დღეს, ქალაქ ოზურგეთში "ერთიანი ნაციონალური მოძრაობის" ოფისთან "ქართული ოცნების" მხარდამჭერებმა და კოორდინატორებმა ხმაურიანი აქცია გამართეს. ისინი მოითხოვდნენ "ნაცმოძრაობის", როგორც პოლიტიკური ორგანიზაციის გაუქმებას.
"ერთიანი ნაციონალური მოძრაობის" ერთ-ერთი ლიდერის, ოთარ რევიშვილის თქმით, ამ აქციის უკან გურიის გუბერნია და კონკრეტულად, გუბერნატორის მოადგილე, სოსო ერქომაიშვილი დგას.
სოსო ერქომაშვილი მედიასთან საუბრის დროს ამ ინფორმაციას არ ადასტურებს, მაგრამ ამბობს, რომ ისინი ხელს ვერ შეუშლიან მსგავსი ტიპის სამოქალაქო აქტივობას.
" ვწუხვარ ამ ბოლო დროს განვითარებული მოვლენების გამო. საუბარი მაქვს უკრაინულ ვებ-გვერდზე გავრცელებული ვიდეოფირზე, რომელიც ასახავს იმ რეალობას, რომელიც ნაცმოძრაობისგან იმართებოდა ცხრა წელი. გავრცელებული ვიდეო არის ქვეყნის ტრაგედია. ეს არის ჩემი, როგორც ერთ-ერთი მოქალაქის, აზრი.
რაც შეეხება აქციას, რომელიც დღეს გაიმართა ოზურგეთში, როდესაც "ნაცმოძრაობის" ოფისთან რამდენიმე ადამიანი აპროტესტებდა მათ ცხრა წლიან რეჟიმს, ეს გავიგე მედიით და მე ნამდვილად არაფერ შუაში ვარ. პირდაპირ გეტყვით, არ ვიყავი ინფორმირებული. იმ კონკრეტულმა ჯგუფმა თავისი აზრი გამოხატა და ეს არის ჩვეულებრივი მოვლენა, ეს არის მათი ლეგიტიმური უფლება. პირიქით, მსგავსი ტიპის სამოქალაქო აქტივობას ხელს ვერ შევუშლით." _ თქვა სოსო ერქომაიშვილმა.
