მცხეთის მუნიციპალიტეტის გამგებლის ზურაბ აბესაძის ინფორმაციით, მცხეთის რამდენიმე სოფელი სტიქიის გამო გარესამყაროსაა მოწყვეტილი და მოსახლეობასთან დაკავშირება ვერ ხერხდება.
ამის შესახებ აბესაძემ "გურია ნიუსს" განუცხადა და აღნიშნა, რომ არსებულ მდგომარეობას ის ამ წუთებში ადგილზე ეცნობა.
"ცოტა ხნის წინ ვიყავით ლისზე, ახლა ვცდილობთ ნაფეტვრების და ბევრეთის ტერიტორია დავათვალიეროთ. იმის გამო, რომ გზები ნაშალი მასალისგან არის ჩახერგილი სოფლებამდე მისვლას ვერ ვახერხებთ. ტელეფონებიც არ იჭერს რომ მოსახლეობას დავუკავშირდეთ. არ ვიცით, რა სიტუაციაა ტაბარუკის ტერიტორიაზე და სოფელ ბევრეთში", _ აღნიშნა აბესაძემ.
რაც შეეხება ზარალს, მისი თქმით, ჯერჯერობით არაფრის თქმა არ შეიძლება, რადან ყველა სოფელში კომისია ჯერჯერობით არ შესულა.
შეგახსენებთ, რომ საქართველოს რეგიონული განვითარებისა და ინფრასტრუქტურის სამინისტროს ინფორმაციით, დაზარალებულია ლისი, კოდორეთი, ნაფეტვრები, ბევრეთი, წყალდიდი და ბეთანიის მოსაზღვრედ მდებარე თეთრწყაროს მუნიციპალიტეტის რიგი სოფლები. აღნიშნულ მუნიციპალიტეტებში დაზიანებულია შიდა სასოფლო გზები და სახნავ-სათესი მიწები.
რაც შეეხება წყნეთი-ბეთანიის გზატკეცილზე ჩამოწოლილ მეწყერს, 13-14 ივნისის ღამეს, წყნეთი-ბეთანიის დამაკავშირებელ გზაზე დაახლოებით 500 000 კუბური მეტრის მოცულობის მეწყერი ჩამოწვა, რამაც მოძრაობის პარალიზება გამოიწვია.
მერიის შესაბამის სამსახურებთან ერთად სტიქიის ადგილზე დაუყოვნებლივ იქნა მობილიზებული რეგიონული განვითარებისა სამინისტროსა და საავტომობილო გზების დეპარტამენტის შესაბამისი სამსახურები, რომლებიც სტიქიის სალიკვიდაციო სამუშაოებში ჩაერთვნენ.
