გამოკითხვა _ “ხვალ რომ არჩევნები იყოს, რომელ პარტიას მისცემდით ხმას?”

თამაზ ურუშაძე:

_ "ქართულ ოცნებას" დავუჭერ მხარს. ხალხი დაუნახავია და ვერ ხედავს სიკეთეს. არაფერი არ გაძვირებულა _ პირველადი მოხმარების საქონელზე ისევ ძველი ფასებია.

კახა პატარაია:

_ ჯერ არ გადამიწყვეტია, ვის მივცემ არჩევნებში ხმას.

ლიანა ჩხაიძე:

_ არც ერთს! არავინ არ ზრუნავს ხალხზე.

ედუარდ კალანდაძე:

_ მე "ოცნების" კაცი ვიყავი და ამ პარტიამ ძალიან ბევრი გააკეთა. ბევრი გაუკეთებელი დარჩა, შეუსრულებელი დაპირებებიც ბევრია. დავფიქრდები და ისე გადავწყვეტ, ვის უნდა მივცე ხმა.

გოგი ვაჩეიშვილი:

_ არც ერთს არ მივცემ ხმას, თუ ახალი ძალა არ გამოჩნდა.

ბონდო ჩხარტიშვილი:

_ არც ერთს, არც ერთი არაფერს არ აკეთებს.

ნონა მიმინოშვილი:

_ ვინც ფულს მომცემს, იმას. ვოცნებობ, მომცენ სოციალური დახმარება და შემიკეთონ სახლი _ მაშინ მივცემ ხმას "ოცნებას".

გულნაზ კიკვაძე:

_ რა თქმა უნდა, "ქართულ ოცნებას", რომელმაც სახლი მიყიდა.

ნატა ხინთიბიძე:

_ არც ერთს. ისე დაგვაბნია ჩვენმა მთავრობამ, რომ ხმას ნამდვილად არ მივცემ.

მანანა შოშიტაშვილი:

_ ივანიშვილს ლექსი დავუწერე, მეგონა, გამაკეთებდა. გავატანე მას თვითონ ეს ლექსი, მაგრამ _ არაფერი, ძაღლადაც არ ჩაუგდია. გული მატკინა ძალიან. 7-სულიან ოჯახში ყველა უმუშევარი მყავს. 5 წელია, შვილის დასაქმებას ვითხოვ, თუმცა, უშედეგოდ. ისეთი გულგატეხილები ვართ, "ოცნებას" ნამდვილად არ მივცემთ ხმას.

თამარ სირაძე:

_ "ნაციონალურ მოძრაობას" ისევ. ძალიან ცუდი მდგომარეობაა, რაც ეს მთავრობა მოვიდა, უკან უკან მიდის საქართველო.

მაგული ჭყონია:

_ რომელი პარტიაა ხმის ღირსი? მთელი წლის განმავლობაში გვპირდებიან, სახლებს დავხურავთ, წყალს მოვიყვანთ, გაზს შემოვიყვანთ!

მედიკო წიქაძე:

_ ყველა ჭკვიანია და ჩემი ასარჩევი არავინაა, მაგრამ მაინც ბურჯანაძეს მოვიაზრებ პრეზიდენტად, რადგან გონებამახვილი და კარგი პიროვნებაა.