშენებლის სახელობის ეროვნული თავდაცვის აკადემიის 40 ოფიცერი და 125 იუნკერი, გენერალ გიორგი კვინიკაძის სახელობის კადეტთა სამხედრო ლიცეუმის 40 კადეტი, ქართულ-ამერიკულ ერთობლივ სწავლებაში "ღირსეული პარტნიორი" მონაწილე ამერიკელი სამხედროები, ეროვნული გვარდიის რიტუალების ასეული და შსს-ს სასაზღვრო პოლიციის სანაპირო დაცვის დეპარტამენტი.
სამხედრო-საზეიმო ღონისძიებას თავისუფლების მოედანზე საქართველოს უმაღლესი მთავარსარდალი გიორგი მარგველაშვილი გახსნის. პრეზიდენტს პატაკს გენარალური შტაბის უფროსი, გენერალ მაიორი ვახტანგ კაპანაძე ჩააბარებს, რის შემდეგაც მოედანზე მოწყობილი პირადი შემადგენლობა და მოწვეული სტუმრები საქართველოს ტერიტორიული მთლიანობისთვის და საერთაშორისო მისიებში დაღუპული ქართველი მოსამსახურეების ხსოვნას წუთიერი დუმილით პატივს მიაგებენ.
ამის შემდეგ ღონისძიება სამხედრო ფიცის დადების ცერემონიალით გაგრძელდება. სამხედრო ფიცს საწყისი საბრძოლო მომზადების კურსის პირადი შემადგენლობა დადებს. 200 ახალწვეული დღეის შემდეგ საქართველოს შეიარაღებული ძალების სხვადასხვა ქვედანაყოფში გააგრძელებს მსახურს.
ღონისძიების ფარგლებში ახალწვეულების მიერ ფიცის დადების შემდეგ ეროვნული გვარდიის სამხედრო საჩვენებელი ორკესტრი სახელმწიფო ჰიმნს შეასრულებს, უკვე ამის მერე კი საქართველოს მოსახლეობას და შეიარაღებულ ძალებს დამოუკიდებლობის დღეს საქართველოს პრეზიდენტი გიორგი მარგველაშვილი და პრემიერ-მინისტრი ირაკლი ღარიბაშვილი მიულოცავენ.
თავისუფლების მოედანზე საზეიმო ღონისძიებაში ქართული ავიაციაც ჩაერთვება.
მოედნის თავზე 3 ერთეული "იროკეზის" ტიპის შვეულმფრენი გადაიფრენს და სახელმწიფო დროშას გაშლის. საჰაერო კომპონენტში მონაწილეობას მიიღებს ასევე 3 ერთეული L-39 ტიპის თვითმფრინავი "ალბატროსი", 3 ერთეული Cy-25 ტიპის თვითმფრინავი "მიმინო", რომელიც ცაში საქართველოს დროშის ფერ კევამლს გაუშვებს.
ღონისძიების დასასრულს ეროვნული გვარდიის სამხედრო-საყვენებელი ორკესტრი დამოუკიდებლობის დღესთან დაკავშირებით თავისუფლების მოედანზე საზეიმო კონცერტს გამართავს.
