სამაუწყებლო კომპანია "რუსთავი 2"-ის გენერალური დირექტორის, ნიკა გვარამიას განცხადებით, ხელისუფლება ტელეკომპანიასთან ბრძოლას აუცილებლად წააგებს. გვარამიამ დღეს გამართულ ბრიფინგზე მოსახლეობას ტელეკომპანიის საბანკო ანგარიში წარუდგინა და სთხოვა, თუნდაც ერთი ლარით, სიტყვის თავისუფლებას დაეხმარონ.
"ხელისუფლებას ვპირდები, ვიდრე "რუსთავი 2" დაიხურება, დაიხურებით თქვენ. ეს აუცილებლად ასე იქნება. რაც შეეხება მოსახლეობას, მე პირველად ამ სამი წლის განმავლობაში, ვიდრე ჩვენ გვებრძვიან, მოგმართავთ დახმარებისთვის, "რუსთავი 2" ამ ბრძოლაში მარტო ვერ გაიმარჯვებს, ეს არ არის ბრძობა მარტო "რუსთავი 2"-ისთვის, ეს არის ბრძოლა თავისუფალი სიტყვისთვის, განსხვავებული აზრისთვის, დემოკრატიისთვის და მათ შორის, ამ ხელისუფლებისთვის სახის შენარჩუნებისთვის, რომელმაც თავი მოიჭრა ამ დღეების განმავლობაში. რომლის სახეც გახდა მოსამართლე ურთმელიძე. მოგმართავთ, ყველა ვითარებაში, როდესაც ჩვენ დაგიძახებთ, დადექით ჩვენს გვერდით, იარეთ ჩვენთან ერთად სასამართლო პროცესებზე. დავანახოთ ამ ხელისუფლებას, სასამართლო ხელისუფლებას ჩვენი ძალა, რწმენა თავისუფალი სიტყვის და ჩვენი უკეთესი მომავლის. რწმენა იმისა, რომ ყველაფრის ყიდვა და დაყადაღება არის შეუძლებელი. მოგმართავთ მოსახლეობას თხოვნით, დაეხმარეთ "რუსთავი 2"-ს და მისი სახით ამ ქვეყანაში პლურალისტური მედიის შენარჩუნებას. თუნდაც ერთი ლარიც კი ამ ანგარიშზე ჩარიცხული არის სერიოზული ინვესტიცია თქვენი შვილების მომავალში. ჩვენ გპირდებით, რომ ყოველთვის და ყველგან დავიცავთ თქვენს ინტერესებს,პირველ რიგში, ხელისუფლებასთან, რომელსაც ქართული დემოკრატიისთვის დღეს განაჩენი გამოაქვს", _ განაცხადა გვარამიამ.
მან ასევე მიმართა საქართველოს პრეზიდენტსა და პარლამენტის თავმჯდომარეს, "სანამ ჯერ კიდევ გვიანი არ არის გონს მოეგონ" და გაემიჯნონ ხელისუფლების ქმედებებს.
