ოზურგეთის მუნიციპალიტეტში მერია-კონჭკათის დამაკავშირებელი გზის სარეაბილიტაციო სამუშაოები 2015 წლის მარტში დაიწყო და 7 ნოემბერს უნდა დასრულდეს. სარეაბილიტაციო სამუშაოები 3,2 კმ სიგრძის გზის მოასფალტებას და 1.5 კმ სიგრძის გზის მოხრეშვას მოიცავს.
ხელშეკრულების ღირებულება 1 555 541 ლარს შეადგენს და გათვალისწინებულია მერია-კონჭკათის დამაკავშირებელი გზის კაპიტალური შეკეთება, რომელსაც შპს "პირამიდა ფ.რ."-ს ფილიალი, შპს "მშენებელი 2015" და შპს "საბეკო" ასრულებენ.
ერთი თვის წინ, გზის ამ მონაკვეთზე მშენებელ მუშებს, საქმის მწარმოებელს მამუკა გელაშვილს და შპს „პირამიდას“ წარმომადგენელს შოთა ცინცაძეს , მათთვის უცნობი პირები იარაღით თავს დაესხნენ, ტელეფონები წაართვეს და ფიზიკურად სასტიკად გაუსწორდნენ. გელაშვილს დაუმტვრიეს ავტომობილი, შემდეგ კი დაუწვეს. ამის შესახებ სოფელ მერიის მცხოვრებლებმა "გურია ნიუსს" განუცხადეს და აღნიშნული ფაქტის გაშუქება სთხოვეს.
როგორც მაშინ შსს პრესსამსახურში გვითხრეს, გამოძიება დაწყებულია 118 მუხლის პირველი ნაწილით:
"ადგილზე არც ცეცხლსასროლი იარაღი ფიგურირებს, არც მანქანის დაწვის ფაქტი. ადგილი ჰქონდა მხოლოდ ცემის ფაქტს. "
აღნიშნული ინციდენტის შემდეგ ერთ თვეზე მეტი გავიდა. ამ ეტაპზე გზის სარეაბილიტაციო სამუშაოები შეჩერებულია, ამის მიზეზად კი კომპანიის წარმომადგენლები უამინდობას ასახელებენ.
"გურია ნიუსის" წყაროს ინფორმაციით, მერია -კონჭკათის გზის მშენებლობაზე მომხდარი ინციდენტზე პოლიციაში დაკითხვები კვლავ გრძელდება, მოწმეების დაკითხვას კი ესწრება ინდმეწარმე შოთა მჟავანაძე, რომელიც "გურია ნიუსთან" საუბრისას ამბობს, რომ ის ამჟამად ოფიციალურად არსად არ მუშაობს, უბრალოდ კურირებს შპს "ბათვანს", რომლის დირექტორიც ირანის მოქალაქეა. .
სწორედ აღნიშნული კომპანია აწარმოებს ოზურგეთის მუნიციპალიტეტში, სოფელ მერიაში, მდინარე ნატანებზე ქვიშა – ხრეშის მოპოვებას.
აქედან მიქონდათ სამშენებლო მასალა მერია-კონჭკათის დამაკავშირებელი გზის სარეაბილიტაციო სამუშაოების განმახორციელებელ კომპანიებს, რომლებსაც შოთა მჟავანაძის კუთვნილი შპს-ს დავალიანება ჰქონდათ.
"გურია ნიუსს" გზის მშენებელი კომპანიის რამდენიმე წარმომადგენელი დაუკავშირდა და აღნიშნული თემით დაინტერესება თხოვა.
"მე არ ვიცნობ პირადად შოთა მჟავანაძეს, სხვათა შორის პოლიციაში დაკითხვის დროს მითხრეს, იცნობ შოთა მჟავანაძესო? როგორც ჩემმა მეგობრებმა მითხრეს, როცა დაკითხეს თანამშრომლები, დაკითხვაზე იყოო, იქ ესწრებოდაო გამომძიებელთან ერთადო"_ გვითხრა ერთ-ერთმა წარმომადგენელმა.
გზის სარეაბილიტაციო სამუშაოების ზედამხეველი ალეკო თანანაშვილი "გურია ნიუსთან" ამბობს, რომ ხრეში რამდენიმე შპს – დან მოჰქონდათ, მათ შორის იყო შოთა მჟავანაძის შპს, თუმცა თანანაშვილის თქმით, ამ ეტაპზე ყველანაირი დავალიანება გასტუმრებული აქვთ.
" ხრეში, ბალასტი, გამოგვქონდა სოფელ მერიაში, მდინარე ნატანებიდან, სადაც ინდმეწარმე შოთა მჟავანაძეს ქონდა კარიერი. გასტუმრებული გვაქვს ყველანაირი დავალიანება"_ამბობს თანანაშვილი.
"გურია ნიუსი" დაინტერესდა, რა სტატუსით ესწრებოდა ინდმეწარმე შოთა მჟავანაძე პოლიციაში მერია -კონჭკათის გზის მონაკვეთზე მომხდარი ინციდენტის დროს მოქმედი პირების დაკითხვას, რაზეც მჟავანაძე გვპასუხობს, რომ ტენდერში გამარჯვებულ კომპანიას ჰქონდა მისი ვალი, რის მოსათხოვადაც მივიდა პოლიციაში.
"პოლიციაში იმიტომ ვიყავი, რომ შევხვდი იმ პიროვნებას, ვინც მოიგო ტენდერი, ჩვენგან გაჰქონდათ პროდუქცია, დავალიანება დარჩათ, მოვთხოვე და უკვე თანხები ჩარიცხეს" _ამბობს მჟავანაძე.
_ბატონო შოთა! ვალი პოლიციაში მოთხოვეთ კომპანიის წარმომადგენლებს?
_ მე შევხვდი უბრალოდ "პირამიდის" წარმომადგენელს.
_ დაკითხვაზე საათობით თქვენი ყოფნა მარტო მაგ თემას ეხებოდა?
_ მე რაც მაინტერესებდა, ის იყო, რომ გატანილი ჰქონდათ პროდუქცია, მოვთხოვე ფული და გადმომირიცეს თანხა, ეს იყო. მეტი არაფერი.
შოთა მჟავანაძე პოლიციის ყოფილი მაღალჩინოსანია. ის გახმაურებული თემის – "ბახმაროს სკანდალის" ერთ-ერთი მთავარი პირი იყო და კურორტ ბახმაროს ქვეგანყოფილების პოლიციის უფროსად მუშაობდა. აღსანიშნავია, რომ ბახმაროს გახმაურებული სკანდალის, რამაც გურიის მაღალჩინოსანი პოლიციელების სავარძლებიც შეწირა, ფიზიკური შემსრულებელი, როგორც ჩვენი წყარო ამტკიცებდა, იყო მჟავანაძე.
აღსანიშნავია, რომ ეს უკანასკნელი დღესაც აქტიურად არის ჩართული სხვადასხვა ბიზნესში, აქვს კარიერები და დღევანდელი ხელისუფლებასთან დაახლოებული პირია.
