პოლონურმა ფონდმა "ასოციაცია დემოკრატიული აღმოსავლეთი", საქართველოში პარტნიორ ორგანიზაცია "კავკასიიის ჟურნალისტთა საერთაშორისო ცენტრთან" ერთად, საქართველოს რეგიონული მედიის გამომცემლები და ჟურნალისტები დააჯილდოვა.
რეგიონული მედიის წარმომადგენლებისთვის კონკურსი ოთხ კატეგორიაში გაიმართა: საუკეთესო ვებვერდი; საუკეთესო ვიდეომასალა ვებგვერდზე; საუკეთესო ფოტოსურათი ვებგვერდზე და საუკეთესო News-ი ვებგვერდზე.
საუკეთესო News – ჯილდო "კახეთის ხმას" ერგო. საუკეთესო ფოტოს გამარჯვებული "სამხრეთის კარიბჭეა", საუკეთესო ვიდეოს კატეგორიაში "ჩემი ხარაგაულის" ვიდეომ გაიმარჯვა, ყველაზე ინტერაქტიული ვებგვერდის კატეგორიაში კი, პირველი ადგილი გაზეთმა "სპექტრმა" მიიღო.
ამავე კატეგორიებში დამატებითი პრიზებიც გაიცა. ვიდეოს კატეგორიაში, კონკურსში "გურია ნიუსის" ჟურნალისტმა, გიორგი გირკელიძემ გაიმარჯვა, რომელსაც საჩუქრად ფოტოაპარატი და წიგნი – "ფოტოხელოვნების სრული კურსი" გადაეცა. ამავე კატეგორიაში დაჯილდოვდა გაზეთი "კახეთის ხმაც". ფოტოს კატეგორიაში კი, პრიზი "ოკრიბა ნიუსმა" მიიღო.
სპეციალური პრიზები მიიღეს გაზეთებმა "სვანეთი" და "მთავარი სამეგრელოში". ასევე სვპეციალური პრიზი, ტაბლეტი ერგო საჩუქრად ლუკა კიკიას, სამეგრელოდან. ლუკამ პრიზი პირადად მიიღო, როგორც კონკურსის და ზოგადად პროექტის, ყველაზე ახალგაზრდა და წარმატებულმა მონაწილემ.
გამარჯვებულებს პრიზები ადგილებისა და თემატიკის მიხედვით გადაეცათ. პრიზებს შორისაა: ლეპტოპები პროგრამებით, პლანშეტები, ფოტოაპარატები და ინტერნეტის ერთი წლის საფასური.
კონკურსის დებულების მიხედვით, ყველა პრიზი მედიასაშუალებას ეკუთვნის.
კონკურსში 13 მედიასაშუალება მონაწილეობდა. ამათგან 9 რედაქციის წარმომადგენელი პოლონეთში სტაჟირებაზე გაემგზავრება. სტაჟირებაზე მიწვეულ მედიებს წელს, გასული წლისგან განსხვავებით, კონკურსი არ გაუვლიათ, ისინი ორგანიზატორებმა კონკურსს გარეშე, თავად შეარჩიეს.
კონკურსი ორგანიზებულია ასოციაცია დემოკრატიული აღმოსავლეთისა და კავკასიის ჟურნალისტთა საერთაშორისო ცენტრის მიერ შემდეგი პროექტის ფარგლებში: "საქართველოს ადგილობრივი მედია გაზეთები მობილურ სინამდვილეში".
პროექტი დაფინანსებულია შემდეგი პროგრამების ფარგლებში: პოლონეთის რესპუბლიკის საგარეოსაქმეთა სამინისტროს 2015 წლის თანამშრომლობის განვითარების პროგრამა "დემოკრატიის მხარდაჭერა" და თავისუფლების ფონდის პოლონურ-ამერიკული პროგრამა "ცვლილებები რეგიონში" – RITA, რომელსაც ახორციელებს ფონდი განათლება დემოკრატიისთვის.
კონკურსის ჟიურის შემადგენლობაში კი იყვნენ: მარჩინ ბანკ – პროექტის მთავარი ტრენერი;პიოტრ კრიშიაკი – პოლონური ადგილობრივი გაზეთების გამომცემელი;იაროსლავ ბაბიცკი – პოლონური ადგილობრივი გაზეთების გამომცემელი, ქართული ადგილობრივი გაზეთებისთვის განხორციელებული პროექტების ექსპერტი; კონსტანტინე სტალინსკი – დიზაინერი, ინფორმატიკოსი და პროგრამისტი, "საქართველოს ადგილობრივი გაზეთები მობილურ რეალობაში" პროექტის ექსპერტი და ალიცია მოლენდა – პოლონური ადგილობრივი გაზეთების "პშელომ" გამომცემელი, ადგილობრივი გაზეთების ასოციაციის თავჯდომარე, ქართული ადგილობრივი გაზეთებისთვის გახორციელებული პროექტების ექსპერტი.
