საგარეო ურთიერთობათა საკითხებში საქართველოს პრეზიდენტის მრჩევლის, თენგიზ ფხალაძის ქონებრივი დეკლარაციის მიხედვით, რომელიც მან 10 აგვისტოს შეავსო, ის თბილისსა და ბათუმში ბინებს ფლობს, ხოლო მისი ოჯახის წევრების საკუთრებაშია 2 საკარმიდამო ნაკვეთი და კიდევ ერთი ბინა თბილისში.
კერძოდ, ფხალაძის საკუთრებაშია თბილისში, ქიქოძის ქუჩაზე მდებარე 114.57 კვ.მ-ის ფართობისა და ბათუმში, ხიმშიაშვილის 25ა-ში მდებარე , 32.38 კვ.მ ფართობის ბინები.
მისი მეუღლე ნატო ბაჩიაშვილი კი ფლობს საკარმიდამო ნაკვეთს საგარეჯოში, ქურდიანის ქუჩაზე, რომლის ფართობიც 1204.00 კვ.მ-ია და ამავე ქუჩაზე მდებარე 195.00 კვ.მ-ის საცხოვრებელი გაშენების ფართს. ასევე, ნატო ბაჩიაშვილის 100%-იან საკუთრებაშია თბილისში, ქიქოძის ქუჩაზე მდებარე 48.90 კვ.მ-ის ფართობის სარდაფი.
დედის, ლაურა გიაშვილის 100%-იან მფლობელობაშია ბინა თბილისში, საბადურის ქუჩაზე, რომლის ფართობიც 39.75 კვ.მ-ია.
რაც შეეხება ფხალაძის ფინანსურ მდგომარეობას, დეკლარაციის შევსების მომენტში პრეზიდენტის მრჩევლის ანგარიშებზე 3 554, 42 ლარი, 16 674, 24 ევრო, 1879 დოლარი და 120 ჩეხური კრონა იყო.
კერძოდ, საქართველოს ბანკის მიმდინარე ანგარიშზე ფხალაძეს 3509, 67 ლარი, ამავე ბანკის მეორე მიმდინარე ანგარიშზე კი, 44.75 ლარი ჰქონდა.
ასევე, საქართველოს ბანკის მიმდინარე ანგარიშზე მის სახელზე ირიცხებოდა 912.78 ევრო, მეორე ანგარიშზე 3177.46 ვერო, ამავე ბანკში გახსნილ ანაბარზე კი 12584.00 ევრო და 1879.00 დოლარი. გარდა ამისა, საქართველოს ბანკის კიდევ ერთ მიმდინარე ანგარიშზე ფხალაძეს 120.85 ჩეხური კრონა ჰქონდა.
რაც შეეხება მისი ოჯახის წევრების ფინანსურ მდგომარეობას, დეკლარაციის მიხედვით, შვილის, ნოდარ ფხალაძის საბანკო ანგარიშებზე 5000.00 ევრო, 1500.00 დოლარი და 35.50 ლარი იყო.
ფხალაძის მეუღლის, ნატო ბაჩიაშვილის საბანკო ანგარიშზე საქართველოს ბანკში – 911.00 ლარი; სახელფასო ანგარიშზე რესპუბლიკა ბანკში – 1240.00 ლარი, ანაბარზე საქართველოს ბანკში – 1087.40 დოლარი; შეგროვებად ანგარიშზე კი, – 1123.35 ლარი იყო.
ფხალაძის დედის, ლაურა გიაშვილის ანაბარზე „ლიბერთი“ ბანკში კი, მხოლოდ 467.00 ლარი ირიცხებოდა.
რაც შეეხება ოჯახის შემოსავლებს, რომელიც მათ ერთი წლის განმავლობაში მიიღეს, დეკლარაციის მიხედვით ასე გამოიყურება:
გეოპოლიტიკური კვლევების საერთაშორისო ცენტრიდან, სადაც თენგიზ ფხალაძეს თავმჯდომარის პოსტი უჭირავს, მან შემოსავლის სახით 9860.72 ლარი მიიღო; საქართველოს საზოგადოებრივ საქმეთა ინსტიტუტიდან (მოწვეული ლექტორი) 6170.00 ლარი; საგარეო საქმეთა სამინისტროს სასწავლო ცენტრიდან (მოწვეული ლექტორი) – 1300.00 ლარი; ილიას სახელმწიფო უნივერსიტეტიდან (მოწვეული ლექტორი) – 262.40 ლარი; ააიპ ევროპის სახლი მოდერატორიდან (ერთჯერადი სამუშაო- ლექცია ნატოს შესახებ) – 208.94 ლარი; დავით აღმაშენებლის სახელობის საქართველოს ეროვნული თავდაცვის აკადემიიდან (ერთჯერადი სამუშაო – ლექცია) – 300.00 ლარი; საქართველოს პრეზიდენტის ადმინისტრაციიდან კი, სადაც მას საქართველოს პრეზიდენტის მრჩეველის პოსტი უჭირავს – 26 031.81 ლარი;
რაც შეეხება მისი მეუღლის შემოსავლებს, ნატო ბაჩიაშვილმა გეოპოლიტიკური კვლევების საერთაშორისო ცენტრიდან, სადაც მას პროექტების კოორდინატორის პოზიცია უჭირავს – 8000.00 ლარი; დავით აღმაშენებლის სახელობის საქართველოს ეროვნული თავდაცვის აკადემიიდან (მოწვეული პროფესორი) – 5650.00 ლარი; ააიპ ევროპის სახლი პროექტის კოორდინატორის თანამდებობიდან კი ხელფასის სახით – 5638.16 ლარი აიღო.
გარდა ამისა, თენგიზ ფხალაძემ წიგნის ჰონორარიდან 3000.00 ლარის შემოსავალი მისმა მეუღლემ კი, 3419.73 ლარი მიიღო.
დეკლარაციის მიხედვით, ოჯახი არ ფლობს ფასიან ქაღალდებსა და ძვირადღირებულ ნივთებს.
შეგახსენებთ, რომ თენგიზ ფხალაძე არის აშშ-ს ატლანტიკური საბჭოსა და ბრიტანეთის საერთაშორისო ურთიერთობათა სამეფო ინსტიტუტის (Chatham House) წევრი. სხვადასხვა წლებში იგი იყო საქართველოს სახელმწიფოს მეთაურის დიპლომატიური პროტოკოლის სამსახურის ხელმძღვანელი, საქართველოს პრეზიდენტის სახელმწიფო რწმუნებულის მოადგილე მცხეთა-მთიანეთის მხარეში, ასევე აზერბაიჯანის რესპუბლიკაში საქართველოს საელჩოს საკონსულო სამსახურის ხელმძღვანელი.
