ჰელსინკში გამართული საერთაშორისო ფორუმი დასრულდა. 300-მდე კანონმდებელი 5 დღის განმავლობაში მსოფლიოში მიმდინარე მოვლენებზე მსჯელობდა. საკომიტეტო და პლენარულ სხდომებზე განხილვის ძირითად თემებს უკრაინაში და მის ირგვლივ არსებული კრიზისული მდგომარება, რუსეთის დელეგაციის ასამბლეაზე არ დასწრების საკითხი, დევნილთა და იძულებით გადაადგილებულ პირთა და გენდერული თემატიკა წარმოადგენდა.
საქართველოს საპარლამენტო დელეგაციამ, რომელსაც თედო ჯაფარიძე, გიორგი წერეთელი და გიორგი ვოლსკი წარმოადგენდნენ, აქტიური მონაწილეობა მიიღეს გამართულ ღონისძიებებში და საქართველოს საკითხი და იქ მიმდინარე მოვლენები განხილვის საგნად აქციეს.
აღსანიშნავია, რომ ქართული დელეგაციის წევრი, გიორგი წერეთელი საპარლამენტო ასამბლეის ვიცე პრეზიდენტის პოსტზე ხელახლა აირჩიეს და აღნიშნულ თანამდებობაზე უფლებამოსილება 1 წლით გაუგრძელეს.
"ქართულმა დელეგაციამ, როგორც საპარლამენტო უმრავლესობიდან ასევე უმცირესობიდან, აქტიური მონაწილეობა მიიღეს საკომიტეტო და პლენარული სხდომების მუშაობაში. გაკეთდა მოხსენებები და საქართველოს პრობლემატიკა გაჟღერებული იქნა არა მარტო ჩვენს მიერ, არამედ ამ პრობლემებზე მსჯელობა სხვადსხვა ფორმატში აქტიურად წარიმართა.
დაგეგმილი გვაქვს ODIHR ხელმძღვანელთან შეხვედრა, რათა კიდევ ერთხელ ყურადღება გავამახვილოთ საქართველოში მიმდინარე მოვლენებზე. იყო დებატები, დისკუსიები და ვთვლი, რომ ჩვენმა დელეგაციამ შედეგიანი მუშაობა აჩვენა. აღსანიშნავია, რომ საპარლამენტო ასამბლეაზე საქართველო წარმოჩენილი იყო მაღალ დონეზე და არა მარტო პოლიტიკურ ლანდშაპტზე, არამედ საქართველო სხვა რაკურსით კარგად წარმოჩინდა ტურიზმის დეპარტამენტის მიერ და მრავალი კანონმდებელი ჩვენ ქვეყანას ტურისტული კუთხითაც გაეცნო", – განაცხადა თედო ჯაფარიძემ საპარლამენტო ასამბლეის შეფასებისას. საქართველოს საპარლამენტო დელეგაციის ხელმძღვანელი პლენარული სესიის დასკვნით სხდომაზეც გამოვიდა სიტყვით და ODIHR ხელმღვანელობას კიდევ ერთხელ მოუწოდა საქართველოში სამუშაო ჯგუფის გამოგზავნის თაობაზე, რათა უცხოელ ექსპერტებს საშუალება მიეცეთ ადგილზე გაეცნონ ქვეყანაში მიმდინარე პოლიტიკურ პროცესებს და მასთან დაკავშირებით შესაბამისი მოხსენება მოამზადონ.
"ეუთოს საპარლამენტო ასამბლეა ერთ-ერთი მნიშვნელოვანი და გავლენიანი საერთაშორისო ფორუმია, რომელზეც სხვადასხვა ქვეყნის წარმომადგენელი მსოფლიოში მიმდინარე აქტიურ საკითხებს განიხილავს. მუშაობის პროცესში ჩვენმა დელეგაციამ რამდენიმე მნიშვნელოვანი ცვლილება შეიტანა, რომლებიც გაზიარებულ და მხარდაჭერილი იქნა. ძირითადი აქცენტი ადამიანის უფლებებზე, ქვეყნის შიგნით გადანაცვლებულ პირთა და იმ პირთა უფლებების დაცვაზე გაკეთდა, რომლებიც დღეს ოკუპირებული ტერიტორიების და მის სიახლოვეს ცხოვრობენ. მუშაობის პროცესში ადგილი ქონდა კამათს და დაპირისპირებებს, ამას თან ერთოდა რუსეთის დელეგაციის არ დასწრებაც, რამაც გამოიწვია ის შედეგი, რომ რუსეთის მიერ მომზადებული არც ერთი შენიშვნა არ იქნა განხილული", – განაცხადა გიორგი ვოლსკიმ.
გიორგი წერეთლის შეფასებით, წლევანდელი სესია საინტერესო და ისტორიული გამოდგა, იმ ფონზე, თუ რა ვითარებაა დღევანდელ ევროპაში და ზოგადად მსოფლიოში. ",უკრაინასთან დაკავშირებული რეზოლუციის გატანა ერთ-ერთი პრინციპული საკითხი იყო მიმდინარე სესიაზე და მნიშვნელოვანია, რომ მისი მიღება ხმათა დიდი უმრავლესობით მოხდა. რაც შეეხება საქართველოში მიმდინარე პროცესებს რეზოლუციაში ბევრგან არის საუბარი საქართველოზე, რაც ჩვენი ქვეყნისთვის მნიშვნელოვანი მოვლენაა", – განაცხადა გიორგი წერეთელმა.
საპარლამენტო ასამბლეამ მუშაობა პლენარული სხდომით დაასრულა, რომელზეც ჰელსინკის დეკლარაციის პროექტი და კომიტეტებზე მიღებული რეზოლუციები დაამტკიცეს.
ეუთო-ს საპარლამენტო ასამბლეის რიგით 25-ე ყოველწლიური შეკრება 2016 წელს საქართველოში გაიმართება.
