წელიწადის ცხელი სეზონის დადგომასთან ერთად საზოგადოებისთვის განტვირთვა აუცილებელი ხდება. ამ დროს ყველას აწუხებს კითხვა – სად გაატაროს შვებულება, არდადეგები და საერთოდ სად სჯობს დასასვენებლად წასვლა?!
დასასვენებლად წასვლამდე კი, აუცილებელია დაფიქრება რამდენად ეყოფა თქვენი შემოსავალი შერჩეულ კურორტს და სად გინდათ დასვენება – მთაში თუ ზღვაზე?
საქართველო საზღვაო და სამთო კურორტების მრავალფეროვნებით გამოირჩევა, ამიტომ ზაფხულის განმავლობაში დასასვენებელ ადგილებს ქვეყნის მაცხოვრებლებთან ერთად ტურისტებიც სტუმრობენ.
„გურია ნიუსი“ რამდენიმე კურორტის შესახებ საჭირო ინფორმაციას გთავაზობთ, სადაც ზაფხულის ცხელი დღეების გატარებას სასიამოვნო გარემოში შეძლებთ.
სვანეთი – ისტორიულ-გეოგრაფიული მხარეა, რომელიც საქართველოს უდიდეს ტურისტულ ზონად იქცა. სვანეთში დასვენებისას შეგეძლებათ ადგილობრივ კულტურას გაეცნოთ და დატკბეთ ღირსშესანიშნავი სანახაობებით. ის ულამაზესი ადგილია მათთვის, ვისაც უყვარს ბუნება და მთა. სასტუმროში ღამის გათევა ერთ დამსვენებელს სტანდარტულ ნომერში 170 ლარად შეუძლია, ფასში საუზმეც შედის და ვახშამიც. რაც შეეხება საოჯახო ტიპის სასტუმროს მესტიაში, აქ ღამის გათევა ერთ ადამიანისთვის 30-დან 60 ლარამდე ჯდება. სასტუმროში საუზმობის შემთხვევაში ფასი შესაბამისად იმატებს.
ვინც უპირატესობას მთასთან შედარებით ზღვაზე დასვენებას ანიჭებს შეუძლია ბათუმს ესტუმროს.
ბათუმი – ისევე როგორც სვანეთი, საქართველოს ერთ-ერთი ცენტრალური ტურისტული ზონაა, რომელიც დასვენებაზე და მაქსიმალურად მეტ გართობაზეა გათვლილი. აქ შეგიძლიათ დღისით დაისვენოთ ზღვის ნაპირას, გაირუჯოთ, საღამოობით კი, უბრალოდ გაერთოთ. ბათუმის 5 ვარსკვლავიან სასტუმროში 1 ადგილიან ნომერში ღამის გათევა 200$-მდე დაგიჯდებათ, ვისაც ამის საშუალება არ გაქვთ, ჩვეულებრივ ოჯახში 1 ოთახის დაქირავება 15-20 ლარამდე ღირს, ხოლო ცალკე ბინის ქირის ღირებულება დღიურად 50$-ზე მეტს შეადგენს.
აღსანიშნავია, რომ საქართველო გამოირჩევა იმ ტიპის კურორტებითაც, სადაც წასვლას დაავადებისთვის სამკურნალოდ ირჩევენ.
ერთ-ერთი ასეთი კურორტი გურიის მთებში მდებარეობს და მას ბახმარო ჰქვია.
ბახმარო – ზღვის დონიდან 2 050 მეტრის სიმაღლეზე მდებარეობს. ის მთელი ევროპის მასშტაბით ერთ-ერთი ყველაზე მაღალი დასახლებული პუნქტია. კოტეჯების ღირებულება მთელი სეზონის განმავლობაში დაახლოებით 1000 $-დან 3000$-მდე ღირს. კეთილმოწყობილი სასტუმროში ნომრების დღიური ღირებულება 130 $-დან 180$-მდეა. თანხაში კომფორტულ ნომერთან ერთად ოთხჯერადი კვებაც შედის, ხოლო თითოეულ ნომერში ოთხი საძინებელია. კლიმატური პირობებიდან გამომდინარე, სისხლნაკლებობით, ასთმით, ასევე ფილტვებისა და სასუნთქი გზების დაავადებების მქონე ადამიანებისთვის რეკომენდებულია ბახმაროში დასვენება. ბახმაროს ჰავა ასევე უწყობს ხელს იმუნიტეტის გაძლიერებას როგორც მოზარდებში, ისე ზრდასრულებში.
ბორჯომი – ცნობილია მსოფლიოში სახელგანთქმული მინერალური წყლით, რასაც დადებითი ეფექტი აქვს კუჭ-ნაწლავის პროფილაქტიკისას. აქ სასტუმროში სამადგილიანი ნომრის ფასი 200$-მდე ღირს.
ბავშვებისთვის ბორჯომის შემდეგ დასასვენებლად საუკეთესო ადგილია სურამი, სადაც სუფთა ჰავაა. გარდა ამისა, სურამი- რეკომენდირებულია იმათთვის, რომელთაც სასუნთქი გზების დაავადებები აწუხებთ, აგრეთვე ტუბერკულიოზის სამკურნალოდ და ორგანიზმის იმუნიტეტის უნარის ასამაღლებლად. აქ ბინის ქირაობა ერთი დღით 20-დან 25 ლარამდე დაგიჯდებათ.
საქართველოს კიდევ ერთი საზღვაო კურორტია ურეკი.
ურეკი – ხელსაყრელია პატარა ბავშვებისათვის. ამ კურორტის პლაჟის ქვიშა შეიცავს დიდი რაოდენობით მაგნეტიტის ნაწილაკებს. ურეკის მიდამოებში აღინიშნება მომატებული მაგნიტური ველი, რაც ბუნებრივ საკურორტო ფაქტორად არის მიჩნეული. ურეკში საზაფხულო სეზონი ივნისის თვიდან იწყება და სექტემბრის შუა რიცხვებამდე გრძელდება. აქ სასტუმროს ნომერი კაცზე დღიურად 50 ლარს შედგენს, ფასში კვება არ შედის.
კიდევ ერთი სამთო კურორტია შოვი ზემო რაჭაში.
შოვი – ფიჭვნარი, სუფთა ჰაერი, სიმყუდროვე და ანკარა მთის მდინარეების ჩუხჩუხი დამამშვიდებლად მოქმედებს ადამიანზე. აქ სასტუმროში 2-კაციან ნომერში ღამის გათევა 100$-მდე დაგიჯდებათ, ფასიც შესაბამისად მოიმატებს ოჯახის წევრებისა თუ მეგობრების რაოდენობის მიხედვით.
