წუხელ, ერთ-ერთ კრაინულ მედიასაშუალებებაში, სამეგრელოში, წინა ხელისუფლების დროს გადაღებული ადამიანის წამების ამსახველი ვიდეო კადრები გავრცელდა. წყაროს და ლინკის მითითებით აღნიშნული კადრები რამდენიმე ქართულმა მედიასაშუალებამ გაავრცელა.
მედიას ტოლი არც საჯარო მოხელეებმა დაუდეს და ადამიანის ღირსების შემლახავი კადრები მათაც გაავრცელეს.
მათ შორის იყო გურიის გუბერნატორი გია სალუქვაძე, რომელმაც აღნიშნული ინფორმაცია ფეისბუქის საკუთარ გვერდზე გამოაქვეყნა:
"მიშიკოს "ცელქობანი" _ ასე დაასათაურა ერთ-ერთი ქართული სააგენტოს ინფორმაცია სალუქვაძემ.
_ მე მხოლოდ სააგენტოს მიერ დადებული ინფორმაცია გავაზიარე, რომ გავრცელდა ასეთი კადრები. იქ არ იყო წამების კადრები და არავითარი მოწოდება არ გამიკეთებია. გავუკეთე წარწერა სააკაშვილის ,,ცელქობა" რაც შეეხება ჩემს გადაღებულ დოკუმენტურ ფილმს სააკაშვილის სისხლიანი რეჟიმი, იქ მედიიდან აღებული დოკუმენტური კადრებია, რომელიც ბრიუსელში და სხვა ქალაქებში მაქვს ნაჩვენები, _ ამბობს ჩვენთან საუბრისას გია სალუქვაძე.
_ ბატონო გია, ფიქრობთ რომ ეს საზარელი კადრები მხოლოდ ცელქობაა? და როცა საჯარო მოხელე, მაღალი თანამდებობის პირი, აზიარებს ძალადობის ფაქტებს, ინფორმაციას, სადაც ის ლინკია მითითებული, სადაც კადრების ნახვაა შესაძლებელი გამართლებულად მიგაჩნიათ?
_ კიდევ ერთხელ ვიმეორებ, რომ მე არ გამიზიარებია ძალადობის კადრები, რომელიც გუშინ გამოქვეყნდა. მხოლოდ ამ კადრების შესახებ გაჟღერებული ინფორმაცია გავაზიარე, _ განმარტა გურიის გუბერნატორმა.
მისივე თქმით, ეს ყველაფერი საკუთარი თვალით აქვს ნანახი და არავის მითითება არ სჭირდება კადრების ნახვასთან დაკავშირებით:
_ რა გამოდის, ჩვენ გვაწამეს, ციხეებში გვამყოფეს წლეები და ახლა გვეუბნებიან ის, რაც გადაგხდათ ამის შესახებ არ მოყვეთ იმიტომ, რომ ადამიანები ცუდად ხდებიანო?! გამოდის, რომ თუნდაც იმისთვის, რომ ეს არასოდეს არ გამეორდეს, არც ერთი ხელისუფლების დროს არ გვაქვს უფლება ჩვენ, ვინც გვაწამეს, ამის შესახებ ვისაუბროთ?! _ ამბობს გია სალუქვაძე "გურია ნიუსთან" საუბრისას.
